2 TAWARIKH 9 - KITAB NU TUMPU ALLA LELE MA'IMAI'

Tomundo boune i lipu' Syeba tinokamo mae

¹ Tomundo boune i lipu' Syeba nohongomo mae lele i Salomo anu tinalasanggomo. Sahingga ia nambamo mae i Yerusalem kahanda' monsobai i Salomo, ia nompokilawa han anu toto maha-mahan. Ia tinoka mae sinangaluan mae nu mian nanjoo' hondo, ka' unta anu pinaha posake'an mae manjoo' hondo na to lampa-lampa, batu mainan, ka' suele mosoni' manjoo' hondo. Salatan siningkabotmo tiba i Salomo, tomundo boune aijo' lewa'mo nompokilawa nga-ngahan nu han anu lewa'mo pinotutugakonnyo.

² Iwi-iwi' na anu pinokilawanyo aijo' tinaaman i Salomo, maumo ola sa'angu' madi' ko anu i nahan hi ia.

³ Tomundo boune aijo' nonsakisimo mosia na ko pandenyo na i Salomo. Ia nontoamo laigan nu tomundo anu binaumo i Salomo,

⁴ kata'atunan nu mian anu ko pangkatnyo na mokalaja i laigan nu tomundo, ka' baju' nu aha pokakana, ka' mule' laigan anu kajojoongan nu aha. Ia nontoamo kaanon anu pinotatu, ka' baju' nu to pangga-panggalima anu mongatun kaanon i babauon; ka' mule' ia nontoamo ngangahan nu koloban anu sinombahkon i Salomo i Laigan nu Tumpu. Iwi-iwi' aijo' nompobangangmo ka' nompojonomo mata i tomundo boune nu lipu' Syeba aijo'.

⁵ Sahingga ia notataemo hi Tomundo Salomo, “Iwi-iwi' na anu i hongongkumo kiijo' mae i lipu'ku mongkona belento Tuan ka' kapandean nu Belento Tuan, taalu' totu'u ahi'!

⁶ Momonanyo aku madi' nompalesaya, panyo salatan aku tinokamo aiya ka' posi matamo nu ubaku na nontoa iwi-iwi' aiya, atina'je ka' pinalesayangkumo totu-totu'u. Sabenannyo iwi-iwi' na anu i hongongkumo ma'isa montokai mintonga' na bagian apaa na anu tinoangkumo uuka aiya. Jadi kapandean ka' kakaya'an nu Belento Tuan daagi' kanjoo'annyo na daagi' hi belento molingkudui apaa na anu sinisikmo hi belengku.

⁷ Untung ahi' hondo na to mia-mian anu ko pangkatnyo, anu montuluti palentah ka' saja' mokalaja hi Tuan, sahingga timbali mohongo hi belento Tuan iwi-iwi' na pangajalan anu mompopande!

⁸ O puji' na Tumpu, Tumpu Allah nu Belento Tuan. Nohangkatmo belento tomundo' tinimbali tomundo, da mompalentah kalana sanggo-Nyo, Ia nompotoamo hi belento tuan mosia na Ia sinanangmo hi belento Tuan. Kalana Ia mongkalibosi mian Israel ka' mongkahanda'i da aha sabole-bole ahi sa'angu' na bansa, sahingga Ia nohangkatmo belento Tuan binau tomundo nu aha, da belento Tuan sabole-bole ahi montoongi atulan ka' ka'adilan.”

⁹ Lapas aijo' tomundo boune nu lipu' Syeba aijo' nombee'mo hi Salomo palasen mosoni' anu binoanyo mae molabi 400 na kilogram na mosoni', ka' mule' batu mainan ka' to lampa-lampa manjoo' hondo. Madi'mo toho' i Salomo nohumpak to lampa-lampa anu sumo aijo' na ko'ima'nyo susumo anu binee'mo i tomundo boune nu lipu' Syeba aijo', hi ia. (

¹⁰ Mian anu sinai mae i Tomundo Hiram ka' mian anu sinai mae i Tomundo Salomo nomboa mae mosoni' i Salomo lengkat i Ofir, suele nomboamo mae batu mainan ka' kau' sondana.

¹¹ Kau' aijo' binaumo i Salomo ojan i Laigan nu Tumpu ka' i laigan nu tomundo anu bau kajojoongannyo, ka' mule' obau kasapi ka' gambus anu o kuti' nu to mia-mian manyanyi. Ma'isa toho' ko anu sumo aijo' i lipu' Yehuda.)

¹² Misa' ola palasen susumo anu biasanyo nu bee' i Salomo salaku bau pombalosi, panyo i Salomo suele ahi' nombee'imo i tomundo boune nu lipu' Syeba aijo' iwi-iwi' na anu pinoitanyomo. Lapas aijo' ninsusule'mo na tomundo boune aijo' i lipu'nyo tiba aha iwi-iwi na anu nonsangaluimo mae.

Kakaya'an i Tomundo Salomo

¹³ Sataun toka sataun i Tomundo Salomo mohumpak mosoni' mongohani 23.000 na kilogram,

¹⁴ ma'isa minsoop na to hasi-hasin anu o'ala hi to daga-dagang anu toto daka-daka' ka dagang anu olaje babanggan. To Tomu-tomundo nu aha Arab tiba gubolonun-gubolonun nu aha Israel suele nombee'imo mosoni' ka' salaka hi ia.

¹⁵ I Salomo nombaumo kanta daka' mosoni' na tinutuk 200 na kilogram na konjoo'nyo. Mosoni' anu pinake binau kanta toto sa'angu' kila-kila 7 na kilogram.

¹⁶ Ia mule' nombaumo 300 na kanta mosoni' anu lebe ise'. Mosoni' anu pinake hi toto sa'angu' na kanta ise-ise' aijo' kila-kila 3 na kilogram, iwi-iwi' mosoni' na tinutuk. Kanta haha aijo' pino'una'nyo i sa'angu' na tampat anu osanggohi Balai Alas Libanon.

¹⁷ I Tomundo mule' nombaumo sa'angu' na kadela nu kalaja'an anu daka', sae nu gaja na binau ka' binuga-bungaan nu mosoni' anu madi' ko galo'nyo.

¹⁸ Kadela aijo' ko limanyo ka' poti-potimbiha' ko patongnyo singa. Kadela aijo' pinokonan ojannyo ka' langku-langku'nyo anom, ka' sa'angu' na panintumpuan nu tengke anu i lapisan nu mosoni'. Panintumpuan nu tengke aijo' sinaimbau-baumo tiba kadelanyo aijo'.

¹⁹ I puusnyo nu kowi ka' puusnyo nu koanan toto sa'angu' na langku-langku' i ojan nu kadela aijo' ko patongnyo singa – iwi-iwi' sampulu' ka' ohua'. Madi' ko kadela anu sumo aijo' i kalaja'an sangga'at maumo pa' iya mae.

²⁰ Iwi-iwi' na pakakas anu bau ponginuman i Salomo mosoni' na binau, ka' iwi-iwi' na pakakas anu pino'una' i Balai Alas Libanon suele mosoni' anu madi' ko galo'nyo na binau. Daagi' tempo'nyo i Salomo, salaka o'anggap madi' ko olinyo.

²¹ Manjoo' na kapan i Salomo anu toto daka-daka' talabut i ndalangon anu ewa hondo hingga-hinggat tiba to kapa-kapan i Tomundo Hiram. Toto totolu' na taun minsan mae na kapan haha aijo' minsusule' mae momboa mosoni', salaka, sae nu gaja, balan ka' tomonsi' merak.

²² I Tomundo Salomo kaya hondo ka' mule' pande hondo, molingkudui to tomu-tomundo maumo pa' iya mae anu i dunia aiya.

²³ Iwi-iwi' na tomundo ko kahanda' mamba singkabot tiba i Salomo ola mohongo pangajalan anu mompotimbali da pande, anu binee'mo nu Tumpu Allah hi ia.

²⁴ Aha toto samian toka mae ka' momboa mae palasen anu obee' hi Salomo. Aha mombee' to bala-balang mosoni', salaka, pakean, toongon anu bau pahampate, to lampa-lampa, ajahan ka' bagal. Sumo aijo' sataun toka sataun.

²⁵ I Tomundo Salomo suele ko pangkun nu ajahan ka' kareta 4.000 na pangkun. Ajahan anu bau pahampate 12.000 na konjoo'nyo. Sambagian pino'una'nyo i Yerusalem ka' labinyo sangga'at i to kota-kota' anu pompo'una'annyo to kare-kareta anu opake mahampate.

²⁶ Ia mongkuasai to tomu-tomundo anu i da'erah lengkat pe'e mae i Kaunyo Efrat toka-toka i lipu' nu aha Filistin ka' potempasan tiba Mesir.

²⁷ Tempo'nyo i Salomo nompalentah, salaka sumomo balang biasa kiijo' i Yerusalem pokanamo batu ka' kau' lontio' i Libanon manjoo' hondo, pokakanamo kau' ara biasa.

²⁸ I Salomo nompotoka mae ajahan lengkat i Mesir ka' lengkat mae i lipu' sangga'at.

Sisikon tempo'nyo i Salomo nompalentah kinodo'anmo

²⁹ Sisikon sangga'at mongkona i Salomo lengkat pe'e momonanyo sampe tinoka i puusnyo tinulismo i uno nu kitab Sisikon i Nabi Natan ka' i uno nu kitab sisikon anu lewa'mo pinoto'i i Ahia mian nu Silo, ka' i uno nu kitab apaa na anu pinoto'imo i Nabi Ido, anu suele nontulismo sisikon mongkona i Yerobeam tomundo nu Israel.

³⁰ Pinatompulu' na taun na kinopinnyo na i Salomo nompalentah i Yerusalem nongkuasai songko-songko na Israel.

³¹ Lapas aijo' ia sinilakamo ka' i lamunmo i kota' Daud. Lantas i Rehabeam anaknyo momo'ane i hangkatmo binau tomundo nombolosakon ia.