2 TAWARIKH 30 - KITAB NU TUMPU ALLA LELE MA'IMAI'

Nomposadiamo molame'akon Paskah

^1-5 Molame'akon Paskah ma'isa nupoko ala nu mian da'isan na mombau i bitu'on momona, kalana to ima-imam anu nomposusi'mo butongnyo ma'isa da'isan daagi' talalo sangkiding na sinihuk i Yerusalem. Kalana aijo' i Tomundo Hizkia ka' to mia-miannyo anu ko pangkatnyo ka' mule' mian anu jojoong i Yerusalem sinangaja'mo da molame'akon Paskah aijo' i bitu'onje ko ohua'nyo, ka' mule' aha iwi-iwi' sinanangmo na nohongo tanga'an aijo'. Lantas i tomundo nompakatumo sulat toka hi iwi-iwi' mian, songko-songko Israel ka' Yehuda. Ka' mule' toka hi mian Efraim tiba Manasye. Iwi-iwi' na bansa Israel lengkat pe'e mae hi tulunan i Dan anu i sasu utara toka-toka i Bersyeba sasu selatan, tinangkungnyomo da toka i Laigan nu Tumpu kiijo' i Yerusalem molame'akon Paskah ka' mongadati ka' Tumpu Allah Israel susumo anu tinulismo i atulan i Musa. Ma'isa toho' Paskah i lame'akon sumo aijo'.

⁶ Kalana pinalentahkonmo i tomundo ka' to mia-miannyo anu ko pangkatnyo sinaimo na mian namba i songko-songko na Yehuda ka' Israel momboa sulat haha aijo' anu onyi'nyo sumo uuka, “O mian da'isan nu Israel! Belemiu madi'mo kinuasan nu mian Asyur. Uuka aiya belemiu po'ule'mo mae palesaya hi Tumpu, Tumpu Allah anu nu sombah i Abraham, Ishak tiba i Yakub, da ia po'ule'je montulungi belemiu.

⁷ Boli sumo mompolee' nu belemiu ka' to mia-mian nu Israel sangga'at anu madi'mo tulu-tulutan hi Tumpu Allah nu aha. Pinosi toamo nu belemiu mosia na koboatnyo na Ia nohukumo aha.

⁸ Boli panggaga susumo aha, panyo otuluti na Tumpu. Imbo' toka mae i Yerusalem, i Laigan nu Tumpu anu tinantukanmo nu Tumpu Allah nu belemiu samata-mata ponsomban Ia sampe toka sidu-sidutu'. Imbo' toka mae sombah na Ia da Ia madi'mo montambuha'i belemiu.

⁹ De belemiu po'ule'mo palesaya hi Tumpu, saba' to mia-mian anu nomboamo to utu-utus nu belemiu salaku mian anu i hakop mongkalibosimo ka' mompobee'mo mae aha minsusule'. Tumpu Allah nu belemiu aijo'mo na Tumpu Allah anu manonong ka' mongkalibosi; Ia po'ule' mongala belemiu de belemiu po'ule'mo minsusule' hi Ia.”

¹⁰ Salatan mian haha aijo' anu sinai nambamo lengkat i kota' namba mule' i kota' sangga'at i da'erah tulunan nu bansa Efraim ka' Manasye toka-toka i sasu Utara na kojo'onnyo i da'erah tulunan nu bansa Zebulon, aha lewa' kinokojoan ka' pinopo ambang.

¹¹ Panyo, daagi' ahi' ko to mia-mian aha tulunan nu bansa Asyer, Manasye ka' Zebulon, anu mongka'oho' mamba i Yerusalem.

¹² I Yehuda suele Tumpu Allah nokalajamo ka' nomposa'angu'mo kinyonyoa nu mian da'isan da totu-totu'u tulu-tulutan hi pongka'oho' nu Tumpu Allah aijo'mo montuluti palentah i tomundo ka' to mia-miannyo anu ko pangkatnyo.

Nolame'akonmo Paskah

¹³ I bitu'on ko ohua'nyomo tinokamo mae manjoo' hondo na mian da'isan i Yerusalem molame'akon Sinaa Daka' Roti anu madi' ko Raginyo.

¹⁴ Iwi-iwi' na mezbah i Yerusalem anu opake monsombahkon koloban ka' pompapuan kamangian osombahkon hi to pilo-pilogot iwi-iwi' ingalamo iwi-iwi' ka' ingalinmo i Bangka'nyo nu Kidron.

¹⁵ I tanggan 14 bitu'onmo aijo' aha nongkolotmo manjoo' hondo na domba anu osombahkon salaku anu kolobanakon i Paskah. To ima-imam ka' to mia-mian nu Lewi anu daagi' mahenyu, na'ambangmo hondo. Aha nomposusi'mo butongnyo sahingga timbalimo nonsombahkon koloban anu opotunu i Laigan nu Tumpu.

¹⁶ Aha toto samian nongalamo tampat i Laigan nu Tumpu susumo anu tinantukanmo ka' tinulismo i Kitab Atulan i Musa. Baso'nyo nu koloban haha aijo' binee'mo nu mian Lewi hi to ima-imam, lantas dinudu'akonmo nu aha i Mezbah.

¹⁷ Daagi' manjoo' na aha anu tinoka mae aijo' ma'isa nomposusi' butong, jadi aha madi' timbali mongkolot domba anu okolobanakon i Paskah. Mokonyo aijo' to mia-mianmo nu Lewi na nombau akon kalaja nu aha aijo' ka' nonsombahkon hi Tumpu.

¹⁸ Ka' mule' aha to mia-mian nu Efraim, Manasye, Isakhar ka' Zebulon, manjoo' hondo na tinoka padahan ma'isa mae nomposusi' butong nu aha. Jadi aha nolame'akonmo Paskah aijo' padahan ma'isa nontuluti atulannyo. Kalana aitu i Tomundo Hizkia binalado'amo nondo'akon aha, ia notatae,

¹⁹ “O Tumpu, Tumpu Allah anu nusombah nu mompolee' mami, otaha'imani mami na kanonongan nu kinyonyoa nu Belento mongampuni aha anu hau-haunyo monsombah belento totu-totu'u na kinyonyoanyo, maumo aha ma'isa nomposusi' butong nu aha.”

²⁰ Tumpu nohongomo do'a i Hizkia. Ia nongampunimo mian haha aijo', ka' madi'mo nohukum aha.

²¹ Ingipitun na kinopinnyo na saja' i lame' na to mia-mian anu sinihukmo i Yerusalem nolame'akon Roti anu Madi' ko Raginyo. Sansina-sinaa na to mia-mian nu Lewi ka' to ima-imam mompuji-puji' Tumpu totu-totu'u na kinyonyoa.

²² To mia-mian nu Lewi haha aijo' pande hondo na mongatun mosia na monsombah Tumpu, sahingga i Hizkia nompuji'mo aha. Salatan pinitunsinaamo na kinopinnyo na aha lewa' nongkaan i lamean aijo' ka' mule' nonsombahkonmo koloban bau pontalima kase hi Tumpu, Tumpu Allah mompolee' nu aha,

Nolame'akonmo kopinduannyomo

²³ aha iwi-iwi' nosangaja'mo da lamean aijo' daagi' po'ule' otuangi pitunsinaa. Lantas po'ule' mule' aha nolame'akon i lame hondo.

²⁴ I Tomundo Hizkian nombee' 1.000 na sapi' lakinyo ka' 7.000 na domba. To mia-mian anu ko pangkatnyo mokalaja hi Hizkia nombee' 1.000 na sapi' lakinyo ka' 10.000 na domba. Iwi-iwi' na binatang haha aijo' binee'mo hi mian da'isan da okolot ka' o kaan. Manjoo' hondo na to ima-imam nomposusi'mo butong nu aha.

²⁵ Aha mian da'isan nu Yehuda, to ima-imam, to mia-mian nu Lewi ka' to mia-mian anu tinokamo lengkat mae i sasu utara, tiba to mia-mian anu i salipu'an anu jinojoongmo i Israel ka' i Yehuda, iwi-iwi' nongoa'imo kasanangan.

²⁶ Kota Yerusalem i lame'mo hondo, kalana salatanmo pe'e i Salomo anak i Daud anu momo'ane, ma'isa toho' tinimbali sumo aijo'.

²⁷ To ima-imam ka' mian nu aha Lewi nompoitamo da nu balakati nu Tumpu na aha mian da'isan ka' da kiita' mae i suluga' kajojoongan-Nyo Tumpu Allah mohongoakon mae do'a nu aha ka' mohalala'akon mae apaa na anu nupoita nu aha.