2 TOMU-TOMUNDO' 15 - KITAB NU TUMPU ALLA LELE MA'IMAI'

I Uzia tomundo' nu Yehuda

¹ I taun ko uampulu'nyomo ka' popitu' na i Tomundo' Yerobeam ko II nyo nompalentah Israel. I Uzia anak i Amazia tinimbalimo tomundo' nu Yehuda.

² Tempo'nyo aitu umunnyo 16 na taun ka' nompalentahmo i Yerusalem 52 na taun na kinopinnyo. Tinanyo sanggonyo i Yekholya, boune nu aha mian nu Yerusalem.

³ Susumo tuumanyo i Uzia nombaumo anu momposanang kinyonyoa nu Tumpu.

⁴ Panyo moko sala'nyo ia madi' nongidei iwi-iwi' na tampat anu lewa' ponsomban pilogot, sahingga mian da'isan saja' ahi' sabole-bole monsombahkon koloban ka' mompapui kamangian i tampat haha aijo'.

⁵ Binau nu Tumpu na ia sahingga kinonamo nu panyakit kilit anu okabuhuk hondo, ka' sampe ia sinilaka madi'mo daagi' na alin na panyakit aijo'. Ia pinosi pojoongmo i sa'angu' na laigan ka' pinobebasmo i kalajanyo. I Yotam anaknyo momo'ane na nompalentah mian da'isan salaku wakilnyo.

⁶ Sisikon sangga'at mongkona i Tomundo' Uzia, tinulismo i kitab Sisikon nu to Tomu-tomundo' Yehuda.

⁷ I Uzia sinilakamo, ka' ilamunmo i tampat pinolamunan to tomu-tomundo' i kota' Daud. I Yotam anaknyo momo'ane na binau tomundo' nombol sakon ia.

I Zakharia tomundo' nu Israel

⁸ I taun kotolumpulu'nyomo ka' ualu' na i Tomundo' Uzia nompalentah Yehuda, i Zakharia anak i Yerobeam ko II nyo tinimbalimo tomundo' nu Israel ka' nompalentahmo i Samaria anom na bitu'on na kinopinnyo.

⁹ Susumo to tomu-tomundo' anu nompalentahmo, ma'isa pe'e kino ianyo, ia mule' suele binaladosa'mo hi Tumpu. Ia nontihomo kalakuan ma'i-ma'idek i Tomundo' Yerobeam ko I nyo, anu nonsaduakonmo Israel sahingga binaladosa'mo.

¹⁰ I Salum anak i Yabes nompotinjomo posa'angu'an da batanga' mongewa i Tomundo' Zakharia ka' nompateimo ia kiijo' i Yibleam, ka' i hangkatmo binau tomundo' nombolosakon ia.

^11-12 Sahingga jinadimo apaa na anu jinanji'mo nu Tumpu hi Tomundo' Yehu, tukoonyo makumpunyo toka-toka i lapisan nu lee'nyo anu ko opatnyomo na timbali tomundo' nu Israel. Sisikon sangga'at mongkona i Tomundo' Zakharia, tinulismo i kitab Sisikon nu to Tomu-tomundo' Israel.

I Salum tomundo' nu Israel

¹³ I taun kotolumpulu'nyomo ka' osio' na i Tomundo' Uzia nompalentah Yehuda, i salum anak i Yabes tinimbalimo tomundo' nu Israel. Ia nompalentah Samaria ola sina'angu'na bitu'on,

¹⁴ kalana i Mahanom anak i Gadi lengkat mae i Tirza nambamo i Samaria lantas nompateimo i Salum, ka' tinimbalimo tomundo' nombolosakon ia.

^15-16 Ia namba lengkat mae i Tirza, i Mahanom so'mo mae nongidei kota' Tifsah ka' miannyo madi' ko anu tinontuha' ka' da'erahnyo songko-songko. Kalana miannyo anu i kota' aijo' madi' mongka'oho' tundu' hi ia, sahingga to bou-boune anu poboa i kota' aijo' pinaha bohaknyomo na kompong nu aha. Sisikon sangga'at mongkona i Tomundo' Salum, tiba aha anu monsangaja'i ia, tinulismo i kitab Sisikon nu to Tomu-tomundo' Israel.

I Menahem tomundo' nu Israel

¹⁷ I taun ko tolumpulu'nyomo ka' osio' na i Tomundo' Uzia nompalentah Yehuda, i Mehanem anak i Gadi tinimbalimo tomundo' nu Israel, ka' nompalentahmo i Samaria 10 na taun na kinopinnyo.

¹⁸ I uno nu kantumuu'annyo ia saja' nombau dosa' hi Tumpu, kalana nontihomo kalakuan anu ma'i-ma'idek i Tomundo' Yerobeam ko I nyo, anu nonsaduakon mian nu Israel sahingga binaladosa'mo.

¹⁹ Tempo'nyo i Pul tomundo' nu Asyur nontumbuhimo Israel, binee'anmo i Menahem na ia 34.000 kilogram na salaka da ia montulungi i Menahem da sabole-bole ia mompalentah Israel, ka' mongkuasai Israel.

²⁰ Anu binau i Menahem da mohumpak doi aijo', aijo'mo mompakisa toto samian na to mia-mian kaya i Israel da mombee'i limampulu' na doi salaka, kalana aijo' pinala'ianmo i Pul na lipu' aijo' ka' ia ninsusule'mo i lipu'nyo.

²¹ Sisikon sangga'at mongkona i Tomundo' Menahem tinulis mo i kitab Sisikon nu to Tomu-tomundo' Israel.

²² Ia sinilakamo ka' i lamunmo, lantas i Pekahya anaknyo na tinimbali tomundo' nombolosakon ia.

I Pekahya tomundo' nu Israel

²³ I taun ko limampulu'nyomo na i Tomundo' Uzia nompalentah i Samaria ingohua' na taun na kinopinnyo.

²⁴ Ia binaladosa'mo hi Tumpu kalana nontihomo kalakuan ma'i-ma'idek i Tomundo' Yerobeam ko I nyo, anu nonsaduakonmo mian nu Israel, sahingga binaladosa'mo.

²⁵ Sala' samian na suludadu anu matangkas na pangkatnyo aijo' hi ia, aijo'mo i Pekah anak i Remalya, nombaumo kasangaja'an aha 50 na mian anu lengkat mae i Gilead. Lantas i sa'angu' na benteng kiijo' i laigan nu tomundo' i Samaria pinateanmo nu aha na i Pekahya ka' ua'aha na mian sangga'at sanggonyo i Argop tiba i Arye. Lapas aijo' i Pekah tinimbalimo tomundo' nombolosakon i Pekahya.

²⁶ Sisikon sangga'at mongkona i Tomundo' Pekahya tinulismo i kitab Sisikon nu to Tomu-tomundo' Israel.

I Pekah tomundo' nu Israel

²⁷ I taun ko limampulu'nyomo ka' ohua' na i Tomundo' Uzia nompalentah Yehuda, i Pekah anak i Remalya tinimbalimo tomundo' nu Israel. Ia nompalentahmo i Samaria 20 na taun na kinopinnyo.

²⁸ Ia binaladosa'mo hi Tumpu kalana nontihomo kalakuan ma'i-ma'idek i Tomundo' Yerobeam ko I nyo, anu nonsaduakonmo Israel binaladosa'mo.

²⁹ Tempo'nyo i Pekah nompalentah, i Tiglat-Pileser tomundo' nu aha Asyur nongalamo kota' Iyon, Abel-Bet-Makha, Yanoah, Kedes-Hazor, da'erah Gilead, Galilea tiba Naftali. Miannyo anu jojoong i kota' haha aijo' suele binoanyomo salaku mian anu i hakop binoa i Asyur.

³⁰ I taun ko uampulu'nyomo na i Tomundo' Yotam anak i Uzia nompalentah Yehuda, i Hosea anak i Ela nombaumo kasangaja'an da mongewa i Tomundo' Pekah ka' pinateanmo nu aha na ia.

³¹ Sisikon sangga'at mongkona i Tomundo' Pekah tinulismo i kitab Sisikon nu to Tomu-tomundo' Israel.

I Yotam tomundo' nu Yehuda

³² I taun ko ohua'nyomo na i Tomundo' Pekah anak i Remulya nompalentah Israel, i Yotam anak i Uzia tinimbalimo Tomundo' nu Yehuda.

³³ Tempo'nyo aitu umunnyo 25 na taun ka' ia nompalentah Yerusalem 16 na taun na kinopinnyo. Sanggo nu tinanyo i Yerusa anak i Zadok.

³⁴ I Yotam nombaumo anu nomposanangmo kinyonyoa nu Tumpu, susumo i Uzia tuumanyo.

³⁵ Panyo moko sala'nyo tampat anu lewa' ponsomban pilogot madi' ingideannyo sahingga mian da'isan saja' ahi' monsombahkon ko koloban ka' mompapui kamangian i kiijo'. I Yotam na mombau Sabatan Daka' sasu Utara i Laigan nu Tumpu.

^36-37 Tempo'nyo i Yotam nompalentah, Tumpu mulaimo lewa' nonsai i Resin tomundo' nu Siria tiba i Pekah tomundo' nu Israel da mamba montumbuhi Yehuda. Sisikon sangga'at mongkona i Tomundo' Yotam tinulismo i kitab Sisikon nu to Tomu-tomundo' Yehuda.

³⁸ Ia sinilakamo ka' i lamunmo i pinolamunan to tomu-tomundo' i Kota' Daud. I Ahas anaknyo na tinimbali tomundo' nombolosakon ia.