2 TAWARIKH 27 - KITAB NU TUMPU ALLA LELE MA'IMAI'

I Yotam tomundo' nu Yehuda

¹ I Yotam tinimbalimo tomundo tempo'nyo aitu umunnyo 25 mo na taun, ka' ia nompalentahmo i Yerusalem 16 na taun na kinopinnyo. Sanggo nu tinanyo i Yerusa anak i Zadok.

² I Yotam saja' momposanang kinyonyoa nu Tumpu susumo i Uzia tuumanyo. Ola ia madi' nompapui kamangian i Laigan nu Tumpu, susumo anu binaumo nu tuumanyo. Panyo maumo sumo aijo' mian da'isan na saja ahi' mombau dosa'.

³ Aitumo i Yotam na nombau Sabatan Daka' sasu Utara i Laigan nu Tumpu, ka' nompaka pohoson pagan mesen nu Yerusalem i da'erah anu osanggohi ofel.

⁴ Ia na nompotinjo kota-kota' i bungkutnyo nu Yehuda ka' benteng-benteng, ka' laigan toto tangka-tangkas i uno nu kuhat.

⁵ Ia nompahampateakonmo ka' nompatundu' tomundo' Amon tiba suludadunyo ka' nompakisamo mian nu Amon mombayan hasin. Tinotolu' na taun na kinopinnyo na aha saja' nombayan sataun toka sataun 3.400 kilogram na salaka, ohua' na ngahan nu gandum, toto sangahan 1.000 na ton.

⁶ I Yotam nompaka daka'mo na kakuasa'annyo kalana ia mohongo-hongo ka' tulu-tulutan hi Tumpu Allah-nyo.

⁷ Hahan sangga'at anu binaunyomo tempo'nyo nompalentah na i Yotam, lewa' nahampate ka' kapandean nahampate anu binaunyomo, iwi-iwi' tinulismo i kitab Sisikon nu to Tomu-tomundo' nu Israel ka' Yehuda.

⁸ I Yotam umunnyo 25 mo na taun tempo'nyo ia tinimbalimo tomundo, ka' ia nompalentahmo i Yerusalem kinopinnyo 16 na taun.

⁹ Ia sinilakamo ka' i lamunmo i Kota' Daud, lantas i Ahasmo anaknyo momo' ane na binau tomundo nombolosakon ia.