2 TAWARIKH 2 - KITAB NU TUMPU ALLA LELE MA'IMAI'

Posadiaon mombaumo Laigan nu Tumpu

¹ I Tomundo Salomo nompotantumo da mombaumo Laigan nu Tumpu ka' sa'angu' na laigan nu tomundo da bau kajojoongannyo.

² Kalana aijo' ia nompalentahmo aha 70.000 na mian mongato pakakas anu obau Laigan nu Tumpu, 80.000 na mian anu mompa'at batu aita' mae i bungkutnyo ka' 3.600 na madon anu monjagai kalaja aijo'.

³ I Salomo nompotuunmo tanga'annyo aijo' hi Hiram tomundo nu aha Tirus, “De timbali da belento Tuan mompaha bada-badagang tiba aku susumo tiba i Daud tuumangku. Belento Tuan nompobalukmo hi ia kau' lontio' nu Libanon anu binaunyomo laigan nu tomundo kajojoongannyo.

⁴ Uuka aiya aku kahanda'mo mombau sa'angu' na laigan bau samata-mata ponsomban Tumpu salaku bau pongadati Tumpu Allah-ngku. I laigan aijo' aku ka' mian da'isan, anu ku palentah monsombah Tumpu opapuakon kamangian da manohong, ka' saja' monsombahkon roti anu o kaan hi Tumpu. I laigan aijo' mule' kami monsombahkon koloban anu opotunu daagi' subu ka' de malomo, de tokamo i Sinaa nu Sabat, de tokame i Sinaa molame'akon Bitu'on Bu'ou, ka' i sina-sinaa sangga'at anu samata-mata bau pongadati Tumpu Allah mami. Kalana, Ia nompalentahmo da han aijo' saja' obau sampe toka sidu-sidutu' nu mian Israel.

⁵ Aku mongkahanda'i da Laigan nu Tumpu anu ku bau aijo' timbali sa'angu' na laigan anu talasanggo, kalana Tumpu Allah mami lebe talasanggo molingkudui pilogot maumo pa' iyaya mae.

⁶ Panyo sabenanyo madi' ko mian anu moko ala mombau Laigan nu Tumpu Allah, kalana songko-songko na langaa madi' sampa' na kodaka'nyo bau kajojoongan-Nyo. Jadi, Laigan nu Tumpu anu ku poko ala ku bau aijo', ola ugaat saimbanggan tampat pompapuan kamangian anu osombahkon hi Tumpu Allah!

⁷ Kalana, aijo' de timbali belento Tuan monsai mae hi kami samian anu pande mombotik ka' timbali montutuk mosoni', salaka, tambaga, besak ka' suele pande montonun hude mobilu', mingkamumu', ka' momea'. Ia mokalajaje hingga-hinggat tiba mian nu Yehuda ka' Yerusalem anu suele monsumbu' mombau apa-apaa aijo'mo aha anu pinile'anmo nu tuumangku i Daud.

⁸ Ku sumbu' to mia-mian anu lewa' monta' kau' i lipu' nu Belento Tuan pande na monta' Kau'. Kalana aitu de timbali belento Tuan mompakatui mae aku ngangahan nu kau' lontio' ka' kau' sondana nu Libanon. Ku saije na mianku montulungi to mia-mian nu Belento Tuan,

⁹ da aha mompotouka manjoo' na kau'. Kalana Laigan nu Tumpu anu kahanda' ku bau aijo' tionyo ahi' daka' ka' mahoson.

¹⁰ Bau mantu nu to mia-mian nu Belento Tuan, ku pakatuje hi belento Tuan ohua' na ngahan nu gandum, toto sangahan 2.000 na ton, anggur konjoo'nyo 400.000 liter ka' lanya' nu zaitun 400.000 liter.”

¹¹ Salaku pinombalosi sulat i Tomundo Salomo aijo', i Tomundo Hiram nompakatu sulat suele onyi'nyo sumo uuka, “Kalana Tumpu mongkalibosi mian anu pinalesayamo hi Ia, ia nohangkatmo Tuan tinimbalimo Tomundo nu aha.

¹² O puji' na Tumpu Allah nu Israel, anu Nompotimbalimo langit ka' tano'! Ia nombee'imo samian na anak mo'ane anu pande hondo hi Daud, ka' mule' malia' na bapikin, ka' manjoo' na anu nu pangalati'i, anu tempo' uuka aiya mogogia'mo mombau Laigan nu Tumpu, ka' sa'angu' na laigan nu tomundo bau kajojoongannyo.

¹³ Jadi aiya ku sai hi belento Tuan samian na anu pande hondo mombau apa-apaa sanggonyo i Huram.

¹⁴ Tinanyo aiya tulunan nu bansa i Dan, tuumanyo mian nu Tirus. Ia pande hondo na montutuk mosoni' obau apa-apaa, sumo aitu mule' salaka, tambaga, besak ka' mule' mombau batu, kau' anu bau pakakas. Ia timbali montonun hude mobilu', mingkamumu', momea', ka' mule' hude lenan. Iwi-iwi' na anu o botik timbali nu bau, yayamo na anu opoki bau. Jadi da ia opokalaja hingga-hinggat tiba anu suele pande na mombau apa-apaa itina' hi belento Tuan, ka' tiba to mia-mian anu nokalajamo hi Tomundo Daud tuuma nu Belento Tuan.

¹⁵ Kami montanda'imo anu opakatu mae na gandum ohua' na ngahannyo aijo', anggur ka' lanya' nu zaitun anu jinanji'mo nu Belento Tuan aijo'.

¹⁶ Kami monta'mo kau' lontio i bungkutnyo nu Libanon, konjoo'nyo sumo anu nupalalui nu Belento Tuan, lantas obutu' mami sumo aki'an ka' oloyoakan mami montulu ambai sampe toka i Yope. Lengkat i kiijo' kitaje Tuan na mongato mamba i Yerusalem.”

Laigan nu Tumpu tinampu'unanmo binau

¹⁷ I Tomundo Salomo nombilangmo iwi-iwi' na mian anu lengkat mae i Salipu'an anu jinojoongmo i Israel, susumo anu toho'mo binau i Tomundo Daud tuumanyo. Jadi sinumbu'mo aha 153.600 na mian anu lengkat mae i salipu'an.

¹⁸ Pitumpulu' na madala na aha aijo' binee'an kalaja mongato kau' anu bau laigan nu Tumpu, 80.000 na mian mompa'at batu anu o'ala i bungkutnyo, ka' 3.600 na mian montoa ka' monjagai mian anu mombau pakalaja'an aijo'.