2 SAMUEL 7 - KITAB NU TUMPU ALLA LELE MA'IMAI'

I Natan nompoto'imo hi Daud

¹ Tumpu saja' monjagai i Tomundo' Daud da boli nu poposia nu sampo bali'nyo iwi-iwi' sahingga ia noko ala tinataap na jinojoong i laigan nu tomundo' anu aijo' kaka jojoongannyo.

² Sahingga notataemo na i tomundo' hi Nabi Natan, “Soba toa aku aiya jojoong ilaigan nu tomundo, kau' lontio' i Libanon na binau, padahan Peti' Palajanjian nu Tumpu Allah ola opo una' ilaiganku!”

³ Tinaaman i Natan, “Soba pa' apaa na anu nu kahanda'i nu belento Tomundo' baumo kalana Tumpu na montulungi mae belento Tomundo.”

⁴ Panyo pihi-pihi aitu notataemo na Tumpu hi Natan,

⁵ “Lako' ka' poto'i hi Daud posaihon-Ku, na potuunon-Ku sumo uuka: 'Kadaka' beleyumo na mombau laigan-Ku.

⁶ Salatanmo pe'e bansa Israel pinobebas-Ku lengkat mae i Mesir sangkutnyo uuka aiya ma'isa Aku jinojoong i sa'angu' na laigan panyo ola ahi' saja' mamba moyaya ka' jojoong i sa'angu' na kemah.

⁷ Sumo uukamo na kinopinnyo Aku lewa' namba noyaya tiba bansa Israel, ma'isa toho' Aku nompokilawa hi to pola-polaya' anu pinile'an-Kumo, apaa na sababnyo sahingga aha madi' mombaui Aku laigan, te kau' lontio' i Libanon na mamba o ala.’

⁸ Mokonyo aijo' Natan, poto'iakon hi Daud posaihon-Ku, Aku Tumpu Anu Daka' na kuasangku mompoto'i hi ia, 'Beleyum hau-haunyo molaya' domba kiijo' mae i padang ingalang-Kumo ka' ihangkat-Kumo binau tomundo' hi aha mian Israel anu pinalesayamo hi belengku.

⁹ Aku saja'mo nonsangalui beleyum maumo pa' moyaya na beleyum, ka' sampo bali' nu beleyum iwi-iwi' singkapmo ihopu'an-Ku tempo'nyo beleyum nahampate. Beleyum Kupotimbalimo mian anu talasanggo susumo mian anu talasanggo i dunia aiya.

^10-11 Ka' mule' kona hi aha mian Israel anu pinalesayamo hi belengku tinoukan-Kumo na tampat ka' Kupalentahmo na aha jojoong ikiijo' da aha tumuu' madi'mo ko anu mompoposia. Salatanmo pe'e aha tinoka u'utu mae i tano' aiya ka' Aku nohangkatmo to pola-polaya' nu aha, aha tinumbuhanmo nu to mia-mian anu toto ue-uesan panyo aijo' madi'mo po ule' jadi. Aku balajanji' saba' beleyum madi'mo ko anu monsampo bali' ka' ko anu mompoposia ka' Ku bee'imo tulunan na beleyum.

^12-13 Ka' saidi' mae detokamo na ukun nu beleyum, beleyum olamunmo ipinolamunan mompolee' nu belemiu, samian na anak nu beleyum momo 'ane Ku hangkatmo bau tomundo'. Iaje na mombau laigan-Ku. Ku balakatije na kalajaannyo sampe toka sidu-sidutu' ka' samian na lee'nyo mompalentahje salaku tomundo'.

¹⁴ Aku timbalimo tuumanyo ka' ia baumo anak-Ku mo'ane. De ia mombau kasala'an ia Ku hukum susumo samian na tuuma mohukum anaknyo.

¹⁵ Panyo Aku tataap mombau ka'ima'an hi ia susumo anu jinanji'-Kumo. Apaa na anu jinanji'-Kumo hi ia sabole-bole Ku toongi, madi' susumo anu binaung-Kumo hi Saul, ia pinobelenting-Kumo ipangkatnyo da beleyumo na timbali tomundo'.

¹⁶ Beleyum saja' mohumpak lee' ka' Ku pojadije na kalajaan nu beleyum sampe toka sidu-sidutu'. Lee' nu beleyum samian sampe toka sidu-sidutu' na mompalentah salaku tomundo'.’ ”

¹⁷ Lantas pinoto'imo i Natan hi Daud iwi-iwi' apaa na anu pinonyata'mo nu Tumpu Allah hi ia.

Binalado'amo na i Daud salaku montalima kase hi Tumpu

¹⁸ Lantas ninsoopmo na i Tomundo' Daud i uno nu kemah nu Tumpu. Ia sinumuhangmo ka' binala do'amo, “O, Tumpu Anu Matangkas na kakuasa'an aku tiba kami salaigan madi' pantas mohumpak anu ma'ima' iwi-iwi' apaa na anu pinotoamo nu belento Tumpu hi belengku, sumo uukamo na kinopinnyo.

¹⁹ Pakalaus nolabimo na anu binaumo nu belento Tumpu, O tumpu Anu Matangkas na kakuasa'an, belento Tumpu nonjanji'mo hi lee'ku mongkona tempo' anu aiya mae i ahop. Ka' han aijo' pinotoamo nu belento hi belengku maumo aku aiya ola ahi' mian biasa, o Tumpu Anu Matangkas na kakuasa'an.

²⁰ Pa' daagi apaa na ku taloakon hi belento? Belentomo na monsumbu' iwi-iwi' mongkona posaihon nu belento aiya.

²¹ Posi anu jinanji'mo nu belento Tumpu, ka' posi pongka'oho' nu belento Tumpu, Tumpu nombaumo hahan anu daka' da bau salaku pongajan posaihon nu belento aiya.

²² Totu-totu'u daka' na kakuasa'an nu belento, o Tumpu Allah! Ola sa'a-sa'angu'nyomo belento na Tumpu Allah, madi' ko anu pokakana tiba belento. Sinumbu'mo mami na han aijo' kalana pinoto'imo hi kami naipuan pe'e mae.

²³ Songko-songko na dunia madi' ko sa'angu' na bansa anu pokakana sumo Israel. Olamo sa'a-sa'angu'nyo bansa Israel na anu pinobebasmo nu belento, da bolimo timbali posihon da timbalimo mian anu pinalesayamo hi belento Tumpu. Iwi-iwi' na han anu to daka-daka' ka' anu okabangangi, anu binaumo nu belento Tumpu hi aha, sahingga sanggo nu belento tinalasanggomo hi songko-songko na dunia. Aha bansa sangga'at ka' mule' to pilo-pilogot nu aha, i laa'mo nu belento tempo'nyo mian anu pinalesayamo hi belento Tumpu nambamo nahampate.

²⁴ Bansa Israel pinotimbalimo nu belento mian anu pinalesayamo hi belento sampe toka sidu-sidutu' ka' belentomo ahi' o, Tumpu na timbali Tumpu Allah nu Aha.

²⁵ Ka' uuka aiya o, Tumpu Allah de timbali da belento mombalakatiakon mae da sampe toka sidu-sidutu' ahi' janji' anu tinaloakonmo nu belento mongkona butongku aiya tiba lee'ku saidi mae. De timbali apaa na anu jinanji'mo nu belento aijo' obau ahi'.

²⁶ Toka-toka iyaya mae mian saja' mompopodaka' sanggo nu belento Tumpu ka' montaloakon, 'Tumpu Anu Daka' na kuasanyo aijo'mo Tumpu Allah nu aha Israel.' Sahingga sampe toka sidu-sidutu' samian na anu lengkat mae hi lee'ku namompalentah salaku tomundo' hi bansa aiya.

²⁷ O, Tumpu Anu Daka' na kakuasa'an! Pinobaaningkumo na butongku mompotoka do'angku aiya hi belento kalana belento nompoto'imo hi belengku tukoonto makumpungku molapi-lapis na lee' nu aha saja' opotimbali nu belento Tumpu tomundo' hi bansa aiya.

²⁸ O, Tumpu Anu Matangkas na kakuasa'an, Belentomo na Tumpu Allah; iwi-iwi' na anu jinanji'mo nu belento, ninaumo nu belento, ka' han anu ma'ima' aijo' jinanji'mo nu belento hi belengku.

²⁹ Kalana aijo' ku kakaase de timbali balakatiakon mae na lee'ku da sampe toka sidu-sidutu' aha saja' mongoa'i kalibosan nu belento. O, Tumpu Anu Matangkas na kakuasa'an, iwi-iwi' aijo' jinanji'mo nu belento. Sahingga lee'ku sabole-bole ahi' obalakatiakon mae nu belento sampe toka sidu-sidutu'.”