2 TAWARIKH 23 - KITAB NU TUMPU ALLA LELE MA'IMAI'

Kasangaja'an da bolimo montuluti i Atalya

¹ I taun anu ko popitu'nyomo tinantukanmo i Imam Yoyada da obaumo na anu tinanga'anmo. Ia nomposa'angu'mo kasangaja'an tiba aha olima' na suludadu anu toto tangka-tangkas na pangkatnyo, aijo'mo i Azarya anak i Yehoram, i Ismail anak i Yohanan, i Azarya anak i Obed, i Maaseya anak i Adaya, tiba i Elisafat anak i Zikri.

² Aha nambamo i iwi-iwi' na kota' i da'erah Yehuda, ka' nomposihukmo iwi-iwi' na aha Lewi ka' to kapa-kapala nu aha toto sa'anakan mae natulunan lantas binoamo nu aha i Yerusalem.

³ Aha sinihukmo i Laigan nu Tumpu ka' nojanji'mo tiba i Yoas anak mo'ane i tomundo' aijo'. I Yoyada notataemo hi aha, “Aiyamo na anak mo'ane i Tomundo Ahazia anu sinilakamo! Ia uuka aiya o hangkatmo bau tomundo, kalana jinanji'mo nu Tumpu tukoonyo lee' i Tomundo Daud tataap sabole-bole bau pamalentah.

⁴ Aiyamo na anu tionyo ahi' obaunto. De to ima-imam ka' mian nu Lewi lapasmo na kalaja nu aha i sinaa nu Sabat, aha madi'mo timbali minsusule'. Aha obagi totolu' sambagian na aha, monjaga i to saba-sabatan daka' i Laigan nu Tumpu,

⁵ sambagian mule' i laigan nu tomundo, ka' labinyo mule' i sabatan Daka' Momona anu i ahopnyo. Iwi-iwi' na mian da'isan tionyo sihuuk i popasan nu Laigan nu Tumpu.

⁶ Madi' ko anu timbali minsoop i uno nu Laigan nu Tumpu ola to ima-imam ka' mian nu Lewi anu hau-haunyo mokalaja sinaa aitu. Aha timbali minsoop kalana aha tinantukanmo samata-mata mokalaja hi Tumpu. To mia-mian sangga'at tionyo ahi' montuluti hondo-hondo atulan nu Tumpu ka' jojoong i sambiha'nyo.

⁷ To mia-mian nu Lewi tionyo ahi' tuminjo montikubi i tomundo ka' bajak opaha keatmo, ka' monsangalui ia maumo pa' moya na ia. Ihe na ko gia' kahanda minsoop i Laigan nu Tumpu, tionyo ahi' opatei.”

⁸ Palentah i Yoyada aijo' tinulutanmo nu to mian-mian Lewi ka' aha mian da'isan Yehuda. To mia-mian anu madi'mo mokalaja i sinaa nu Sabat ma'isa timbali minsusule'. Jadi to sulu-suludadu anu toto tangka-tangkas na pangkatnyo nompoto'imo, tukoonyo nuaha to mia-mian anu madi'mo mokalaja kabai anu tokaje mae mokalaja, sihuuk pe'e mae.

⁹ To sulu-suludadu anu toto tangka-tangkas na pangkatnyo haha aijo' pinaha bagianmo i Yoyada talombo' tiba kanta anu i Tomundo Daud anu pino'una' i Laigan nu Tumpu.

¹⁰ I Yoyada nompaha pojoongmo to mia-mian, ka' bajak pinaha keatmo aijo' i ahop nu Laigan nu Tumpu da monjagai i Tomundo.

¹¹ Lapas aijo' binoamo i Yoyada na i Yoas nosabat, lantas pinosongko'anmo songko' nu tomundo, ka' binee'mo hi ia na kitab nu Atulan nu Tumpu Allah. Sumo aijo' na i Yoas i hangkat binau tomundo. Lapas aijo' i Imam Yoyada tiba to ana-anaknyo nondudu'akonmo lanya' hi Yoas salaku tanda i hangkatmo, “Binau tomundo!”

¹² I hongomo i Atalya na mian da'isan lewa'mo nontaligalai nonsalamatmo i tomundo. Ia nalia-lia'mo namba i Laigan nu Tumpu nompanjolongimo mian da'isan anu aijo' sinihuuk'mo.

¹³ Ia nontoamo tomundo anu sala'je i hangkat aijo' tinjo-tinjo i sabatan pinsoopan mokiijo' i Laigan nu Tumpu i tampat pinondudu'ian lanya', hau-haunyo tinikubanmo nu suludadu anu toto tangka-tangkas na pangkatnyo ka' mian mompuhi tolompet. Iwi-iwi' na mian da'isan nontaligalaimo ka' i lame'mo, hau-haunyo mule' aijo' tolompet pinuhanmo ka' to mia-mian anu mompahaikakon musik i Laigan nu Tumpu nompolame'mo lamean aijo', aha nompo'onyi'mo iwi-iwi' na pakakas musik nu aha. I Atalya nabuhukmo sahingga binea-beaknyomo na baju'nyo ka' noloboo' akonmo, “Kahipun! Kahipun!”

¹⁴ I Yoyada madi' nompobee' i Atalya opatei koko Laigan nu Tumpu, jadi pinoto'inyomo hi to sulu-suludadu anu toto tangka-tangkas na pangkatnyo, “Boa na ia sabatakon so' liu-liu na to mia-mian anu monjaga, ka' patei maumo pa' ihe na anu ko tanga'an mompotumuu' ia.”

¹⁵ Aha nohakopmo ia, lantas binoamo nu aha i laigan nu tomundo. Kiijo' mae ia pinateanmo i sabatan Daka' Ajahan.

I Yoyada nombaumo atulan bu'ou

¹⁶ I imam Yoyada nonsale'imo i Tomundo Yoas tiba mian da'isan hingga-hinggat suele tiba ia da balajanji'mo tukoonyo aha, aha timbalimo mian anu palesayamo hi Tumpu.

¹⁷ Lapas aijo' aha iwi-iwi' nompokiijo'imo kuil nu Baal, lantas i hobo'akonmo nu aha. Mezbahnyo tiba to pato-patongnyo ingideanmo nu aha, ka' i Matan Imam nu Baal pinateanmo nu aha i ahop nu mezbah haha aijo',

¹⁸ Lantas i Yoyada nombee'imo kalaja to ima-imam ka' mian nu Lewi da mongulus kalaja i Laigan nu Tumpu susumo anu binagimo ka' tinantukanmo na kalaja daagi' pe'e tempo'nyo i Tomundo Daud. Aha tionyo ahi' monsombahkon koloban anu opotunu hi Tumpu – pokakana sumo to atu-atulan i Musa – ka' olame'akon ka' onyanyiakon pokakana sumo anu ingatunmo i Daud.

¹⁹ I sabatan daka' haha aijo' i Laigan nu Tumpu, pinaha pojoongmo i Yoyada na mian da monjaga mian anu madi' pantas monsombah Tumpu madi' timbali minsoop.

²⁰ To sulu-suludadu anu toto tangka-tangkas na pangkatnyo, ka' to mia-mian anu talasanggo, ka' to mia-mian anu ko pangkatnyo mokalaja i pamalentah, ka' iwi-iwi' na mian da'isan nombatukimo i Yoyada momboa i Tomundo Yoas mamba i laigan nu tomundo lengkat mae i Laigan nu Tumpu. Aha ninsoop nontulu sabatan daka' anu o'angga'i lantas i tomundo pinosuhangmo i kasuhangan nu tomundo.

²¹ Iwi-iwi' na mian da'isan i lame'mo, kota suele madi'mo ko anu lewa' mombau kahengge'an ka' mule' i Atalya pinateanmo.