2 TAWARIKH 13 - KITAB NU TUMPU ALLA LELE MA'IMAI'

I Abia nahampatemo nongewa i Yerobeam

¹ I taun ko sampulu'nyomo ka' ualu' na i Tomundo Yerobeam nompalentah Israel, i Abia tinimbalimo tomundo nu Yehuda,

² ka' nompalentahmo i Yerusalem tinotolu' na taun na kinopinnyo. Tinanyo i Mikhaya anak i Uriel mian nu kota Gibea. Mamanga nahampatemo na i Abia nongewa i Yerobeam.

³ I Abia nomboa aha 400.000 na suludadu, ka' suele i Yerobeam nomboa aha 800.000 na suludadu.

⁴ Ohu-ohua' na gombuan nu suludadu haha aijo' nompaha aho-ahopmo i da'erah bungkutnyo nu Efraim. I Abia nindakomo nokiita' i Bungkutnyo nu Zemarim ka' iloboo'akonnyomo hi Yerobeam ka' hi mian nu Israel, “Potombihing mae!

⁵ Da osumbu' nu belemiu saba' Tumpu, Tumpu Allah nu Israel nojanji'mo tiba i Daud tukoonyo ia ka' lee'nyo na mompalentah Israel sampe toka sidu-sidutu'. Janji' aijo' madi' timbali omadi'akon.

⁶ Maumo sumo aijo', i Yerobeam anak i Nebat aijo' notomuhukmo nongewa i Salomo, tomundo'nyo.

⁷ Ia nonsale'imo aha sanggombu na to mia-mian anu toto pangga-panggaga ka' ma'idek na kinyonyoa nu aha ka' mompakisakon pongka'oho' nu aha hi Rehabeam anak momo'ane i Salomo, anu tempo'nyo aitu daagi' hondo olitau ka' ma'isa pe'e ko anu nu pisumbu-sumbu' pa' mosia na mongewa.

⁸ Jadi uuka aiya osangka nu belemiu, belemiu moko alamo mongewa kakuasa'an anu binee'mo nu Tumpu hi lee' i Daud, kalana suludadu nu beleyum manjoo' ka' belemiu ko to sapi-sapi' mosoni' anu pinotimbalimo i Yerobeam pilogot nu belemiu.

⁹ Te misa'o to ima-imam nu Tumpu lee' mae i Harun ka' to mia-mian nu Lewi i laa'mo nu belemiu iwi-iwi'? Salaku bolosnyo yayamo maumo pa' ihe na mongka'oho' timbali imam, asan ia momboamo mae sa'angu' na sapi' kabai popitu' na domba, o hangkatmo nu belemiu bau imam nu anu misa' Tumpu Allah, kalana memang sumo aijo' na to bansa-bansa sangga'at mohangkat imam nu aha. Panyo kami madi' mombau anu sumo aijo'.

¹⁰ Kami tataap palesaya hi Tumpu Allah mami ka' madi' o hiku mami na Ia. To ima-imam mami tataap lee' mae i Harun, ka' to mia-mian nu Lewi tataap montulungi aha.

¹¹ Toka subu-subu ka' mama lomo, aha mompapuimo kamangian ka' monsombahkonmo koloban anu opotunu hi Tumpu ka' momposadiamo roti anu suele osombahkon. Salatan malomo nututungimo nu aha na sulu' haha aijo' i tengke nu sulu' anu mosoni' na binau. Kami tataap montuluti iwi-iwi' palentah nu Tumpu, panyo belemiu nohikumo Ia.

¹² Kapala mami Tumpu Allah ka' to ima-imam-Nyo aiya hi kami. Ka' aha nosadiamo mompuhi tolompet bau pontanda'i, kami montumbuhimo belemiu. O belemiu mian nu Israel, boli panggaga hi Tumpu, Tumpu Allah nu mompolee' miu! Komiu madi' untung na mahampate!”

¹³ Tempo'nyo aijo' i Yerobeam nonsaimo sambagian na gombuan nu suludadunyo da montumbuhimo gombuan nu suludadu nu aha Yehuda lengkat mae i hiku nu aha ka' sambagian mule' lengkat mae i ahop.

¹⁴ Salatan gombuan nu suludadu nu aha Yehuda nontoamo taalu' aha tinikumo, aha noloboo'mo momoita tulung hi Tumpu. To ima-imam nompuhimo tolompet,

¹⁵ lantas gombuan nu suludadu nu aha Yehuda tinolo aismo bau pontipaha'i da mahampatemo, kinapalaan i Abia. Hau-haunyo aha lewa' nolo ais, Tumpu Allah nompatundu'mo i Yerobeam ka' gombuan nu suludadu nu aha Israel.

¹⁶ Sahingga aha nopalaimo. Tumpu Allah nombalakatimo mian nu Yehuda sahingga nompatundu'mo aha.

¹⁷ Daka' hondo na kakalahan na pinombau i Abia tiba suludadunyo hi aha mian nu Israel; 500.000 na suludadu nu aha anu otaha'imani sinilakamo.

¹⁸ Mian nu Yehuda na inguntung nahampate, kalana aha montaha'imani samata-mata balakat nu Tumpu Allah na montulungi aha, aijo'mo Tumpu Allah nu mompolee' mae nu aha.

¹⁹ Tempo'nyo i Abia nololoi'mo gombuan nu suludadu i Yerobeam, ia nompatundu'mo tino pia-piangkuka na kota ka' kampungnyo anu toto ise-ise'. Kota haha aijo', aijo'mo Betel, Yesana ka' Efron.

²⁰ Tempo'nyo i Abia daagi' nompalentah, i Yerobeam madi'mo noko ala nompo'ule' kakuasa'annyo. Ahennyo ia pinateanmo nu Tumpu.

²¹ Panyo mule', i Abia nompaka daka'mo na kakuasa'annyo. Ia ko bengkele' aha 14 na konjoo'nyo, 22 na anaknyo anu to momo'ane ka' aha 16 na to boboune.

²² Sisikon sangga'at mongkona i Abia, ka' mongkona iwi-iwi' na potataenyo ka' apa-apaa na anu binaunyomo tinulismo i Kitab Sisikon mongkena i Nabi Ido.