2 TAWARIKH 34 - KITAB NU TUMPU ALLA LELE MA'IMAI'

I Yosia tomundo nu Yehuda

¹ I Yosia umunnyo 8 taunmo tempo'nyo aitu ia tinimbalimo tomundo nu Yehuda, ka' ia nompalentahmo i Yerusalem 34 na taun na kinopinnyo.

² Ia nombaumo anu momposanang kinyonyoa nu Tumpu; ia nombatukimo sonto' i Tomundo Daud mompolee'nyo mae ka' nontulutimo iwi-iwi' atulan nu Tumpu Allah totu-totu'u.

I Yosia madi'mo nompobee' monsombah pilogot

³ Salatan 8 taunmo na tinimbali tomundo, tempo'nyo aitu umunnyo ma'isa talalo motu'a, i Yosia nonsombahmo Tumpu Allah anu nusombah i Tomundo Daud mompolee'nyo. Salatan 4 taunmo na ia nompalentah ia nontampu'unimo lewa' nongidei iwi-iwi na tampat anu ponsomban pilogot, iwi-iwi na patong Pilogot boune Asyera ka' mule' tampat bapilogotan sangga'at.

⁴ Patong ka' bapilogotan haha aijo' ingideanmo nu suludadu i Yosia lantas abu'nyo kinakambuhakonmo nu aha i pinolamunan to mia-mian anu nonsombahkonmo koloban hi to pilo-pilogot haha aijo'. Sinin na mezbah nu Baal ka' mezbah pompapuan kamangian anu daagi' i kiijo' i hobo'akonmo nu aha.

⁵ Lapas aijo' pinapuanmo i Yosia aijo' i mezbah na buku nu to ima-imam anu nontulutimo atulan nu pilogot haha aijo'. Tiba jalan anu binaumo sumo aijo' Yehuda ka' Yerusalem po'ule'mo nonsombah Tumpu.

⁶ Han anu poka kana sumo aijo' suele binaunyo mule' i to kota-kota ka' to da'e-da'erah anu na'idekmo i da'erah Manasye, Efraim ka' Simeon, toka-toka i Naftali sasu Utara.

⁷ Iwi-iwi na mezbah ka' to pato-patong Asyera anu i songko-songko na Kalaja'an sasu Utara i hobo'akonmo i Yosia, lantas to pato-patongnyo ka' iwi-iwi' na mezbahnyo anu pompapuan kamangian pinahan ideannyomo. Lapas aijo' i Yosia ninsusule'mo namba i Yerusalem.

Kitab nu to Atu-atulan nu Tumpu po'ule'mo i humpak

⁸ I taun ko sampulu'nyomo ka' ualu' na i Yosia nompalentah, nokolapas na ia lewa'mo nongalini bapilogotan madi'mo ko anu nonsombah kiijo' i Laigan nu Tumpu ka' songko-songko na lipu', ia nonsaimo mian aha totolu' da mompokopiani Laigan nu Tumpu Allah. Aha totolu' na mian haha aijo' atina'mo: i Safan anak i Azalya, i Maasyea gobolonun nu Yerusalem, ka' i Yoah anak i Yoahas, mian anu ko pangkatnyo matangkas.

⁹ To mia-mian nu Lewi anu monjaga Sabatan Laigan nu Tumpu, nombee'mo hi Imam Daka' Hilkia, doi anu i limu'mo nu aha. Doi aijo' lengkat mae hi mian nu Efraim ka' Manasye, ka' lengkat mae hi mian da'isan sangga'at anu i Kalaja'an Utara, ka' mule' lengkat mae hi mian da'isan nu Yehuda, Benyamin ka' Yerusalem.

¹⁰ Lapas aitu doi aijo' binee'mo i Imam Daka' Hilkia hi mian aha totolu' aijo' anu binee'an kalaja monjagai kalaja mompokopiani Laigan nu Tumpu aijo'. Lantas doi aijo' binee'mo nu aha mule',

¹¹ hi to tuka-tukang kau' ka' tukang mombau Laigan, anu tionyo ahi' mongoli batu ka' kau' bau pompokopiani laigan toto daka-daka' anu na'idekmo kalana pinojohokmo nu to tomu-tomundo Yehuda.

¹² To mia-mian anu mokalaja mompokopiani aijo', totu-totu'u madi' baleko'. Anu mongkapalai aha 4 na mian nu Lewi: i Yahat, tiba i Obaja, aha mae sa'anakan i Merari, ka' suele i Zakharia tiba i Mesulam aha sa'anakan mae i Kehat. To mia-mian nu Lewi anu pande mahaik musik,

¹³ binee'anmo kalaja monjagai anu mohangkat ka' mongato to bala-balang, mongkapalai anu mokalaja i ngangahan nu kalaja, timbali julutulis ka' monjagai sabatan.

¹⁴ Tempo'nyo doi anu i limu' hi mian da'isan aijo' sinabatakonmo i pinompo'una'an, i humpakmo i Hilkia na kitab Atulan nu Tumpu, aijo'mo to atu-atulan anu binee'mo nu Tumpu Allah hi Musa.

¹⁵ Pinoto'imo i Hilkia hi Safan, “Aku nohumpak Kitab Atulan nu Tumpu i Laigan nu Tumpu,” lantas binee'nyomo na kitab aijo' hi Safan.

¹⁶ Ingala i Safan na kitab aijo' lantas nambamo hi tomundo ka' nompoto'i, “Iwi-iwi' na anu pinalentahkonmo nu Belento Tomundo binaumo mami.

¹⁷ Ingalamo mami na doi anu pino'una' i Laigan nu Tumpu, ka' binee'mo hi to mia-mian anu mokalaja ka' hi to mia-mian anu mongkapalai ka' monjagai kalaja aijo'.”

¹⁸ Lapas aijo' pinoto'inyo mule', “I Hilkia nombee'mo mae kitab aiya hi belengku.” Lantas binasa'mo i Safan da nuhongo i tomundo.

¹⁹ Salatan nohongomo onyi'nyo nu kitab aijo', binea-beakmo i tomundo na baju'nyo kalana sinusa'mo na kinyonyoanyo.

²⁰ Lantas pinalentahmo i tomundo na i Hilkia, i Ahikam anak i Safan, i Abdon anak i Mikha, i Safan julutulis nu negara tiba i Asaya anu saja' monsangalui i tomundo,

²¹ “Lako' mamba pokilawa hi Tumpu na aku aiya pa' mosia ka' suele pa' mosia na to mia-mian anu daagi' kiijo' i Yerusalem ka' i Yehuda mongkona isi nu kitab aiya. Tumpu nontambuha'imo kita kalana mompolee'to madi'mo nombau iwi-iwi na palentah anu tuli-tulis i kita aiya.”

²² Lantas nambamo na i Hilkia, i Ahikam, i Abdon, i Safan tiba i Asaya, mompokilawa hi samian na boune sanggonyo i Hulda pa' mosia na koonyo. Ia nabi jojoong i kampung anu sala'je binau kiijo' i Yerusalem. Langkai'nyo sanggonyo i Salum anak i Tikwa makumpu i Harhas. Ia na anu lewa' mongulus baju' opusok de monsombahmo Tumpu i Laigan nu Tumpu. Salatan i Hulda nohongo mo anu tinutuhakon nu aha,

²³ sinainyomo na aha ninsusule' hi tomundo ka' nompoto'i potuunonnyo sumo uuka, “Tumpu, Tumpu Allah anu nusombah nu mian Israel nompoto'imo,

²⁴ ‘Aku mohukumo Yerusalem, ka' iwi-iwi' na mian anu jojoong i kiijo' nu pongkutuki anu tuli-tulis i kitab aijo', anu binasa'mo i tomundo.

²⁵ Aha nohikumo aku ka' nonsombahkonmo koloban hi iwi-iwi na pilogot nu aha. Iwi-iwi' na anu binaumo nu aha nomposumongkelekmo aku. Aku pinusamo hi Yerusalem ka' pusang-Ku aijo' madi'mo Ku poko intim.

²⁶ Panyo toka hi Tomundo Yosia, sumo uuka na potunonku, Tumpu Allah Israel: Salatan i hongomo nu beleyum apaa na tuli-tulis i kitab aiya,

²⁷ beleyum nompele-pele'mo ka' nagakumo kasala'an i ahopku. Aku nompopobuhukmo Yerusalem tukoongku Ku hukumo na Yerusalem ka' mian anu jojoong i kiijo', panyo salatan beleyum nohongomo anu pinompobuhuku-Ku aijo' beleyum i humangmo ka' nombea-beakmo baju' nu beleyum salaku tanda sinusa'mo na kinyonyoa nu beleyum,

²⁸ kalana aijo' hukuman anu Ku pokona i Yerusalem madi'mo Ku pokona de daagi' beleyum hau-haunyo tutuu'. Beleyum Ku pobee'je silaka ma'i-ma'ima'.’ ” Jadi po'ule'mo namba hi tomundo na mian haha aijo' anu sinainyo mae namba hi Hulda ka' nompoto'imo potuunon i Hulda aijo'.

I Yosia nombaumo palajanjian tulu-tulutanmo hi Tumpu

²⁹ I Tomundo Yosia nolagamo iwi-iwi' na to pola-polaya' nu Yehuda ka' Yerusalem,

^30-31 lantas nambamo tiba aha i Laigan nu Tumpu. Ka' suele to ima-imam nambamo hingga-hinggat tiba aha, mian nu Lewi ka' iwi-iwi' na mian da'isan mau anu kasiasi kabai anu kaya. I Ahop nu aha iwi-iwi', koko usoi anu lewa' katinjoan nu tomundo, i tomundo tinuminjomo ka'binasa'nyomo hoso-hoson na kitab anu ko isinyo palajanjian anu i humpakmo i uno nu Laigan nu Tumpu. Lapas aijo' i tomundo nombaumo palajanjian hi Tumpu da tulu-tulutanmo hi Tumpu ka' mombaumo totu-totu'u palentah nu Tumpu lengkat i kinyonyoanyo anu sahondo-hondonyo, ka' iwi-iwi na atulan, tiba mule' mongganapimo apaa na anu jinanji'mo nu mian anu pinalesayamo hi Tumpu susumo anu tinulismo i kitab aijo'.

³² Iwi-iwi' na mian nu Benyamin ka' iwi-iwi' na mian sangga'at anu kiijo' i Yerusalem pinalentahnyomo da mojanji' tulu-tulutanmo iuno nu palajanjian aijo'. Sahingga to mia-mian nu Yerusalem haha aijo', nontulutimo iwi-iwi na atulan anu iuno nu palajanjian aijo', aijo'mo palajanjian nu aha hi Tumpu Allah mompolee' nu aha.

³³ To pilo-pilogot anu toto henyu-henyu anu kiijo' i iwi-iwi na tampat anu minsoop da'erah nu Israel, iwi-iwi' ingideanmo i Tomundo Yosia. Lantas pinokemannyomo da iwi-iwi' na mian monsombahmo Tumpu, Tumpu Allah nu mompolee' nu aha. Sahingga tempo'nyo i Yosia daagi' tutuu', mian da'isan saja'mo sabole-bole tinulu-tulutan hi Tumpu.