2 TAWARIKH 26 - KITAB NU TUMPU ALLA LELE MA'IMAI'

I Uzia tomundo nu Yehuda

^1-3 Salatan i Amazia sinilakamo, iwi-iwi' na mian da'isan nu aha Yehuda nompile'imo i Uzia anaknyo momo'ane na binau tomundo. Tempo'nyo aitu umunnyo 16 mo na taun. Sanggo nu tinanyo i Yekholya, boune mian nu aha Yerusalem. I Uzia nompalentah I Yerusalem 52 na taun na kinopinnyo. Ia na nongala ka' po'ule' nombau kota Elot.

⁴ I Uzia sumo tuumanyo saja' mombau anu momposanang kinyonyoa nu Tumpu.

⁵ I Zakharia na saja' mompokinde'i de mongkona hahan agama. Tempo'nyo i Zakharia daagi' tutuu'. I Uzia daagi' saja' tulu-tulutan monsombah Tumpu, sahingga daagi' saja' nubalakati nu Tumpu.

⁶ I Uzia nahampate nongewa mian nu aha Filistin. I hobo'akonnyo na pagan mesen iwi-iwi' nu kota Gat, Yabne, ka' Asdod ka' nombaumo to kota-kota' anu binentengan koko Asdod ka' da'erah sangga'at i Filistin.

⁷ Tumpu Allah na nontulungi ia nompatundu' mian nu Filistin, ka' mian nu Arab anu jojoong i Gur-Baal ka' mian nu Meunim.

⁸ Mian nu Amon mombayan hasin hi Uzia. Kakuasaannyo kino daka-daka'nyomo sahingga sanggonyo tinalasanggomo tinoka-tokamo i Mesir.

⁹ Bau pompohoson kota' Yerusalem, i Uzia nompotinjomo laigan tangka-tangkas i Sabatan Daka' anu i Pasu'nyo, i Sabatan Daka' anu i Bangka'nyo ka' ipasu'nyo nu pagan mesen.

¹⁰ Ia mule' nompotinjomo laigan toto tangka-tangkas anu binentengan i da'erah padang, ka' nongkekemo manjoo' hondo na bubung kalana manjoo' na potuu'onnyo mau anu aita' mae i bungkutnyo kabai i hatanyo sasu kinsoban. Kalana ia nompalahatikan hondo anu mombau ale' sahingga ia nompokalajamo mian manjoo' hondo anu mombau ale' nu anggur i da'erah bungkutnyo, ka' mombau ale' i da'erah anu toto ma'o-ma'omuk.

¹¹ I Uzia ko suludadu manjoo' hondo anu saja' mosadia mahampate. Aha binagi-bagi toto sanggombu, anu konjoo'nyo ua'aha na gulutulis nu tomundo na montulis, aijo'mo i Yeiel tiba i Maaseya, anu mongkapalai aha aiya i Hananya, sala samian anu mokalaja hi tomundo'.

^12-13 Iwi-iwi' na suludadu haha aijo' konjoo'nyo 307.500 na mian ka' anu mongkapalai 2.600 na suludadu anu toto tangka-tangkas na pangkatnyo. Aha iwi-iwi' timbali otaha'imani hondo na mahampate montulungi tomundo mompatundu' sampo bali'.

¹⁴ I Uzia nomposadiaimo suludadunyo haha aijo', kanta, talombo', topi baja, baju' besak, pana' ka' hihisnyo ka' batu anu obunu'akon nu salambeta.

¹⁵ I Yerusalem anu toto pande-pande mombau toongon bau pahampate nombaumo pana' anu timbali mompana'akon hihis ka' batu anu daka' lengkat mae aita' i laigan tangka-tangkas ka' lengkat mae i pasu'nyo nu pagan mesen nu kota'. I Uzia tinalasanggomo iyaya mae ka' ia binalakuasamo hondo kalana Tumpu Allah nontulungimo hondo ia.

I Uzia nohumpakmo hukuman, kalana ia sinombongmo

¹⁶ Salatan i Tomundo Uzia dinaka'mo na kakuasaannyo, ia sinombongmo ka' aijo'mo na nonsaduakon sahingga ia sinilakamo. Ia nolanggaimo palentah nu Tumpu Allahnyo kalana nompinsopimo Laigan nu Tumpu ka' nompapuimo kamangian i mezbah i tampat nu kamangian.

¹⁷ Panyo i Imam Azarya tiba aha 80 na mian sangga'at anu toto hoso-hoson ka' to babaani nompokiijo'imo ia,

¹⁸ ka' nontewamo apaa na anu binaunyomo aijo'. Aha notatae, “Kita Mian daka' Anu Tala sanggo! Kita Tomundo madi' ko hak mompapui kamangian osombahkon hi Tumpu. Aijo' kalaja nu to ima-imam lee' mae i Harun. Kalana ola ahi aha na samata-mata mombau kalaja aijo'. Pala'i na tampat aiya Tomundo kalana tampat aiya susi'! Kita Tomundo madi'mo mohongo-hongo Tumpu Allah, ka' madi'mo mae nusitujui nu Tumpu.”

¹⁹ Tempo'nyo aitu i Uzia tinjo-tinjo koko mezbah nu kamangian i Laigan nu Tumpu ka' sulu' anu bau pompapui kamangian totoongmo i limanyo. Ia notambuha'mo hi imam haha aijo', ka' monti-montiik kinonamo nu panyakit kilit anu ma'idek hondo i siakannyo.

²⁰ I Azaria tiba to ima-imam sangga'at nontoamo ia ka' tinolokengkengmo, lantas sabole-bolemo sinai nu aha da mosabatmo na ia pala'imo na Laigan nu Tumpu. Ia sampamo nosabat kalana Tumpu nohukumo ia.

²¹ Sangkutnyo i Tomundo Uzia sinilaka, panyakit aijo' madi'mo kino kapa'alinannyo. Ia pinosi pojoongmo i sa'angu' na laigan ka' madi'mo pinobee' minsoop i Laigan nu Tumpu. Ia madi'mo pinobee' mokalaja salaku tomundo, ka' i Yotamo anaknyo momo'ane na nompalentah salaku wakinnyo.

²² Sisikon sangga'at mongkona i Tomundo Uzia nompalentah tinulismo i Nabi Yesaya anak i Amos.

²³ Salatan ia sinilakamo, i Uzia i lamunmo i tano' koko pinolamunan to tomu-tomundo, panyo madi'mo pinosa'angu' i lamunan aijo', kalana ia ko panyakit kilit anu ma'idek hondo. I Yotam anaknyo momo'ane na nombolosakon ia binau tomundo.