2 TESALONIKA 2 - KITAB NU TUMPU ALLA LELE MA'IMAI'

Mian anu Ma'idek

¹ Mongkona katokaan nu Tumpunto i Yesus Kristus, ka' mongkona kita saidi' mae Nu pisihukmo da jojoongmo tiba Ia, aiyamo na anu ku poita sabole-bole hi komiu:

² Boli sampa-sampa' bingong kabai madi'mo sanang na kinyonyoa kalana ko lelemo i hongo tukoonyo sinaa po'ule'mo katokaan nu Tumpu Yesus tinokamo. Kugantang lele aijo' nolengkat mae i sa'angu' na lele anu jadi aiya mae i ahop, kabai lengkat mae i sa'angu' na ajalan; kabai ugaat daagi' ko anu notatae, tukoonyo kami toho'mo nontulis anu sumo aijo' i uno nu sala'sa'angu' na sulat mami.

³ Mau mule' mosiamo boli mompojohok mian mongakali komiu. Kalana ma'isa pe'e toka na Sinaa aijo', tionyo timbali na han aiya momonanyo: Da'isan na mian anu molalin i kapalesaya'an sangga'at, mompojalomo i Kristus; ka' Mian anu Ma'idek tinantukanmo minsoop i nalaka tokamo mae mompotoa butongnyo.

⁴ Kobubuunmo hondo na ia mongewa ka' mompuji' posi butongnyo molingkudui iwi-iwi' anu nu sombah nu mian, kabai iwi-iwi' na pilogot anu nu anggapmo nu mian Tumpumo nu aha. Pakalaus ia sumuhang i uno nu Laigan nu Tumpu, ka' mompoto'i tukoonyo iamo na Tumpu.

⁵ Boli okolilimi aku toho'mo nompoto'i iwi-iwi' aijo', tempo'nyo aku daagi' itina' hi komiu.

⁶ Ka' komiu nonsumbu'mo apaa na uuka aiya daagi' monsaduakon da ma'isa sida de iwi-iwi' aijo' kahanda'mo timbali. Tokaje i tempo' anu tinantukanmo nu Tumpu, Mian anu Ma'idek aijo' tokamo mae.

⁷ Kahosonan anu mombau ka'idekan aijo' nontampu'unimo nokalaja panyo daagi' sumo anu maninsuluk, ma'isa talalo nyata'. Saidi' mae de anu montahan o alinakonmo,

⁸ atina'je ka' kantoan na Mian anu Ma'idek aijo'. Saba' de Tumpu Yesus tokamo Iaje na mompatei Mian anu Ma'idek aijo' nu napas-Nyo anu lengkat mae i nganga'nyo, ka' mompateimo nu kalonyingkabannyo salaku tandanyo Ia tokamo.

⁹ Mian anu Ma'idek aijo' tokamo mae nu sa'angu' na kakuasa'an anu daka' lengkat hi Ibilis. Ia mompodaagi' iwi-iwi' na ngahan anu okabangangi ka' hahan anu madi' ko gampanyo, anu saja' mombaleko'i ka' mongakali.

¹⁰ Ia mompake iwi-iwi' na kapandean anu ma'idek bau pompobingong to mia-mian anu opateimo. Aha tionyo ahi' opateimo sabab madi' montalima ka' madi' mongka'ima'i lele anu totu'u lengkat mae hi Tumpu anu timbali momposalamat aha.

¹¹ Aijo' na sababnyo Tumpu mompotokamo hi aha sa'angu' na kuasa anu mompobingong, sahingga aha palesayamo hi apaa na anu madi' totu'u.

¹² Ahennyo iwi-iwi' na mian anu mongka'ima'i dosa' ka' anu madi' palesaya hi anu totu'u aijo' o hukumo.

Komiu opile'i da o posalamatmo

¹³ To Utu-utus anu nukalibosi nu Tumpu! Kami tionyo saja' mompoita talima kase hi Tumpu kalana komiu, kalana lengkat pe'e imoonanyo Tumpu nompile'imo komiu da o posalamat. Han aijo' jinadimo kalana Roh nu Tumpu na nokalaja hi komiu, da komiu timbalimo mian anu palesayamo hi Tumpu anu susi', ka' kalana komiu, pinalesayamo i lele anu totu'u lengkat mae hi Tumpu Allah.

¹⁴ Makisut aijo'na Tumpu nolagamo komiu, nontului Lele Ma'ima' anu pinoto'imo mami hi komiu. Tumpu nolagamo komiu, kalana Ia mongka'oho' da komiu hingga-hinggat mongoa'i mosia nakatalasanggoan nu Tumpunto i Yesus Kristus.

¹⁵ Mokonyo aijo' to Utu-utus tinjomo hoso-hoson ka' saja' toongi na to panga-pangajalan anu binee'mo mami hi komiu mau anu pinoto'i mau pe'e anu tinulis.

^16-17 O amalakon hi Tumpunto Yesus Kristus ka' Tumpu Tuumanto mongindeko' ka' mompohosonakon kinyonyoa miu da komiu timbali mongkalaja ka' mompolele apaa na anu ma'ima'. Kalana Tumpu mongkalibosi kita, ka' kalana kanonongan nu kinyonyoa-Nyo, Ia nompotimbalimo kita saja' sabaan ka' montaha'imani anu ma'ima'.