2 TAWARIKH 1 - KITAB NU TUMPU ALLA LELE MA'IMAI'

I Tomundo Salomo binalado'amo nomoita kapandean

¹ I Salomo anak mo'ane i Tomundo Daud tinimbalimo tomundo anu mahoson hondo na kakuasa'annyo i kalaja'an Israel. Tumpu Allah nombalakatimo ia ka' nompohosonmo hondo kakuasa'annyo.

² Iwi-iwi' na kapala nu gombuan nu suludadu anu 1.000 ka' gombuan nu suludadu anu 100, iwi-iwi' na anu ko pangkatnyo mokalaja i pamalentah, ka' iwi-iwi' na to tu'a-tu'anyo nu auwan nu aha Israel pinalentahmo i Tomundo Salomo,

³ da mamba tiba ia i tampat ponsomban Tumpu anu kiijo' mae i Gibeon. Aha namba nokiijo' kalana i kiijo' mae na Kemah nu Tumpu anu binau i Musa posaihon nu Tumpu tempo'nyo jinojoong i padang anu mateges.

⁴ (Panyo Peti' Palajanjian nu Tumpu kiijo' mae i Yerusalem i uno nu kemah anu pinotinjo i Tomundo Daud da pinompo'una'an Peti' aijo' tempo'nyo ia nolalin mae lengkat i Kiryat-Yearim.)

⁵ Mezbah tambaga anu binau i Bezaleel anak i Uri makumpu i Hur, suele kiijo' mae i Gibeon mompaha ahop Kemah nu Tumpu. I Tomundo Salomo ka' mian da'isan iwi-iwi' monsombahmo Tumpu kiijo' mae.

⁶ I ahop nu Kemah aijo' i tomundo nonsombahkonmo aijo' i mezbah tambaga, 1.000 na binatang salaku koloban anu pinotunu osombahkon hi Tumpu.

⁷ Pihi-pihi aitu Tumpu Allah nompotoamo butongnyo hi Salomo ka' notatae, “Poitamo mae pa'apaa na anu nu kahanda'i aijo' Ku bee'mo hi beleyum!”

⁸ Tinaaman i Salomo, “O Tumpu Allah, pinotoamo nu Belento taalu' belento mongkalibosi ahi' hondo tuumangku i Daud, ka' belento nohangkatmo aku binau tomundo nombolosakon ia.

⁹ Uuka aiya o Tumpu Allah, ku taha'imani da belento sabole-bole ahi' mongganapi janji' nu Belento hi tuumangku. Belento nohangkatmo aku tinimbali tomundo hi bansa anu daka' aiya anu madi'mo opko bilang na konjoo'nyo.

¹⁰ Kalana aijo' bee'i mae na aku kapandean ka' ilimu' anu ku pake mompalentah aha. De madi' sumo aijo', mosia na aku timbali mompalentah mian anu pinalesayamo hi belento anu sumo aiya na konjoo'nyo.”

¹¹ Tinaaman nu Tumpu Allah hi Salomo, “Anu pinoitamo nu beleyum aijo' ma'ima'. Beleyum madi' nomoita kakaya'an kabai halata' kabai da talasanggo, kabai da mate na sampo bali' nu beleyum iwi-iwi', kabai da mantan na umun nu beleyum, panyo kapandean ka' ilimu' da opake mompalentah mian anu pinalesayamo hi belengku anu binee'-Kumo hi beleyum na mongatun.

¹² Kalana aijo' kapandean ka' ilimu' Ku bee'mo hi beleyum. Ka' mule' Ku potimbalimo na beleyum da mompaka bilahi mule' ka' mompaka kaya mule', ka' mompaka talasanggo mule' molingkudui to tomu-tomundo maumo pa' iyaya mae, maumo anu i hikuhakonmo, kabai anu tokaje aiya mae i ahop.”

Kakaya'an ka' kakuasa'an i Tomundo Salomo

¹³ Lapas aijo' pinala'ianmo i Salomo na tampat ponsomban Tumpu aijo' kiijo' i Gibeon anu ko Kemahnyo nu Tumpu lantas ninsusule'mo i Yerusalem. I kiijo' ia nompojalanmo kapalentahannyo hi aha Israel.

¹⁴ Ia nontoukaimo suludadunyo anu opake mahampate 1.400 na kareta, ka' 12.000 na ajahan anu opake mahampate. Sambagian pinojoongnyo i Yerusalem, ka' labinyo mule' pinojoongnyo i kota sangga'at.

¹⁵ Tempo'nyo i Salomo nompalentah mosoni' ka' salaka otoa sumomo balang anu madi' talalo ko olinyo i Yerusalem, pokakanamo sumo batu; ka' kau' Lontio' nu Libanon nanjoo'mo hondo pokakanamo sumo kau' ara anu lewa' opake.

¹⁶ Lengkat hi to daga-dagang anu montulungimo i Tomundo, ajahan opotoka mae lengkat i Mesir ka' Kewe,

¹⁷ ka' to kare-kareta anu opake mahampate opotoka mae lengkat i Mesir, lapas mule' oboa mamba hi to tomu-tomundo 'Het ka' to tomu-tomundo Siria opobaluk olinyo 150 na doi salaka sa'angu' na ajahan, ka' 600 na doi salaka sa'angu' na kareta anu bau pahampate.