2 TOMU-TOMUNDO' 14 - KITAB NU TUMPU ALLA LELE MA'IMAI'

I Amazia tomundo' nu Yehuda

¹ I taun ko ohua'nyomo na i Yoas anak i Yoahas nompalentah Israel, i Amazia anak i Yoas tinimbalimo tomundo' nu aha Yehuda.

² Tempo'nyo aitu umunnyo uampulu'mo ka' olima' na taun na kinopinnyo. Tinanyo i Yoadan mian nu Yerusalem.

³ I Amazia nombaumo anu momposanang kinyonyoa nu Tumpu, panyo ia madi' sumo i Daud mompolee'nyo mae.

⁴ Susumo tuumanyo ia madi' lewa' nohobo'akon tampat anu lewa' ponsomban pilogot, sahingga mian da'isan saja' ahi' monsombahkon koloban mompapu kamangian i kiijo'.

⁵ Salatan nahosonmo na i Amazia nompalentah, to mia-mian anu ko pangkatnyo mokalaja hi ia, i hukumnyomo pinatean aijo'mo aha anu nonompateimo tuumanyo.

⁶ Panyo to ana-anak nu to mia-mian anu ko pangkatnyo aijo' madi' pinateannyo, kalana ia montuluti palentah nu Tumpu anu i Kitab i Musa, anu onyi'nyo, “Boli opatei na anu mohukum to tu'a-tu'anyo kalana monsaduakon hahan anu ma'idek anu binaumo nu to tu'a-tu'anyo nu aha. Batu-batu mian mohumpak hukuman opatei de han anu ma'idek aijo' pinosi baunyo.”

⁷ Daagi' kino minsan nahampate, i Amazia nompateimo suludadu nu Edom aha 10.000 na mian i Bangka'nyo nu Asin, ka' nompatundu'mo kota Sela. Kota' aijo' sinanggohannyo Yokteal. Sampe tempo' uuka aiya kota' aijo' daagi' osanggohi Yokteal.

⁸ Lapas aijo' i Amazia nonsaimo mian namba hi Yoas tomundo' nu Israel, mompoto'i da ia mongewamo aha mahampatemo.

⁹ Panyo i Tomundo' Yoas nonsai mian namba nompoto'i sumo uuka, “Daagi' kino minsan hemput anu ko hii'nyo i Bungkutnyo nu Libanon nompolelemo sumo uuka hi kau' lontio', 'O kau' lontio', bee' mae na anak nu beleyum lalangkoyang hi anakku da bau bengkele'nyo.' Panyo mamanga notulumo kiijo' sa'angu' na binatang nu alas nompahapeja'akonmo hemput anu koko hii'nyo.

¹⁰ Belento Amazia kinobubuunmo kalana belento nompatundu'mo mian nu Edom. Jadi te misa' ka'untungan nu belento nahampate atina' sinukupmo ahi'? Lebe ma'ima' belento atina' me ahi' jojoong i laigan! Apaa na daagi' ko gunanyo lewa' molio palakala anu ola monsilakai butong nu belento ka' mian da'isan anu nu palentah?”

¹¹ Panyo i Amazia tomundo' nu Yehuda madi' nontapali potatae i Yoas tomundo' nu Israel. Kalana aitu i Tomundo' Yoas tiba to sulu-suludadunyo nambamo i Bet-Semes i da'erah Yehuda ka' nahampatemo tiba i Amazia kiijo' mae.

¹² Suludadu nu aha Yehuda pinatundu'mo ka' iwi-iwi' na suludadunyo nalaimo ninsusule'mo i laigan nu aha toto samian.

¹³ I Amazia i hakopmo i Yoas, lantas nambamo i Yerusalem ka' nohobo'akonmo pagan mesen nu kota' aijo' anu ko mantannyo kila-kila ua'atu na meten, lengkat pe'e i Sabatan Daka' Efraim toka-toka i Sabatan Daka Pasu'nyo.

¹⁴ Iwi-iwi' na mosoni' ka' salaka ka' iwi-iwi' na pakakas anu i humpak nu aha i Laigan nu Tumpu, ka' mule' iwi-iwi' na halata' anu i laigan nu tomundo', ka' to pia-piangkuka na mian anu i hakop, binoamo i Yoas iwi-iwi' i Samaria.

¹⁵ Sisikon sangga'at mongkona i Tomundo' Yoas tibamo kabaaniannyo nongewa i Amazia tomundo' nu Yehuda tinulismo i kitab Sisikon nu to Tomu-tomundo' nu Israel.

¹⁶ I Yoas sinilakamo ka' ilamunmo i tampat pinolamunan to tomu-tomundo' nu Samaria. I Yerobeam ko II nyo aijo'mo anaknyo, na tinimbali tomundo' nombolosakon ia.

I Amazia tomundo' nu Yehuda sinilakamo

¹⁷ Salatan i Yoas tomundo' nu Israel sinilakamo, i Amazia tomundo' nu Yehuda, na daagi' ahi' tutuu' sampe 15 na taun na kinopinnyo.

^18-21 I Yerusalem daagi' ko mian anu binasale'mo kahanda'mo mompatei i Amazia. Mokonyo' aijo' ia nopalaimo namba i Lakhis, panyo mian haha aijo' anu monsampo bali' ia nololoi'mo ia namba nokiijo' ka' nompateimo ia. Bangke'nyo binoamo i Yerusalem pinosake' i ajahan ka' i lamunmo i pinolamunan to tomu-tomundo' i Kota' Daud. Sahingga mian da'isan nohangkatmo i Uzia, anak momo'ane i Amazia binau tomundo' nu aha. Tempo'nyo aitu i Uzia sala'je 16 na taun na umunnyo. Sisikon sangga'at mongkona i Tomundo' Amazia tinulismo i kitab Sisikon nu to tomu-tomundo' Yehuda.

²² Salatan tuumanyo sinilakamo, po'ule'mo ingala i Uzia na kota' Elat ka' po'ule'mo binangunnyo.

I Yerobeam ko II nyo tomundo' nu Israel

²³ I taun ko sampulu'nyomo ka' olima' na i Amazia anak i Yoas nompalentah Yehuda, i Yerobeam ko II nyo anak i Yoas tinimbalimo tomundo' nu Israel, ka' nompalentahmo i Samaria 41 na taun na kinopinnyo.

²⁴ Ia binaladosa'mo hi Tumpu kalana nontihomo kalakuan ma'idek i tomundo' Yerobeam ko I nyo anu nonsaduakonmo sahingga mian nu Israel binaladosa'mo.

²⁵ I Yerobeam ko II nyo ai-aiyamo na anu po'ule' nongala iwi-iwi' na da'erah nu Israel, lengkat pe'e i jalan mamba i Hamat sasu utara toka-toka i Ambai mate sasu salatan. Aijo' madi' sala' susumo anu jinanji'mo nu Tumpu, Tumpu Allah nu Israel, anu pinoki poto'inyo hi Nabi Yunus posaihon-Nyo anak i Amitau mian nu Gat-Hefer.

²⁶ Tinoamo nu Tumpu palias na kasansala'annyo nu mian Israel, ka' madi' ko samian pe'e na anu montulungi aha.

²⁷ Tumpu madi' ko kahanda' mompateimo Israel sampe toka sidu-sidutu', kalana aijo' tinulungan-Nyomo na aha, pinake-Nyo na i Tomundo' Yerobeam ko II nyo, nontulungi aha.

²⁸ Sisikon sangga'at mongkona i Tomundo' Yerobeam ko II nyo, mongkona kabaanian lewa' mahampate ka' mosia na ia po'ule' nongala Damsyik ka' Hamat hi aha Yehuda ka po'ule' ninosoop hi aha Israel, iwi-iwi' tinulismo i kitab Sisikon nu to Tomu-tomundo' Israel.

²⁹ I Yerobeam ko II nyo sinilakamo ka' i lamunmo i tampat pinolamunan to tomu-tomundo'. I Zakharia anaknyo momo'ane na i hangkat binau tomundo' nombolosakon ia.