2 SAMUEL 5 - KITAB NU TUMPU ALLA LELE MA'IMAI'

I Daud ihangkatmo binau Tomundo' nu aha mian Israel tiba Yehuda

¹ Lantas tinokamo na to pola-polaya' tulunan nu aha bansa Israel hi Daud kiijo' i Hebron ka' nompoto'i hi ia, “Kami aiya daagi mae julu nu belento Tomundo'.

² Salatanmo pe'e naipuan mae, ka' mule' tempo'nyo i Saul daagi nompalentah kami, belentomo Tomundo' na nongkapali suludadu nu Israel de aha mambamo mahampate, ka' mule' Tumpu binalajanji'mo hi belento Tomundo' na molaya' mian anu pinalesayamo hi Ia, ka' timbaliomo tomundo' nu aha mian Israel.”

³ I Daud nombaumo palajanjian tiba to pola-polaya' nu aha mian Israel haha aijo', lantas ihangkatmo nu aha na ia binaumo tomundo' nu Israel.

⁴ I Daud tempo'nyo ia binau tomundo' umunnyo tolumpulu'mo na taun. Ka' ia nompalentah pinatompulu' na taun na kinopinnyo.

⁵ Kiijo' i Hebron ia nompalentahmo Yehuda pinopitu' ka' mintonga' na taun na kinopinnyo, ka' kiijo' i Yerusalem ia nompalentah tinolumpulu' ka' totolu' na taun songko-songko na Israel tibamo Yehuda.

⁶ Daagi kino sansinaan i Tomundo' Daud tiba to sulu-suludadunyo nambamo nontumbuhi Yerusalem. Aha mian nu Yebus tumpu nu lipu' nu kota' aijo' nonteemo i Daud tukoonyo, nu aha madi' koko na i Daud moko ala mompatundu' Yerusalem. Mokonyo aijo' aha notataemo hi ia, “Beleyum madi' moko ala minsoop mae mo uuka; sadang mian anu to mapi-mapisok, tiba mian anu to pengko-pengko' moko alamo molaa' beleyum.”

^7-9 I Daud notataemo hi to sulu-suludadunyo, “Pa' daagi ko mian anu aiya hi kita mongka'ideki mian nu Yebus susumo aku suele mongka'ideki aha? Totu-totu'u ahi' na ia mongka'ideki aha sahingga o jujuhi' ahi'na mompatei aha? De sumo uuka yo pinsoopmo montulu jalan mae nu uee ka' paha pateimo na anu to pengko-pengko' tiba anu to mapi-mapisok anu ku ku ka'ideki aijo'.” (Mokonyo aijo' tinaloakonmo nu mian, “Mian anu mapisok tiba mian anu pengko' madi' timbali minsoop hi laigan nu Tumpu.”) I Daud noko alamo nongkuasai benteng nu Sion ka' jinojoongannyomo. Ka' sinanggohannyomo “Kota' Daud”. Kota aijo' binaunyo montotonga'i benteng aijo' tinampu'unan lengkat pe'e mae i sasu kabete'an na lewa' tinambunan nu tano' tangka-tangkas sahingga nabungkutmo.

¹⁰ Kakuasa'an i Daud nompaka pahosonmo kalana Tumpu, aijo'mo Tumpu Allah Anu Matangkas na kuasanyo na nontulungimo ia.

¹¹ I Tomundo' Hiram anu kiijo' mae i Tirus nonsaimo mae mian namba hi Daud salaku utusan nu kalaja'annyo, ka' nomboamo kau'lontio' nu Libanon, tiba to tuka-tukang kau' ka' mule' to tuka-tukang mesen da mompotinjoakon laigan nu tomundo'.

¹² Kalana aijo' lebemo hondo sinumbu' i Daud taalu' totu-totu'umo ahi' na ia ihangkatmo nu Tumpu binaumo tomundo' hi aha Israel, ka' nompohosonmo kalaja'annyo da bau kapentingan nu mian anu pinalesayamo hi Tumpu.

¹³ Salatan i Daud nolalinmo lengkat i Hebron nambamo i Yerusalem, ia nongosoai mule' to lalangkoyang pa' aha sangkuka, ka' nongala mule' pa' aha sangkuka na to lalangkoyang binau ambahue'nyo; sahingga nintuangmo na to ana-anaknyo mo'ane ka' boune.

¹⁴ Anaknyo to momo'ane anu i hampe i Yerusalem, aijo'mo: i Syamua, i Sobab, i Natan, ka' i Salomo,

¹⁵ I Yibhar, i Elisua, i Nefeg, i Yafia,

¹⁶ i Elisama, i Elyada, ka' i Elifelet.

Aha mian nu Filistin pinatundu'mo

¹⁷ Salatan ihongomo nu aha mian Filistin na i Daud i hangkatmo binaumo tomundo' nu aha mian Israel, tinokamo mae na aha kahanda' da mohakopmo ia. Panyo ihongomo i Daud na lele aijo', sahingga ia nambamo naninsuluk i benteng.

¹⁸ Mian nu aha Filistin tinokamo i Bangka'nyo nu Refaim ka' jinojoongmo ikiijo' na aha.

¹⁹ I Daud nompokilawamo hi Tumpu, “Pa' ku tumbuhimo na aha mian nu Filistin haha aijo'? Pa' obee'mo mae nu Belento na ka'untungan mahampate hi belengku?” “Tumbuhimo!” na koo-Nyo nu Tumpu. “Ku bee'mo na ka'untungan mahampate hibeleyum!”

²⁰ Lapas aijo' nambamo na i Daud nokiijo' i Baal-Perasim ka' ikiijo'mo na aha suludadu nu Filistin haha aijo' pinatundu'nyo. Lantas ia notataemo, “Tumpu tinokamo nompoko idek benteng nu sampo bali'ku, susumo iaba' ola sinangkinihap nonganjuhahonmo silina na apaa.” Mokonyo aitu tampat kiijo' sinanggohanmo Baal-Perasim.

²¹ Suludadu nu aha mian Filistin nopalaimo madi'mo noko ala nongala ka' nompopalaihakon patong bapilogotan nu aha haha aijo'. Patong haha aijo' ingalamo i Daud tiba suele suludadunyo nongalamo patong haha aijo'.

²² Madi' pinin aha mian nu Filistin tinoka mule' nonjojoongi Bangka'nyo nu Refaim.

²³ Po ule' mule' pinoita i Daud hi Tumpu pa' mosia na koo-Nyo nu Tumpu. Tinaaman nu TUMPU, “Boli montumbuhi aha lengkat i aiya, panyo lajangmo bangkualilit mae lengkat ihiku nu aha.

²⁴ De nu hongomo nu beleyum susumo mian anu lumajang mobalis ituu' nu kau' haha itina' tumbuhimo kalana Aku na lumajang mamba momona mompatundu' suludadu nu aha mian Filistin.”

²⁵ Jadi binaumo i Daud apaa na anu pinalentahkonmo nu Tumpu, ka' ia inguntungmo na nahampate nolaa' aha mian nu Filistin lengkat mae i Geba tinoka-toka i Gezer.