2 TOMU-TOMUNDO' 11 - KITAB NU TUMPU ALLA LELE MA'IMAI'

I Atalya Tomundo' boune nolengkat mae i Yehuda

¹ Salatan sinumbu'mo i Atalya na i Tomundo' Ahazia, anaknyo sinilakamo, ia nompalentahmo da iwi-iwi' na aha sa'anakan i Ahazia opateimo.

² I Yoas anak i Ahazia boboli' opatei hingga-hinggat tiba anak to momo'ane nu tomundo' sangga'atan, panyo i Yoas pinosalamat nu dada'nyo i Yoseba. I Yoas ka' anu monjagai ia binoa nu aha ka' pinosuluk i sa'angu' na salipi' kahoyotan i Laigan nu Tumpu.

³ Anom na taun na kinopinnyo na i Yoseba nongkalesang anak aijo' i Laigan nu Tumpu tempo'nyo i Atalya nompalentahmo salaku tomundo' boune.

⁴ I taun ko popitu'nyomo, to sulu-suludadu anu toto tangka-tangkas na pangkatnyo ka' anu saja' monjagai tomundo' boune ka' anu saja' monjagai laigan nu tomundo' i lagamo i Imam Yoyada da mompahakabot tiba ia i Laigan nu Tumpu. I kiijo' ia nompoto'imo aha da basumpa' na mombau anu tinanga'annyomo. Ia nompoto'i hi Yoas anak, mo'ane i Tomundo' Ahazia hi aha,

⁵ ka' nompalentahmo sumo uuka, “De belemiu opalentahmo mokalaja i Sinaa nu Sabat, belemiu obagi totolu' sambagian tionyo ahi' monjagai laigan nu tomundo'.

⁶ Sambagian mule' monjagai sabatan daka' Sur ka' labinyo mule' i sabatan daka' sasu padutnyo i tampat nu ponjaga'an sangga'at.

^7-8 Anu ohua' na tompukan anu madi'mo nokalaja i sinaa nu Sabat, tionyo ahi balajaga-jaga i Laigan nu Tumpu ka' bajak o keatmo na monjagai i Tomundo' Yoas. Belemiu iwi-iwi' tionyo ahi' monjagai ia maumo pa' moya na ia mamba, ka' batu-batu mian anu monsoba-soba mongohani ia tionyo ahi' opatei nu belemiu.”

⁹ To sulu-suludadu anu toto tangka-tangkas na pangkatnyo nontuluti mo palentah i Yoyada ka' nomboamo hi ia suludadu nu aha anu tionyo ahi' bakalaja tiba anu madi'mo nokalaja i sinaa nu Sabat aijo'.

¹⁰ I Yoyada nombee'imo talombo' hi suludadu anu toto tangka-tangkas na pangkatnyo aijo' toto samian talombo' ka' kanta i Tomundo' Daud anu inguna' i Laigan nu Tumpu.

¹¹ Lantas batu-batu suludadu haha aijo' monjagai okeatmo na ba bajak ka' tampat nu aha montikubi Laigan nu Tumpu sasu ahopnyo da monjagai i tomundo'.

¹² Lapas aitu i Yoyada nomboamo i Yoas nosabat, lantas pinosoku'annyomo makota i ubaknyo ka' binee'nyomo kitab Atulan nu Tumpu Allah. I Yoas i hangkatmo binau tomundo' ka' han aitu binebakonmo hi mian da'isan. Iwi-iwi' nohagaimo ka' nontalagalaimo “Umu-umunnakon na i tomundo'!”

¹³ I Atalya tomundo' boune nohongomo taligala nu suludadu anu monjagai tiba mian da'isan. Lia-lia' ia namba i Laigan nu Tumpu i tampat nu aha mian da'isan sinihuk.

¹⁴ Tinoanyo na tomundo' anu sala'je i hangkat aijo' tinjo-tinjo i sabatan nu Laigan nu Tumpu i tampat pinohangkatan ia salaku tomundo', tinikubanmo nu to sulu-suludadu anu toto tangka-tangkas na pangkatnyo ka' anu mompuhi tolompet. Iwi-iwi' na mianda'isan nontaligalaimo kalana binilahimo ka' mule' pinuuhanmo nu aha na tolompet. I Atalya binata-batamo ka' binea-beaknyomo na pakeannyo ka' nolobo'mo “Uesan-Uesan!”

¹⁵ I Yoyada madi' mompobee' i Atalya opatei koko Laigan nu Tumpu jadi pinoto'inyomo hi suludadunyo anu toto tangka-tangkas na pangkatnyo. “Boa na iasabatakon montulu suludadu anu monjagai ka' opatei maumo pa' ihe na montulungi ia.”

¹⁶ I hakopmo nu aha na ia, lantas binoa mo nu ha i Laigan nu tomundo'. I kiijo' mae ia pinateanmo i ahop nu Sabatan Daka' Ajahan.

I Yoyada nombali'imo palajanjian

¹⁷ I Imam Yoyada nonsaimo i Tomundo' Yoas ka' mian da'isan da mombau palajanjian hi Tumpu kalana aha mongka'oho'mo timbali mian anu palesayamo hi Tumpu. Ka' ia mule' nonsaimo i tomundo' mombau palajanjian hi mian da'isan.

¹⁸ Lapas aitu mian da'isan nontumbuhimo ka' nongideimo kuil nu Baal. Mezbah tiba patong haha aijo' ingideanmo nu aha ka' i Matan, imam Baal pinateanmo nu aha i ahop nu Mezbah haha aijo'. I Yoyada nompalentahmo suludadu anu monjaga da monjagai Laigan nu Tumpu,

¹⁹ lantas ia hingga-hinggat tiba suludadu anu toto tangka-tangkas na pangkatnyo tiba suludadu anu monjagai tomundo' ka' suele suludadu anu monjagai laigan nu tomundo' ka' iwi-iwi' na mian da'isan nomboamo i Tomundo' Yoas lengkat i Laigan nu Tumpu mamba i Laigan nu tomundo'. I Yoas ninsoopmo nontului Sabatan Daka' ponjaga'an nu Suludadu anu monjagai tomundo', lantas sinumuhangmo aita' i suhangan nu tomundo'.

²⁰ Iwi-iwi' na mian da'isan binilahimo ka' kota' ingamanmo ka' i Atalya pinateanmo.

²¹ I Yoas tempo'nyo aitu umunnyo popitu'mo nataun na ia tinimbali tomundo' nu Yehuda.