2 TAWARIKH 25 - KITAB NU TUMPU ALLA LELE MA'IMAI'

I Amazia tomundo' nu Yehuda

¹ I Amazia tinimbalimo tomundo salatan umunnyo 25 mo na taun, ka' ia nompalentahmo i Yerusalem 29 na taun na kinopinnyo. Tinanyo i Yoadan mian nu Yerusalem.

² I Amazia nombaumo anu momposanang kinyonyoa nu Tumpu, panyo madi' buke-buke' na kinyonyoanyo.

³ Salatan nahosonmo na kapalentahannyo, ia nombee'imo hukuman mate to mia-mian anu ko pangkatnyo anu nompateimo tuumanyo.

⁴ Panyo to ana-anak nu mian anu ko pangkatnyo haha aijo' madi' pinateannyo kalana montuluti palentah nu Tumpu anu i uno nu Kitab i Musa anu montaloakon, “Boli mohukum opatei na to tu'a-tu'anyo kalana montoa kalakuan nu to ana-anak nu aha anu mombaumo anu ma'idek, ka' boli mohukum opatei na to ana-anaknyo kalana montoa kalakuan nu to tu'a-tu'anyo nu aha anu mombaumo anu ma'idek. Batu-batu mian o hukum opatei, ola de mosi baumo kalakuan anu ma'idek.”

Nahampatemo nongewa Edom

⁵ I Amazia nomposihukmo iwi-iwi' na aha tulunan mae nu bansa Yehuda ka' Benyamin lantas pinokaunyomo na aha tinuminjo posi-posi aha sa'anakan, nu kapalai nu samian na kapala nu suludadu anu konjoo'nyo aha samadala, ka' kapala nu anu mongkapalai aha sa'atu na suludadu. Lapas aijo' ia nompile'imo to mia-mian anu 20 mo na taun labi mokiita', anu mahoson na mahampate ka' makolit na montoongi talombo' ka' kanta. Konjoo'nyo aha 300.000 na mian.

⁶ Ka' mule' ia nontamboimo 100.000 na suludadu nu aha Israel binayannyo kila-kila 3.400 kilogram na salaka.

⁷ Panyo samian na nabi tinokamo hi tomundo ka' nompoto'i, “Boli mongala to sulu-suludadu nu Israel haha aijo', kalana Tumpu madi' motulungi mian nu Israel anu i Kalaja'an sasu Utara aijo'.

⁸ Panyo de belento Tomundo sabole-bole mongala aha, nupojohokmo nu Tumpu Allah na belento Tomundo' da nupatundu' nu sampo bali', maumo suludadu nu Belento Tomundo mahoson ka' baani. Kalana ola Tumpu Allah na anu daka' hondo na kuasanyo timbali mombee'i ka'untungan mahampate, kabai opatundu'.”

⁹ “Panyo mosia na salaka iwi-iwi' anu binee'kumo hi aha?” na koonyo i Amazia. Tinaaman nu nabi aijo', “Tumpu timbali monsule'akon hi belento tomundo lebe manjoo' molingkudui aijo'!”

¹⁰ Kalana aijo' i Amazia po'ule'mo nonsai aha ninsusule' na suludadu haha aijo' anu noko lapasmo tinamboan da po'ule'mo, ninsusule'mo i lipu'nyo. Aha ninsusule'mo panyo pinusamo hondo.

¹¹ I Amazia binaanimo ka' binoanyomo na suludadunyo i Bangka' nyo nu Asin. I kiijo' mae aha nahampatemo ka' nompateimo aha 10.000 na suludadu nu Edom.

¹² Daagi' sangga'at aha 10.000 na mian i hakopmo ka' binoa. Aha binoamo aita' i bawo nu bungkutnyo nu batu i kota' Sela lantas pinaha tumbalakonmo nokaijong sahingga sinilakamo.

¹³ Tempo'nyo aitu to sulu-suludadu nu aha Israel anu sinaimo i Amazia ninsusule', ka' madi'mo pinobee' namba hingga-hinggat nahampate, nontumbuhimo to kota-kota' nu aha Yehuda lengkat i Samaria mokiijo' i Bet-Horon. Aha nompateimo 3.000 na mian ka' nompahuhuakonmo manjoo' na balang.

¹⁴ Salatan nompatundu'mo suludadu nu Edom, i Amazia ninsusule'mo nomboamo to pato-patong nu pilogot nu Edom ka' pino'una'mo nu aha i Yehuda lantas ia nompapuimo kamangian sinombahkonnyo hi patong haha aijo'.

¹⁵ Anu binaunyomo aijo' nonsaduakonmo da Tumpu nontambuha'imo. Ia nonsaimo samian na nabi namba hi Amazia. Nabi aijo' notatae, “Kadaka' belento Tomundo nonsombahmo pilogot nu bansa sangga'at anu madi' moko ala momposalamat posi bansanyo da madi' opoko kuasai nu Belento Tomundo?”

¹⁶ “Pomohokot”, na koonyo i Amazia, “De madi' opateimo mami na beleyum! Madi' toho' kami nohangkat beleyum da mompokinde'i i tomundo!” Sahingga nomohokotmo na nabi aijo', panyo ma'isa pe'e ia nomohokot ia daagi' notatae, “Uuka aiya sinumbu'kumo taalu' Tumpu Allah nontantukanmo da osilakaimo na belento Tomundo kalana belento Tomundo nombaumo han anu sumo aijo', ka' kalana belento Tomundo madi'mo nompajuli pokinde'ku.”

Yehuda nahampatemo nongewa Israel

¹⁷ I Amazia tomundo' nu Yehuda tiba to mia-mian anu lewa' mompokinde'i nosangaja'mo da mongewamo Israel. Ia nonsaimo mian namba hi Yoas tomundo nu Israel, anak i Yoahas, makumpu i Yehu da mongewamo ia mahampate.

¹⁸ Panyo i Tomundo Yoas nompotuunmo pinontaaminyo sumo uuka, “Daagi' kino minsan hemput anu ko hii'nyo aita' mae i bungkutnyo nu Libanon nompotunmo anu pinoitanyo sumo uuka, hi kau' lontio', ‘O kau' lontio', bee'mo mae na langkoyang nu beleyum hi anaku da baumo bengkele'nyo.’ Panyo mamanga notulumo i kiijo' na binatang nu alas sa'angu' ka' nompahampeja'akonmo hemput anu ko hii'nyo aijo'.

¹⁹ Beleyum Amazia, kobubuunmo tukooyum beleyum mompatundu'mo mian nu Edom, panyo lebe ma'ima' beleyum jojoongmo i laigan. Apaa na gunanyo lewa' molio palakala anu ola monsilakai butong nu beleyum ka' mian anu nu palentah?”

²⁰ Panyo i Amazia, tomundo' nu Yehuda madi' montapali potatae i Yoas tomundo' nu Israel. Ka' Tumpu Allah memang kino kahanda'mo da i Amazia opatundu'mo kalana ia nonsombahmo patong nu pilogot nu aha mian Edom.

²¹ Kalana aijo' i Yoas nambamo tiba to sulu-suludadunyo i Bet-Semes ka' nahampatemo nongewa i Amazia kiijo' mae.

²² Suludadu nu Yehuda pinatundu'mo ka' iwi-iwi' na suludadunyo nopalaimo ninsusule'mo i laigan nu aha toto samian.

²³ I Yoas nohakopmo i Amazia ka' binoamo nu aha i Yerusalem lantas pinaha hobo'akonmo nu aha na pagan mesen nu kota' aijo' anu ko mantannyo kila-kila 200 na meten, lengkat pe'e i Sabatan Daka' Efraim toka-toka i Sabatan Daka' anu i Pasu'nyo.

²⁴ Iwi-iwi' na mosoni' ka' salaka ka' iwi-iwi' na pakakas anu tinokaannyo i Laigan nu Tumpu ka' anu nu jagai i Obed-Edom ka' mule' iwi-iwi' na halata' anu kiijo' i laigan nu tomundo tiba tinopia-piangkuka na mian anu i hakopmo, binoamo i Yoas i Samaria.

²⁵ Salatanmo i Yoas tomundo' nu Israel sinilakamo, i Amazia tomundo nu Yehuda na daagi' ahi' tinumuu' 15 na taun.

^26-28 Salatamo pe'e i Amazia nohikumo Tumpu, mian sinangaja'mo da bolimo mohongo-hongo ia, kiijo' i Yerusalem. Kalana aitu ia nopalaimo namba i kota' Lakhis, panyo sampo bali'nyo haha aijo' nololoi'mo ia nokiijo' ka' pinateanmo nu aha na ia. Bangke'nyo pinosake'mo i kaleta anu nu hela' nu ajahan, ka' binoamo i Yerusalem, lantas i lamunmo i pinolamunan to tomu-tomundo' i kota' Daud. Sisikon sangga'at mongkona i Amazia lengkat i momonanyo tinoka-toka tempo'nyo ia madi'mo nompalentah tinulismo i uno nu kitab Sisikon nu to Tomu-tomundo Yehuda ka' Israel.