2 TAWARIKH 4 - KITAB NU TUMPU ALLA LELE MA'IMAI'

Posadiaon pakakas bau Laigan nu Tumpu

¹ I Tomundo Salomo nombaumo sa'angu' na mezbah tambaga komantannyo ka' ko bolanyo pokakana 9 na meten ka' ko tangkasnyo 4,5 na meten.

² Ia mule' noki baumo sa'angu' na kuhon tambaga timpodon, sukatan nu kodaka'nyo sumo uuka: ko lengnyo 2,2 na meten, ko bolanyo nu nganga'nyo 4,4 na meten, ka' sukatannyo titikub 13,2 na meten.

³ Titikup aita i biwinyo nu nganga'nyo binunga-bungaan nu gambalan sapi' pinaha pobebe' toto ohua' anu sinaim bau-baunyo salatanmo pe'e kuhon aijo' binau.

⁴ Kuhon aijo' pinokoko i hiku nu sapi' tambaga sampulu' ka' ohua' – totolu' mo'ahop sasu utara, totolu' sasu selatan, totolu' sasu kinsoban, totolu' sasu kabete'an.

⁵ Ko butolunyo nu kuhon aijo' 75 na milimeten. Biwinyo pokakana sumo biwi nu sasangkin tontupeak sasu sambiha'nyo gio-gio' sumo bunga bakung anu timbokamo. Kuhon aijo' isinyo de o'isi uee kila-kila 60.000 na liter.

⁶ I Tomundo Salomo mule' noki bau 10 na mangko anu daka' hondo olima' opokoko sasu selatan i Laigan nu Tumpu, ka' olima' mule' opokoko sasu utaranyo. Mangko' haha aijo' ma'ananyo pombaso'ian padotan nu binatang anu opotunumo salaku koloban. Uee anu i uno nu kuhon daka-daka' aijo' pinotouka da bau pimbaso'an butong nu aha to ima-imam.

^7-8 Ia noki bau mule' sampulu' na tengke nu sulu' mosoni' na binau montiho sonto' anu lewa'mo pinopikilakon, ka' 10 na meja'. Iwi-iwi' na tengke nu sulu' ka' 10 na meja' haha aijo' pinokoko i uno nu Salipi' anu o'angga'i i Laigan nu Tumpu – toto olima', sasu kowi olima', ka' olima' mule' i sasu koanan. Pinoki baunyo mule' 100 na mangko' mosoni'.

⁹ I Tomundo Salomo mule' noki bau sa'angu' na popasan anu i unonyo da bau kolalajangan nu to ima-imam, ka' mule' sa'angu' na popasan anu i sambiha'nyo. Tumban i sabatan toto daka-daka', i olot nu ohua' na popasan aijo' i lapisan nu tambaga.

¹⁰ Kuhon daka-daka' aijo' pinokoko, koko susunyo sasu tenggara i Laigan nu Tumpu.

^11-16 I Huram, anu mongkapalai kalaja haha aijo', nombaumo to pamu-pamutu', to siko-sikop ka' to mangko-mangko'. Sahingga iwi-iwi' singkapmo binaunyo na talakonan nu Laigan nu Tumpu susumo anu jinanji'nyomo hi Tomundo Salomo. Aiya na talakonan ka' pakakas anu binaunyomo aijo: Ohua' na ohi' anu daka' Ohua' na dompong nu ohi' anu sumo mangko anu pinokona aita' i tuu'nyo nu ohi' aijo' ohu-ohua'. Anyaman susumo lante' aita i dompong, toto sa'angu' na ohi' 400 na anu susumo bua' nu dalima tambaga na binau pinaha pojiji' toto ohua' i lante' susumo anu inganyam aita' i dompong nu ohi' toto sa'angu' 10 na kareta 10 na mangko' anu daka' Kuhon tambaga 12 na sapi' tambaga anu monsu'un kuhon aijo' To pamu-pamutu', to siko-sikop ka' sindu' sobang Iwi-iwi' na talakonan ka' pakakas anu binaumo i Huram obee' hi Laigan nu Tumpu, tambaga na binau ka' ginegesmo sampe jinongkilaban. Iwi-iwi' aijo' binau i Huram pokakana sumo anu pinalentahkonmo i Tomundo Salomo.

¹⁷ I Tomundo Salomo noki bau talakonan ka' pakakas haha aijo' kiijo' mae i tampat pontutukan mosoni', salaka ka' tambaga i olot nu Sukot ka' Zereda i Bangka'nyo nu Yordan.

¹⁸ Talakonan ka' pakakas haha aijo' manjoo' hondo sahingga mau samian madi' monsumbu' pa' sangkuka na kilogram na tambaga pinake.

^19-22 I Tomundo Salomo noki bau mule' pakakas sangga'at mosoni' anu madi' ko galo'nyo na binau anu opake i Laigan nu Tumpu. Aiya na pakakas anu binaumo aijo': Mezbah Meja' popotimpasan roti anu osombahkon Iwi-iwi' na tengke nu sulu' ka' tibamo sulu'nyo mosoni' anu jongkilaban hondo na tinutuk da otutungi i ahop nu Salipi' anu Talalo hondo Susi' susumo anu pinopikilakonmo. Pinombunga-bungai tiniho sumo bunga-bunga. Iwi-iwi' na sulu' Dadapit Pakakas bau pompobelesi' sumbu nu sulu' Iwi-iwi' na mangko' Iwi-iwi' na lean pompo'una'an kamangian Iwi-iwi' na lean pompotimpasan oba Iwi-iwi' na tumban pinsoopan mokiijo' i Laigan nu Tumpu ka' tumban nu Salipi' anu Talalo hondo Susi' ilapisan nu mosoni'.