2 TAWARIKH 19 - KITAB NU TUMPU ALLA LELE MA'IMAI'

Samian na nabi nompokinde'imo i Yosafat

¹ Salatan i Yosafat tomundo nu Yehuda ninsusule'mo mae ima-ima' i laigan nu tomundo kajojoongannyo kiijo' i Yerusalem,

² samian na nabi sanggonyo i Yehu anak i Hanani tinokamo mae nangadap hi Tomundo. Koonyo nu nabi ai-aijo' hi ia, “Madi' minsoop i akan na belento Tomundo montulungi mian ma'idek ka' monsangaja'i mule' mian anu mongka'ideki Tumpu? Apaa na anu binaumo nu belento Tomundo, aijo' non saduakonmo i Tomundo tinambuha'anmo nu Tumpu.

³ Panyo mau mule' sumo aijo' daagi' ahi' ko anu ma'ima' hi belento Tomundo. Belento Tomundo nongalinimo iwi-iwi' na Patong Pilogot boune Asyera, anu nu sombah nu mian da'isan ka' belento Tomundo mule' nombaumo sa'angu' na usaha da tumuu' mombatuki pongka'oho' nu Tumpu Allah.”

I Yosafat nombaumo atulan bu'ou

⁴ I Tomundo Yosafat kajojoongannyo i Yerusalem. Panyo toto minsan ia mamba montoa miannyo i songko-songko na lipu' mompoto'i aha da pu'ule' ahi' mae mompalesaya Tumpu, Tumpu Allah nu mompolee' nu aha.

⁵ Toka i toto sa'angu' na kota anu ko bentengnyo i da'erah Yehuda ia mohangkat to mia-mian kopian,

⁶ ka' mombee'i palentah sumo uuka, hi aha, “Obau pande-pande na momputusi palakala kalana belemiu momputusi misa' pongka' oho' nu manusia panyo mongala pongka'oho' nu Tumpu. Ia na montoa belemiu de belemiu momputusimo palakala.

⁷ Belemiu tionyo ahi' mabuhuk i Tumpu, ka' momputusi palakala tionyo ahi' opotutugakon ima-ima', kalana Tumpu Allah-nto mongka'ideki mian anu tageo' na kinyonyoanyo, anu momputusi palakala madi' adin kabai ko gau'mo da mohumpak tambonyo.”

⁸ Ka' suele i Yerusalem, i Yosafat nohangkatmo to mia-mian kopian ingalanyo mae hi aha to mia-mian nu Lewi, to ima-imam ka' hi to mia-mian da'isan anu talasanggo. Ahamo na momputusi to pala-palakala anu madi montuluti Atulan nu Tumpu ka' palakala sangga'at.

⁹ Hi aha mian kopian haha aijo' binee'anmo i Yosafat palentah sumo uuka, “Pojalan na palentah anu binee'mo hi belemiu ka' tuluti totu-totu'u na Tumpu. Batuki totu-totu'u na palentah-Nyo iwi-iwi' anu pinalentahkon-Nyomo hi belemiu de belemiu mombau apa-apaa.

¹⁰ De to sanga-sangalu nu belemiu anu lengkat mae i kota sangga'at mongkalak hi belemiu palakala nompatei mian, nolanggaimo atulan nu agama kabai atulan nu pamalentah, belemiu tionyo ahi' mompokinde'i aha. Tiba jalan anu sumo aijo', aha madi'mo mohumpak kasala'an hi Tumpu, ka' Tumpu madi'mo montambuha'i beleyum, sumo aitumo mule' hi aha. Sabole-bole obau na palentah aiya da belemiu madi' mohumpak kasala'an.

¹¹ I imam Daka' Amarya ku bee'imo kakuasa'an anu matangkas hondo mongulus palakala iwi-iwi' anu molanggaimo to atu-atulan nu agama. I Sabaya anak i Ismael gubolonun nu aha Yehuda ku bee'imo kakuasa'an anu matangkas hondo mongulus to pala-palakala sangga'at. To mia-mian nu Lewi montoa da iwi-iwi' na kaputusan nu aha mian kopian totu-totu'u obau. Obatuki iwi-iwi' apaa na anu pinoto'imo aiya ka' o ulus totu-totu'u boli bata-bata. O' amalakon da Tumpu saja' monsangalui mian anu mongulus adin!”