2 TAWARIKH 8 - KITAB NU TUMPU ALLA LELE MA'IMAI'

Kalaja anu binaumo i Salomo

¹ I Salomo nombau Laigan nu Tumpu ka' laigan nu tomundo kinopinnyo inguampulu' na taun.

² Kota iwi-iwi' anu binee' i Tomundo Hiram hi ia po'ule'mo binaunyo, lantas pinoto'inyomo na mian Israel da jojoongmo i kiijo'.

³ Ia nompatundu'mo ka' nongalamo da'erah Hamat ka' Zoba.

⁴ Ka' lebemo nompohoson kota' Tadmor anu kiijo' i padang mateges, lantas po'ule' mule' nombau kota pompo'una'an anu o kaan kiijo' i Hamat.

⁵ Kota Bet-Horon anu aita mae i Buannyo ka' Bet-Horon anu akaong mae i Aluknyo po'ule'mo binau kota' anu ko bentengnyo ka' binauan Sabatan daka' anu ko supatnyo mahoson hondo.

⁶ Ka' suele kota' Baalat po'ule'mo binau ka' iwi-iwi' na kota' anu bau pompo'una'an anu o kaan, ka' mule' iwi-iwi' na kota bau pompo'una'an kareta ka' ajahan anu mohela', anu opake mahampate. Iwi-iwi' na anu pinopikilakonnyomo obau i Yerusalem, Libanon ka' songko-songko na da'erah kakuasa'annyo binaunyomo.

^7-8 Iwi-iwi' na lee' mae nu aha bansa Kana'an anu madi' pinoko ala pinatean ingko-ingkot nu mian Israel tempo'nya aha nonjojoongimo lipu' aijo' ingatunmo i Salomo mombau pakalajaa'an ka' opakisa. Aha mian nu Het, Amori, Feris, Hewi ka' Yebus. Sampe tempo' uuka aiya lee' mae nu aha daagi' saja' binau posaihon.

⁹ Mian nu Israel madi' obee'i pakalaja'an anu opakisa; aha binee'an kalaja timbali suludadu, biasa, suludadu anu toto tangka-tangkas napangkatnyo, kapala nu anu monsake'i kareta pahampate ka' suludadu anu monsake'i ajahan.

¹⁰ Ua'atu ka' limampulu' na mian anu ko pangkatnyo na mongatun to mia-mian anu binee'an kalaja opakisa iyaya mae na kalaja anu obau.

¹¹ I Salomo nolalinmo bengkele'nyo, anak nu tomundo Mesir lengkat i Kota' Daud binoamo i laigan anu binaumo da bau pompojoongan ia. Kalana tinutugan i Salomo, “Bengkele'ku madi' timbali jojoong i laigan nu tomundo anu kikinajojoongan i Daud tomundo nu Israel, kalana iwi-iwi' na tampat anu toho'mo pinompo'una'an Peti' Palajanjian aijo' susi'.”

¹² I Salomo nonsombahkonmo koloban anu opotunu hi Tumpu i mezbah anu binau i ahop nu Laigan nu Tumpu.

¹³ Koloban haha aijo' sinombahkonnyomo susumo koonyo nu Atulan i Musa de tokamo i sinaa molamean: sinaa nu Sabat, sinaa molame'akon Bitu'on Bu'ou, ka' kototolu'nyomo lamean anu obau sataun toka sataun, aijo'mo sinaa nu lamean Roti Madi' ko Raginyo, sinaa nu lamean mongalamo isi nu ale', ka' sinaa nu lamean Tahop O'atopi nu Hon nu kau'.

¹⁴ Susumo koonyo nu atulan i Daud tuumanyo, i Salomo nongatunmo anu obau sansina-sinaa nu aha to ima-imam ka' aha mian nu Lewi anu tionyo ahi monyanyiakon nyanyian pompuji-puji' Tumpu ka' montulungi to ima-imam de mokalajamo monsombah Tumpu. Ka' suele to mia-mian anu monjagai Laigan nu Tumpu binaginyomo toto santompuk na anu monjagai sa'angu' na sabatan daka' susumo anu tinantukanmo i Daud posaihon nu Tumpu Allah.

¹⁵ Iwi-iwi' na anu pinoto'imo i Daud hi to ima-imam ka' hi mian nu aha Lewi mongkona iwi-iwi' na gudang ka' sansangga'atannyo tinulutannyomo ima-ima'.

¹⁶ Jadi iwi-iwi' tinimbalimo na kalaja anu pinopikilakonnyomo i Salomo. Iwi-iwi' na kalaja, lengkat pe'e nomposadia mesen pompotinjoan laigan, sahingga Laigan nu Tumpu tinimbalimo binaumo ma'i-ma'ima'.

¹⁷ Lapas aijo' i Salomo nambamo i Ezion-Geber ka' i Elot, aijo'mo na to kota-kota labuan i biwi nu ambai Luoknyo nu Akaba i lipu' Edom.

¹⁸ I Tomundo Hiram nompalentahmo da oboa na to kapa-kapan anu pinojalan nu posi mian i Hiram tiba to mia-mian sangga'at anu pandemo na mokalaja i kapan. Aha tinalabutmo namba i Lipu' Ofir tiba to mia-mian i Salomo ka' nongalamo kiijo' mae mosoni' 15.000 na kilogram, lantas binoamo mae nu aha hi Salomo.