2 TAWARIKH 18 - KITAB NU TUMPU ALLA LELE MA'IMAI'

I Nabi Mikha nompokinde'imo i Ahab

¹ Salatan i Yosafat tomundo nu Yehuda kinayamo ka' tinalasanggomo, ia nompo'osoakonmo samian anu hi aha salaigan, tiba samian anu hi aha salaigan i Ahab tomundo nu Israel.

² Pa' sangkuka na taun na kinopinnyo ilapas aijo' i Yosafat nambamo nodumpak hi Ahab i kota Samaria. Salaku bau pongadatinyo i Yosafat tiba to sanga-sangalunyo mae, i Ahab nombaumo bau-bauon ia nompokaumo mian da mongkolot domba ka' sapi' manjoo' hondo. Kasampatan aitu ia nonsale'imo i Yosafat da otumbuhimo na kota Ramot i da'erah Gilead.

³ Ia notatae, “Pa' belento mongka'oho' mamba tiba aku montumbuhi Ramot?” Tinaaman i Yosafat, “Timbali, suludadungku matigalumo tiba suludadu nu Belento. Kita mahampatemo hingga-hinggat.

⁴ Panyo lebe ma'ima' opokilawanto pe'e hi Tumpu.”

⁵ Sahingga i Ahab nomposihukmo kila-kila 400 na nabi lantas pinokilawanyo hi aha, “Pa' timbali na aku mamba montumbuhi Ramot kabai madi' timbali?” “Timbali!” na koonyo nu aha. “Nubee'mo nu Tumpu Allah na kota aijo' hi belento Tomundo.”

⁶ Panyo po'ule' mule' pinokilawa i Yosafat, “Pa' aiya mae madi'mo ko nabi sangga'at anu timbali mompokilawakon kita hi Tumpu?”

⁷ Tinaaman i Ahab, “Daagi' samian, i Mikha anak i Yimla. Panyo ku ka'ideki na ia, kalana madi' toho' ia mompoto'i mae hi belengku anu ma'ima'; saja' anu madi' ma'ima'.” “Hah, boli motatae sumo aijo'!” na koonyo i Yosafat.

⁸ Sahingga i lagamo i Ahab na mian anu ko pangkatnyo samian anu mokalaja i laigan nu tomundo lantas nompalentahmo ia da malia-lia' mamba mompoboa i Mikha.

⁹ Tempo'nyo aitu i Ahab ka' i Yosafat, hau-haunyo nompusokmo baju' pesalin sinumuhangmo i kadela nu tomundo i tampat pongututan gandum i ahop nu sabatan daka' Samaria, hau-haunyo aijo' to nabi-nabi tinokamo mae nangadap ka' nompoto'imo apaa na anu nu kila-kila nu aha jadi saidi' mae.

¹⁰ Sala'samian na nabi haha aijo', sanggonyo i Zedekia anak i Kenaana, nombaumo anu sumo tanduk besak na binaunyo lantas pinoto'inyomo hi Ahab, “Sumo uuka na pinoto'i nu Tumpu, ‘Tiba tanduk anu susumo haha aiya belento Tomundo mompateimo Siria ka' mohopu'imo aha.’ ”

¹¹ Iwi-iwi' na nabi sangga'at sinitujumo ka' notatae, “Tumbuhimo na Ramot, belento Tomundo mohumpakmo dale'. Tumpu mombee'imo ka'untungan mahampate hi belento Tomundo.”

¹² Hau-haunyo aitu mian anu pinalentah namba nompoboa i Mikha, nompoto'imo hi Mikha, “Iwi-iwi' na nabi nompoto'imo ka'untungan mahampate na i tomundo. Sumo aitu mule' na belento Tuumangku mompoto'i ahi' anu ma'ima' susumo hi aha.”

¹³ Panyo tinaaman i Mikha, “I uno nu sanggo nu Tumpu anu tumuu', aku ola mompoto'i apaa na anu pinoto'imo nu Tumpu Allah hi belengku!”

¹⁴ Salatan i Mikha tinokamo hi ahop i Tomundo Ahab, i Tomundo nompokilawamo, “Pa' timbali na aku ka' i Tomundo Yosafat mambamo montumbuhi Ramot kabai madi' timbali?” “Tumbuhimo!” na koonyo i Mikha, “Belento Tomundo na tionyo ahi' mompatundu' aha. Tumpu na mombee'i ka'untungan mahampate hi belento Tomundo.”

¹⁵ Tinaaman i Ahab, “De beleyum nompoto'i mae sumo itina' hi belengku koonyo nu beleyum i uno nu sanggo nu Tumpu yo poto'i mae ahi' apaa sabenannyo na anu sahondo-hondonyo. Pimpianje na beleyum ku pokinde'i i han anu sumo aijo'?”

¹⁶ Binalosan i Mikha, “Tinoangkumo na suludadu nu Israel nosungke-sungkehetmo aita' i to bungku-bungkutnyo. Aha sumomo domba anu madi'mo ko anu nolaya', ka' Tumpu notataemo mongkona aha, ‘Mian haha aiya madi'mo ko anu mongkapalai. Sahanyo aha minsusule'mo ima-ima'.’ ”

¹⁷ Lantas notataemo na i Ahab hi Yosafat, “Misa', totu'u ahi' na anu pinoto'ingkumo? Madi' toho' ia mompoto'i mae anu toto ima-ima' hi belengku! Ola saja' anu toto ide-idek!”

¹⁸ I Mikha po'ule' mule' notatae, “Uuka aiya soba potombihing apaa na anu pinoto'imo nu Tumpu! Aku nontoa Tumpu suha-suhang aita' i kasuhangannyo i suluga', ka' iwi-iwi' na malaekat-Nyo singkapmo tinuminjo koko hi Ia.

¹⁹ Tumpu nompokilawamo, ‘Ihe na mamba monsale'i i Ahab da ia mambamo mahampate ka' matemo mae na ia i Ramot i da'erah Gilead?’ Malaikat haha aijo' nontaami madi' pokakana.

²⁰ Ahennyo tinokamo na roh. Ia nongohanimo Tumpu ka' nompoto'i, ‘Akuje na monsale'i ia.’ ‘Mosia na monsale'i?’ na koonyo nu Tumpu.

²¹ Tinaaman nu Roh aijo', ‘Aku mambaje ka' ku potimbali na nabi i Ahab iwi-iwi' da baleko'.’ Tumpu notatae, ‘Ma'ima'mo de sumo itina', baumo sumo itina', timbalimo nupoko sale'i na ia.’ ”

²² Po'ule' mule' notatae na i Mikha, “Jadi aijo' tionyo ahi' timbali! Tumpu nompotimbalimo to nabi-nabi nu Belento Tomundo mombaleko'imo belento Tomundo kalana tinantukanmo nu Tumpu da mompotokamo mae balaa' hi belento Tomundo!”

²³ Sahingga nokiijo'mo na i Nabi Zedekia nongohanimo i Mikha nohapa' nganga'nyo ka' notatae, “Madi' minsoop i akan na Roh nu Tumpu mompala'i aku ka' notatae hi beleyum?”

²⁴ Tinaaman i Mikha, “Nu toaje apaa na bukutinyo de beleyum minsoopmo i sa'angu' na salipi' maninsuluk!”

²⁵ “Hakop na ia!” na koonyo nu palentah i tomundo Ahab, “ka' boamo na ia hi Amon, anu mompalentah kota ka' hi Yoas anak nu Tomundo.

²⁶ Pokau na aha da momposoop ia i talungku' ka' boli manjo' na mombee'i ia mongkaan ka' monginum sahingga aku po'ule'mo mae minsusule' ima-ima'.”

²⁷ Notatae na i Mikha, “De belento Tomundo minsusule' mae ima-ima', yo sangadinyo Tumpu madi' nompoto'i mae hi belengku, susumo anu pinoto'ingkumo. Iwi-iwi' na mian anu i aiya na jadi sakisi.”

I Ahab sinilakamo

²⁸ Lapas aijo' i Ahab tomundo Israel, tiba i Yosafat tomundo nu Yehuda nambamo nontumbuhi kota Ramot i da'erah Gilead.

²⁹ I Ahab notataemo hi Yosafat, “Aku nompusokmo baju' susumo misa' tomundo ka' mambamo hingga-hinggat mahampate, panyo beleyum na mipake ahi' nu baju' pesalin nu beleyum.” Jadi tomundo Israel nompusokmo baju' susumo misa' tomundo na mamba mahampate.

³⁰ Tempo'nyo aitu to tale-talenga' nu suludadu sinumake' i kareta anu bau pahampate nu aha Siria pinalentahmo nu tomundo'nyo da anu otumbuhi ola samata-mata tomundo nu Israel.

³¹ Jadi salatan tinoamo nu aha na i tomundo Yosafat, koonyo nu aha iwi-iwi' aijo'mo na tomundo Israel. Kalana aijo' tinumbuhanmo nu aha na ia. Panyo i Yosafat nolobo'mo, lantas tinulunganmo nu Tumpu na ia, ka' madi'mo nontumbuhi aijo', panyo nongahopimo sangga'at.

³² Salatan to tale-talenga' nu suludadu Siria anu sinumake' i kareta anu pinake mae nu aha nahampate nonsumbu'mo taalu' aijo' misa' tomundo Israel, aha madi'mo nontumbuhi ia.

³³ Madi' sinangka-sangka samian na suludadu nu Siria nompana'akonmo pana'nyo, padahan madi' siniho' pa' ihe na o pana'. Panyo pana' aijo' nongkonamo i Ahab ka' nolampasmo baju' anu pinusoknyo aijo' nahampate kinona i pinongka'utan. “Aku kinonaonmo!” na koonyo i Ahab hi mian anu nompojalan karetanyo, “Sule'akonmo ka' sabatakonmo na aku pala'imo na anu mahampate aiya!”

³⁴ Panyo kalana daagi' ahi' sabole-bole mahampate i Tomundo Ahab sinatinjonyomo tinoongan nu mian i uno nu karetanyo mo'ahop sasu mokiijo' i suludadu nu Siria. Ahennyo salatan sinaa nakakinsapmo, ia sinilakamo.