2 TAWARIKH 7 - KITAB NU TUMPU ALLA LELE MA'IMAI'

Nomposawe'imo Laigan nu Tumpu

¹ Noko lapas na i Tomundo Salomo binalado'a, apu nintatau'mo lengkat mae i langit ka' nontoyo'imo iwi-iwi' na koloban anu sinombahkonmo hi Tumpu. Lantas jingka salaku tanda Tumpu tinokamo, Laigan nu Tumpu aijo' najingkamo songko-songko,

² sahingga to ima-imam madi'mo noko ala ninsoop.

³ Salatan mian da'isan aha Israel nontoamo apu nintatau'mo lengkat mae i langit ka' jingka salaku tanda Tumpu tinokamo ka' nonjingkaimo Laigan nu Tumpu songko-songko, aha tinolodadupumo i salo lantas nonsombah ka' nompuji' Tumpu Allah, kalana ia manonong ka' kalibosannyo sampe toka sidu-sidutu'.

⁴ Lapas aijo' i Tomundo Salomo tiba mian iwi-iwi' anu sinihukmo i kiijo' nonsombahkonmo koloban hi Tumpu.

⁵ Koloban bau pompodame sinombahkon i Salomo 22.000 na sapi', ka' 120.000 na domba. Sumo aijo' na i Tomundo ka' mian da'isan iwi-iwi' nombau lamean salaku tanda laigan anu bau ponsomban Tumpu binee'mo hi Tumpu.

⁶ To ima-imam tinuminjomo i tampat anu tinantukanmo hi aha; mompaha ahop tiba mian nu aha Lewi anu mompuji' Tumpu mompake musik anu binau i Tomundo Daud, ka' onyanyiakon nu nyanyian, “Kalibosan-Nyo Sampe toka sidu-sidutu'!” Susumo anu pinoto'imo i Daud. To ima-imam mompuhi tolompet hau-haunyo mian da'isan iwi-iwi' samantala tinjo-tinjo.

⁷ Lantas popasan bahagian totonga'nyo anu sasu ahop nu laigan ponsomban Tumpu aijo' binee'mo i Salomo hi Tumpu. Lapas aijo' ia nonsombahkonmo kiijo' koloban anu opotunu, koloban gandum ka' lompo' nu binatang anu bau koloban pompodame. Iwi-iwi' aijo' sinombahkonnyomo kiijo' kalana mezbah tambaga anu binaunyomo talalo ise' de iwi-iwi' aijo' osain sombah-sombahkonmo kiijo'.

⁸ I Salomo ka' iwi-iwi' na mian Israel nolame'akonmo Lamean, Tahop O'atopi nu Hon nu kau' kinopinnyo pinitunsinaa. Manjoo' hondo na mian anu sinihuk molame'akon. Aha tinoka lengkat mae i da'erah da'erah, anu majo'on hondo sasu utara jalan mokiijo' i Hamat toka-toka i potempasan tiba Mesir sasu selatan.

⁹ Pinitun sinaa na aha jinojoong nolame'akon mezbah nu Tumpu pininsasawe'an, lapas aijo' pinintun sinaa mule' na nolame'akon Lamean Tahop oatopi nu Hon nu kau'. I Sinaa kinamingkotannyomo binaumo na lamean anu pinontuduinyomo,

¹⁰ ka' dodo-dodopnyo, i tanggal bitu'on anu ko popitu'nyomo pinokaumo i Salomo na mian haha aijo' da minsusule'mo. Aha i lame'mo hondo kalana iwi-iwi' apaa na anu ma'ima' binaumo nu Tumpu hi bansa Israel mian anu pinalesayamo hi Ia, hi Daud ka' hi Salomo.

Tumpu nanintoa mule' hi Salomo

¹¹ Salatan Laigan nu Tumpu ka' laigan nu tomundo pinoko potimbalimo i Salomo susumo anu pinopikilakonnyomo,

¹² Tumpu po'ule' mule' nanintoa hi ia pihi-pihi. Tumpu notataemo hi ia, “Do'a nu beleyum i hongongkumo ka' Ku alamo na laigan aiya salaku tampat anu samata-mata bau ponsombahkonan koloban hi belengku.

¹³ De madi' Ku tudunakon na ujan kabai monsai mae kihi-kihi' da mongingkoti isi nu ale' kabai mompotoka mae panyakit anu molele hi mian anu pinalesayamo hi belengku,

¹⁴ lantas mian anu pinalesayamo hi belengku anu saja' monsanggo sanggongku, mangakumo kasala'an, ka' balado'amo ka' mule' tokamo hi belengku, ka' madi'mo mombau kalakuan nu aha anu toto ide-idek, saba' kiita' mae i suluga' Ku hongo mae na do'a nu aha. Ku ampunimo na dosa' nu aha haha aijo' ka' mompotimbalimo mule' lipu' nu aha bilahi.

¹⁵ Aku saja' mae mompalahatikan Laigan-Ku aiya ka' saja' mae mohongo do'a nu aha iwi-iwi' anu nupotoka mae nu aha lengkat i tampat aiya.

¹⁶ Iwi-iwi' aijo' tionyo ahi ku bau kalana tampat aiya pinile'an-Kumo ka' tinantukan-Kumo bau samata-mata timbali tampat ponsomban Aku sampe toka sidu-sidutu'. Aku sabole-bole mompalahatikan ka' monjagai sampe toka sidu-sidutu'.

¹⁷ De beleyum sumo i Daud tuuma nu beleyum, tumuu' mombatuki pongka'oho'-Ku ka' tulu-tulutan hi to atu-atulan-Ku ka' mule' saja' mombau anu Ku palentahkon iwi-iwi' hi beleyum,

¹⁸ saba' Aku mongganapimo apaa na anu jinanji'-Kumo hi tuuma nu beleyum i Daud, aijo'mo tionyo ahi saja' ko lee'nyo samian na anu o hangkat timbali tomundo' nu Israel.

¹⁹ Panyo de beleyum ka' mian nu beleyum molanggaimo to atu-atulan ka' anu Ku palentahkon iwi-iwi', ka' mule' monsombahmo to pilo-pilogot sangga'at,

²⁰ saba' ku sabatakonmo na belemiu da bolimo jojoong i lipu' anu binee'-Kumo hi belemiu. Ka' mule' Ku pala'imo na laigan aiya anu tinantukankumo bau tampat ponsomban Aku. Toka-toka pa' iyaya mae saja' o'alu ka' okokojoi na laigan aiya.

²¹ Laigan ponsomban Aku aiya, tempo' uuka aiya o'angga'i hondo, panyo de jadi na anu kokoong-Ku aijo' saba' batu-batu mian anu motulu i kiijo' bangangmo na montoa. Aha motataemo, ‘Kadaka' Tumpu nombaumo lipu' ka' laigan aiya sumo aijo'?’

²² Lantas nu taamimo nu mian, ‘Kalana aha nohikumo Tumpu, Tumpu Allah nu aha, anu nolaya'mo mae mompolee' nu aha nosabat lengkat mae i Mesir. Aha nonsombahmo ka' nojanji'mo da tulu-tulutanmo hi to pilo-pilogot sangga'at. Mokonyo aijo' Tumpu nompotokamo mae balaa' susumo aiya hi aha.’ ”