2 TIMOTIUS 2 - KITAB NU TUMPU ALLA LELE MA'IMAI'

Suludadu i Kristus anu tulu-tulutan

¹ O Timotius, anakku! Pahosonmo ahi' na beleyum nu balakat anu binee'mo hi kita, kalana kita nosa'angu'mo tiba i Kristus Yesus.

² Ajalan anu u'utu mae i hongoummo lengkat hi belengku i ahop nu mian da'isan, tionyo ahi' beleyum mompalesayakonmo hi to mia-mian anu timbali opalesaya ka' anu pande na mongajan mian sangga'at.

³ Beleyum tionyo mongoa'i sansala susumo suludadu i Kristus Yesus anu tulu-tulutan.

⁴ Samian na suludadu anu hau-haunyo mokalaja, madi' momposibuk butongnyo nu posi ulusannyo, saba' ia mongkahanda'i momposanang kinyonyoa nu kapalanyo.

⁵ Samian na topo pahaik ola raga madi' mohumpak ka'untungan i uno nu sa'angu' na tandingan, de ia madi' montuluti to atu-atulannyo.

⁶ Anu topo ale', anu mokalaja totu-totu'u iamo na momonanyo ko hak mohumpak hasin anu sinu'annyo.

⁷ Potutugakon ima-ima' apaa na anu pinopohimoonakonkumo aijo', saba' Tumpu mombee'ije hi komiu da moko ala monsumbu' iwi-iwi'.

⁸ O inau' na aiya: Lele Ma'ima' anu kupolele aijo', atina'mo na lele mongkona i Yesus Kristus, lee' i Daud; Iamo na i Kristus anu sinilaka po'ule'mo pinotumuu'.

⁹ Kalana mompolele Lele Ma'ima' aijo', nonsaduakonmo aku sinilaka; pinaka mule' i lante' sumo samian anu uesan. Panyo potatae nu Tumpu madi' opoko ala o lante'.

¹⁰ Mokonyo aijo', aku sabaan na montanggung iwi-iwi' aijo' kalana kapentingan nu to mia-mian anu pinile'anmo nu Tumpu, da suele aha mohumpak kasalamatan anu obee' kalana palesayamo hi Kristus Yesus tiba mule' talasanggomo sampe toka sidu-sidutu'.

¹¹ Totu'u hondo na potatae aiya, “De kita silakamo tiba Ia, kita po'ule'je tumuu' tiba Ia.

¹² De kita tataap sabaan, kita mompalentahje suele tiba Ia. De kita madi'mo mongakui Ia, Ia suele madi'mo mongakui kita.

¹³ De kita madi'mo tulu-tulutan, Ia tataap mongkanonongi, kalana tanga'an-Nyo madi' timbali madi' pokakana tiba tanga'an nu butong-Nyo.”

Mian anu mokalaja mohumpak pompuji'

¹⁴ Tionyo ahi' beleyum mompo'ingatakon to mia-mian mongkona iwi-iwi' aijo'. I ahop nu Tumpu opokinde'i na aha boli painggaga mongkona to sisi-sisik. Aijo' madi' ko gunanyo, ola da mompobingong to mia-mian anu mohongo.

¹⁵ Tionyo ahi' beleyum bala usaha totu-totu'u da nu akui nu Tumpu sumo mian anu pantas na mokalaja hi Ia. Bala usaha da beleyum madi' ma'ambang na molakukan pakalaja'anum, panyo o'ajanakon ahi' na aja-ajalan anu totu'u lengkat mae hi Tumpu Allah.

¹⁶ Opimpali na to sisi-sisik anu madi' ko gunanyo, ka' anu mongise-ise' Tumpu. Sisi-sisik sumo aijo' ola mombau mian mompaka pa'idek.

¹⁷ Ajalan nu to mia-mian haha aijo' molele sumo panyakit anu monsilakai. Aijo' hi aha tibamo i Himeneus ka' i Filetus.

¹⁸ Aha noteba'mo madi'mo nombatuki ajalan anu totu'u ka' nompobingongmo kapalesaya'an nu sambagian mian. Aha notatae tukoonyo silaka po'ule' tumuu' toho'mo tinimbali.

¹⁹ Panyo usoi anu mahoson binau nu Tumpu madi' opoko ala o idei. I buannyo tinulismo sumo uuka, “Tumpu monsumbu' to mia-mian-Nyo”, ka' “Mian anu motatae tukoonyo ia anumo nu Tumpu, mian aijo' tionyo montibahakonmo mombau palabuatan anu sala'.”

²⁰ I uno nu laigan daka' daagi' ko ngangahan nu pakakas. Daagi' ko anu salaka na binau kabai mosoni', panyo daagi' mule' ko anu kau' na binau kabai tano'. Daagi' ko anu pinake da bau kapalaluan anu talalo penting, ka' daagi' mule' ko anu opake bau kapalaluan anu biasamo.

²¹ Mian anu mompokopiani butongnyo i han iwi-iwi' anu ma'idek, mian aijo' opakeje da bau kapalaluan anu talalo penting. Ia samata-mata timbalimo anu nu tuannyo, ka' mingguna hi tuannyo. Ia pinosadiamo da opake iyayamae na pakalaja'an anu ma'ima'.

²² Pimpali na kasanangan nu mian anu daagi' olitau. Bala usaha da kantumuu'an mombatuki pongka'oho' nu Tumpu, tulu-tulutan i pangajalan-Nyo ka' mongkalibosi sangko mian, ka' mule' kinyonyoa sanang. Tumuu'mo sumo aijo' tiba aha anu mongkakase momoita tulung hi Tumpu i uno nu kinyonyoa anu ma'ima'.

²³ Bolimo mombatuki painggagan nu to mia-mian ponga' anu madi' monsumbu' apa-apaa. Nusumbu' saba' iwi-iwi' aijo' ola monsaduakon painggagan.

²⁴ Mian anu mokalaja bau kapentingan nu Tumpu, madi' patut painggaga; ia tionyo ahi' motatae ma'ima' hi iwi-iwi' na mian, ka' timbali mongajan mian ma'i-ma'ima' ka' sabaan.

²⁵ Ia madi' ko sega-sega na mongajan mian anu ka'oho' monggagakon; o'amalakon da Tumpu mombee'i kasampatan hi mian haha aijo' da balatobat mombabali'i dosa-dosa' nu aha, ka' monsumbu' pangajalan anu totu'u.

²⁶ Tiba jalan anu sumo aijo' aha po'ule'mo sinsumbu' ka' nolapasmo i ponggoda'an nu Ibilis anu nonsale'imo aha ka' nompakisamo aha mombatuki pongka'oho'nyo.