2 TAWARIKH 12 - KITAB NU TUMPU ALLA LELE MA'IMAI'

Mesir nontumbuhimo Yehuda

¹ Salatan i Rehabeam nompalentah salaku tomundo nahosonmo, ia ka' iwi-iwi' na mian da'isan aha Israel madi'mo nompajuli atulan nu Tumpu,

² ka' madi'mo nontuluti ia. Kalana aijo' Tumpu nohukumo aha. I taun ko olima'nyomo na i Rehabeam nompalentah i Sisak tomundo nu aha Mesir nontumbuhimo Yerusalem,

³ 1.200 na kareta anu bau pahampate, 60.000 na suludadu anu nonsake'i ajahan ka' suludadu anu madi'mo pinoko bilang na konjoo'nyo, tibamo gombuan nu suludadu Libia, Suki ka' Sudan.

⁴ Ia nompatundu'mo iwi-iwi' na kota' anu ko bentengnyo i Yehuda lantas i lau-lausmo sampe tinoka i Yerusalem.

⁵ Tempo'nyo aitu i Tomundo Rehabeam ka' to pola-polaya' nu Yehuda sinilimu'mo i Yerusalem kalana nopalaimo mae nabuhukmo hi Sisak. I Nabi Semaya tinokamo hi aha ka' nompoto'i, “Sumo uuka na koonyo nu Tumpu, ‘Belemiu nohikumo Aku, jadi uuka aiya Aku suele mohikumo belemiu sahingga belemiu nu kuasaimo i Sisak.’ ”

⁶ I Tomundo ka' to pola-polaya' nongakuimo tukoonyo nu aha, aha binaladosa'mo. Aha notataemo, “Apaa na anu binaumo nu Tumpu aijo' memang adin.”

⁷ Salatan tinoamo nu Tumpu na aha nongakuimo kasala'an, ia po'ule'mo notatae hi Semaya, tukoo-Nyo, “Kalana aha nongakuimo dosa' nu aha, jadi Aku madi'mo monsilakai aha. Ku jagaimo na aha da boli ko anu mompoposia; Yerusalem madi'mo o'idei. Maumo sumo aijo', i Sisak,

⁸ mongkuasaimo aha da nusumbu' nu aha na pompahasala'annyo, palesaya hi belengku ka' palesaya hi anu ola mongkuasai dunia aiya.”

⁹ Sahingga tinokamo na i Tomundo Sisak nontumbuhi kota Yerusalem ka' nompahuhuakonmo to bala-balang anu mahan na olinyo anu kiijo' i Laigan nu Tumpu ka' anu kiijo' i laigan nu tomundo, ka' suele iwi-iwi' na kanta mosoni' anu binau i Tomundo Salomo.

¹⁰ Salaku bolosnyo, i Rehabeam nombaumo to kanta-kanta tambaga, ka' pino'una'nyo hi to sulu-suludadu anu matangkas na pangkatnyo anu monjagai sabatan daka' nu laigan i tomundo.

¹¹ De i tomundo mambamo i Laigan nu Tumpu, aha to mia-mian anu monjagai momboamo mae kanta haha aijo', lapas aijo' po'ule'mo osule'akon i salipi' anu ponjaga'an.

¹² Kalana i Tomundo nongakuimo kasala'an hi Tumpu, ka' mule' kalana daagi' ahi' ko hahan anu ma'ima' i Yehuda sahingga madi'mo Tumpu nontambuha'i i Rehabeam ka' madi'mo ahi nonsilakai ia.

Sisikon tempo'nyo i Rehabeam nompatei kinodo'anmo

¹³ I Rehabeam nompalentah i Yerusalem ka' kakuasa'annyo lebemo nompaka daka'. Umunnyo 41 taunmo tempo'nyo ia tinimbali tomundo ka' nompalentahmo 17 na taun na kinopinyo i Yerusalem, kota' anu pinile'anmo nu Tumpu i da'erah nu Israel songko-songko da bau tampat ponsomban Ia. Tina i Rehabeam i Naama mian nu lipu' Amon.

¹⁴ I Rehabeam nombaumo anu ma'idek kalana ia madi' binala'usaha mombau anu nuka'ima'i nu Tumpu.

¹⁵ Sisikon mongkona i Rehabeam lengkat pe'e momonanyo ia binaumo tomundo sampe ia madi'mo binau tomundo, sisikonnyo tinulismo i kitab sisikon Nabi Semaya ka' i kitab Sisikon Nabi Ido. I Rehabeam ka' i Yerobeam saja' nahampate.

¹⁶ I Rehabeam sinilakamo ka' i lamunmo i pinolamunan to tomu-tomundo i kota Daud. I Abia anaknyo momo'ane na nombolosakon ia binau tomundo.