2 TESALONIKA 3 - KITAB NU TUMPU ALLA LELE MA'IMAI'

Do'akon mae na kami

¹ Ka' mule' to Utu-utus, do'akon mae na kami. Balado'a da lele lengkat mae hi Tumpu saja' sampa tolele ka' otalima ma'i-ma'ima' susumo anu toho'mo jinadi hi komiu u'utu mae.

² Do'akon suele da Tumpu momposalamat kami da boli nu silakai nu to mia-mian anu palaganta ka' ma'idek. Kalana madi' iwi-iwi'mo na mian anu pinalesayamo i lele anu lengkat mae hi Tumpu aijo'.

³ Panyo Tumpu mongkanonongi. Ia mompohoson ka' monjagai komiu da te Ibilis madi' mompoposia komiu.

⁴ Ka' kami palesaya hondo-hondo hi Tumpu apaa na anu jinadimo hi komiu, kalana komiu nombaumo ka' sabole-bole mombau apaa na anu pinoto'imo mami hi komiu.

⁵ O amalakon da Tumpu saja' mompotingaan komiu, da lebe mangalati', hi Tumpu anu mongkalibosi komiu, ka' kalana i Kristus nombee'imo kasabalan hi komiu.

Palentah da mokalaja

⁶ To Utu-utus, kalana kuasa i Tumpu Yesus Kristus, kami mompalentah da komiu matijo'on hi to Utu-utus iwi-iwi' anu tumuu' to lulu-luluk, ka' madi' mombatuki aja-ajalan anu obee' kami hi aha.

⁷ Posi komiu monsumbu'mo, saba' komiu tionyo ahi' montiho' sonto' kami. Kami madi' lewa' moluluk tempo'nyo kami daagi' itina' mae hi komiu.

⁸ Kami madi' mongkaan kaanon nu mian de madi' o bayan mami. Panyo mule' sinaa ka' pihi, kami mokalaja totu-totu'u, da kami madi' monsusa'i maumo pa' ihe itina' hi komiu.

⁹ Kami mombau aijo' misa' kalana kami madi' ko hak montuntut da komiu montulungi kami, panyo kalana kami mongka'oho' da timbali sonto' hi komiu.

¹⁰ Tempo'nyo kami daagi' itina' hi komiu, kami nombee'imo atulan sumo uuka, “Mian anu madi' mongka'oho' mokalaja, madi' timbali mongkaan.”

¹¹ Kami motatae sumo aiya, kalana kami nohongomo, daagi' ko to mia-mian anu itina' hi komiu anu tumuu' ola lewa'mo luluk. Aha madi' mombau apa-apaa panyo ola ahi' saja' monggalo'i ulusan nu mian sangga'at.

¹² Kalana kuasa nu Tumpu Yesus Kristus, sahingga kami mompalentahmo mian haha aijo' da mombee'i pokinde' da aha mokalaja ma'i-ma'ima' ka' molio anu bau pontumuu' nu aha.

¹³ Panyo komiu boli ma'osa na mombau anu ma'ima'.

¹⁴ Kugantang daagi' ko mian anu madi' mongka'oho' montuluti apaa na anu tinaloakonmo mami i uno nu sulat aiya. Obalaingati na mian anu sumo aijo', ka' boli mosangalu tiba ia da ia ma'ambang.

¹⁵ Panyo boli ahi' mombau ia sumo anu mompaha idek, ola ahi' opokinde'i na ia sumo samian na utus.

Potatae anu pupuusnyomo

¹⁶ Tumpu pinolengkatan nu ka'ima'anto. O amalakon hi Ia da saja' mombee'i komiu ka'ima'an i uno nu iwi-iwi' na han. O amalakon da Tumpu saja' monjagai to Utu-utus iwi-iwi'.

¹⁷ Salan do'angku i Paulus. Posi aku na nontulis bahagian sangga'at aiya. Aiyamo na tanda anu tinuliskumo iwi-iwi' i sulatku.

¹⁸ O amalakon da Tumpunto i Yesus Kristus mombalakati komiu Utus iwi-iwi'. Tabea' mami, I Paulus 6