2 TIMOTIUS 4 - KITAB NU TUMPU ALLA LELE MA'IMAI'

¹ I Kristus Yesus daagi' po'ule' toka i dunia aiya da momputusimo to mia-mian anu tumuu' ka' anu sinilakamo; ka' Ia toka mae da mompalentah sumo Tomundo. Mokonyo aijo' ku poita sabole-bole hi komiu i ahop nu Tumpu ka' hi Kristus Yesus:

² Tionyo ahi' beleyum saja' mompolele lele lengkat mae hi Tumpu Allah aijo', ka' sabole-bole opoita da mian mohongo pa' aha mongka'oho', kabai madi'. Tionyo ahi' beleyum bala usaha da mian palesaya totu-totu'u, mompoto'i kasala'an ka' mongkakeha'i aha. Pagala osabalakon na mongajan mian.

³ Kalana tokaje na tempo'nyo, mian madi'mo daagi' mongka'oho' montalima pangajalan anu totu'u. Panyo ola ahi' aha montulutimo posi pongka'oho' nu aha, ka' momposihukmo manjoo' na to gulu-gulu' da o'ajanakon na hahan anu ma'ima' na ohongo nu bihing nu aha.

⁴ Aha mompitimo bihing na mohongo anu totu'u, panyo mompotombihingmo to sisi-sisik anu baleko'.

⁵ Maumo sumo aitu beleyum tionyo mongkuasai posi butongum i uno nu ka'ada'an maumo pa' mosia. Sabaalakon na kasansala'an, baumo na kalajaum salaku anu mompolele Lele Ma'ima' aijo', ka' opojalan ma'i-ma'ima' na kalajaum salaku mian monjalanakon palentah nu Tumpu.

⁶ Mongkona butongku, tinokamo na tempo'nyo aku silakamo salaku bau koloban hi Tumpu. Madi'mo pin aku mompala'imo dunia aiya.

⁷ Aku nombatukimo palalomba'an totu-totu'u ka' nontokaimo katokaan i pupuusnyo. Aku tataap tulu-tulutan hi Kristus sampe toka i aha ahenannyo.

⁸ Ka' uuka aiya palasen nu ka'untungan nopadeka' nontanda'imo aku. I Sinaa Kakiamatan Tumpu, Mian Kopian anu adin aijo' mompotalimaje palasen aijo' hi belengku, kalana aku tumuu' mompaha ima'mo tiba Tumpu. Ka' misa' ola aku na montalima palasen aijo', panyo suele iwi-iwi' mian anu mongindi hondo montanda'i katokaan nu Tumpu.

To poki-pokinde' anu pupuusnyomo

⁹ Bala usaha lia-lia' na toka mae hi belengku,

¹⁰ sabab i Demas nompala'imo aku kalana mongka'ima'imo dunia aiya. Ia nambamo nokiijo' i Tesalonika. I Kreskes nambamo nokiijo' i Galatia, ka' i Titus nokiijo'mo i Dalmatia.

¹¹ Me i Lukas na jinojoong tiba aku. Mamba ala ka' boa mae na i Markus hingga-hinggat tiba beleyum, kalana ia na timbali montulungi pakalaja'anku.

¹² Aku nonsaimo i Tikhikus namba nokiijo' i Efesus.

¹³ De beleyum mambamo mae, boakon mae na baju' ujan anu kinolilimanku mae i Troas hi bonua i Karpus. Boakon mae suale na kitabku haha itina', anu penting hondo kitabku haha itina' anu kilit na binau kalatas.

¹⁴ I Aleksander, tukang tutuk tambaga aijo' nombaumo hahan anu ma'idek hondo hi belengku. Tumpuje na mombalosi ia sitimbang tiba apaa na anu binaunyomo.

¹⁵ Beleyum suele tionyo ahi' bala hati-hati hi ia, kalana ia talalo hondo monggagakon apaa na anu pinolelentomo.

¹⁶ Tempo'nyo aku momona nontutuhakonmo mosia na kahondoanku aiya, madi' ko samian pe'e na anu nonsangalui aku; iwi-iwi' nompala'imo aku. Bisa-bisa' Tumpu madi' mompisala'i aha i uno nu han aiya!

¹⁷ Panyo Tumpu na nonsangalui aku. Ia na nombee'imo kahosonan sahingga aku noko ala nompolele Lele Ma'ima' aijo' iwi-iwi', da ihongo nu mian iwi-iwi' anu misa' Yahudi. Sahingga aku madi'mo kinona nu bahaya nu kapatean.

¹⁸ Memang Tumpu na montulungi mae aku i iwi-iwi na usaha anu ma'idek da madi' mae mongkona aku. Ia momboaje aku i uno nu ka'ada'an salamat hi Kalaja'an-Nyo i Suluga'. Tionyo Ia saja' opopodaka' sampe toka sidu-sidutu'! Amin.

Pupuusnyomo nu salan do'a

¹⁹ Salan do'angku toka hi Priskila ka' hi Akwila ka' hi sampoto utusan i Onesiforus.

²⁰ I Erastus jinojoongmo i Korintus, ka' i Trofimus, pinala'iankumo mae i uno nu ka'ada'an masakit kiijo' mae i Miletus.

²¹ Pagala bala usaha da toka mae ma'isa pe'e tempo' nu bakin. I Ebulus, i Pudes, i Linus ka' i Klaudia nompakatu salan do'a nu aha toka hi beleyum; sumo aitu mule' suele iwi-iwi' na to Utu-utus sangga'atannyo anu sa'a-sa'angu' na kapalesaya'an.

²² O'amalakon da Tumpu saja' monsangalui beleyum. O'amalakon da Tumpunto mombalakati to Utu-utus! Tabea' mami, I Paulus 10