2 SAMUEL 24 - KITAB NU TUMPU ALLA LELE MA'IMAI'

I Daud nolekengmo mian

¹ Tumpu pinusa mule' hi mian nu Israel, lantas sinale'annyo mule' na i Daud da oposusa' mule' na bansa aijo'. Koonyo nu Tumpu hi ia, “Lekengmo na aha mian nu Israel tiba mian nu Yehuda.”

² Lantas pinoto'imo i Daud hi Yoab talenga' nu suludadunyo, “Lako tiba to sulu-suludadu nu beleyum anu matangkas na pangkatnyo hi iwi-iwi' na tulunan nu bansa Israel i songko-songko na lipu' ka' olekeng na mian da ku sumbu' na konjoo'nyo nu aha.”

³ Panyo' i Yoab notatae hi Tomundo' “O' amalakon da Tumpu Allah nu belento Tomundo' mompaka tuangimo mian nu Israel sahingga konjoo'nyo nu aha tempo' uuka pinsa'atumo lipat ka' o' amalakon da belento Tomundo' boli pe'e silaka da otoa pe'e. Panyo' apaa na gunanyo belento Tomundo' mongkahanda'i molekeng sumo aijo'?”

⁴ Panyo' i Tomundo' sabole-bole ahi' mongkakeha'akon palentanyo aijo'. Jadi i Yoab tiba to sulu-suludadunyo anu matangkas na pangkatnyo nambamo nolekeng bansa Israel iyaya mae.

⁵ Salatan aha noko potaapmo kaunyo nu Yordan, i Yoab tiba to sulu-suludadunyo binakemahmo i sasu salatan Aroër, sa'angu' na kota' i totonga' nu bangka'nyo anu kiijo' i da'erah nu Gad. Lengkat i kiijo' aha nambamo i Yaezer asasu utara.

⁶ Lantas i lau-lausmo namba i Gilead ka' i Kades i da'erah nu mian Hed. Lapas aijo' aha nambamo i Dan, lantas lengkat i Dan nonsiopo'akonmo i sasu kinsoban nambamo no kiijo' i Sidon.

⁷ Lengkat i kiijo' aha nambamo i Tirus sasu selatan kota anu ko bentengnyo aijo'. Ka' mule' aha nambamo i to kota-kota iwi-iwi' hi aha mian nu Hewi ka' mian nu Kanaan ka' ahennyo nambamo nokiijo' i Bersyeba i sasu selatan Yehuda.

⁸ Aha no lajangi songko-songko na lipu' i ngosio' na bitu'on ka' inguampulu' na sinaa. Lapas aijo' aha ninsusule'mo i Yerusalem,

⁹ ka' pinoto'imo nu aha hi tomundo' na konjoo'nyo anu i lekenmo aijo'. Konjoo'nyo nu to momo'ane anu timbali o'ala bau suludadu, aha 800.000 na mian hi aha Israel ka' 500.000 na mian hi aha Yehuda.

¹⁰ Panyo' salatan pinoko lekengmo i Daud na bansa aijo' ingoa'annyo ia sinala'mo, lantas ia notataemo hi Tumpu, “O Tumpu, aku talalomo hondo binaladosa'! Ampuniakon mae na aku, kalana pinonga'mo hondo na aku nombaumo sumo aijo'.”

^11-12 Tumpu notataemo hi Nabi Gad anu mompotokakon apaa na koonyo nu Tumpu hi Daud “Lako' mamba poto'i hi Daud tukoongku hi ia totolu' na aha anu opile'i, Maumo pa'apa na anu pile'i nu aha Ku be'mo.” Dodododopnyo salatan i Daud nobulamo,

¹³ i Gad tinokamo nangadap hi ia ka' nompoto'i palenta nu Tumpu aijo', ia notatae “Iya na anu opile'i nu belento Tomundo': lipu' aiya nu tokai mae nu balaa' kasusa'an i anu o kaan kopinnyo totolu' na taun; kabai belento Tomundo' lewa' mopalai nu loloi' nu sampo bali' kopinnyo totolu' na bitu'on kabai lipu' aiya nu kona nu panyakit anu molele kopinnyo tolun sinaa? Soba poto'i mae uuka aiya apaa na tionyo ahi' ku potoka hi Tumpu.”

¹⁴ Tinaaman i Daud, “I beh silakamo na aku! Panyo' de mule' aku nu hukum nu manusia, lebe ma'ima' kita iwi-iwi' nu hukum nu Tumpu, kalana daka' hondo na kalibosan-Nyo.”

¹⁵ Sahingga Tumpu nompotokamo mae panyakit anu molele hi aha mian nu Israel lengkat pe'e daagi' subu sangkut tinoka i tempo' anu tinantukan-Nyomo. Songko-songko na Israel aha 70.000 na mian anu silaka.

¹⁶ Malaekat nu Tumpu anu nomboa mae balaa' kapatean aijo' tinoka-tokamo i tampat ponggilingan gandum anu i Arauna, mian nu Yebus. Salatan tinoa nu Tumpu na malaekat aijo' kahanda'mo mompatei mian nu Yerusalem, Tumpu nombali'imo tanga'an-Nyo, ka' Tumpu madi'mo nohukum bansa aijo'. Pinoto'i-Nyomo hi malaekat aijo', “Injahamo! Bolimo!”

¹⁷ I Daud nontoamo malaekat lewa' nompatei mian da'isan aijo', lantas ia notataemo hi Tumpu, “Aku na binaladosa'mo kalana aku na nombau kasala'an aijo'. Panyo' paya' apaa na kasala'an nu bansa anu binala'mo aijo'? Hukummo mae na aku ka' kami sa'anakan!”

¹⁸ Ka' suele i Gad tinokamo sinaa aitu nangadap hi Daud ka' notatae hi ia, “Tionyo ahi' belento Tomundo' pindakomo mokiita' i tampat ponggilingan gandum anu i Arauna, ka' potinjo na mezba bau ponsomban Tumpu.”

¹⁹ Sahingga i Daud nambamo susumo koonyo nu palentah nu Tumpu anu pinotokamo i Gad hi ia.

²⁰ Tempo'nyo aitu i Arauna hau-haunyo montudang nokaiyong, tinoanyo na i Tomundo' tiba to sanga-sangalunyo aitu mae mamba hi ia. I Arauna tinolodadupumo i ahop i Daud nonsombah ia ka' nompokilawa.

²¹ “Apaa na okahanda'i mae nu belento Tomundo'?” Tinaaman i Daud, “Kahanda' mongoli tampat ponggilingan gandum aiya, aku ko kahanda' mompotinjo mezba ponsomban Tumpu i aiya, da panyakit haha aiya bolimo daagi' molele.”

²² Notatae na i Arauna, “Alamo Tomundo' madi' opai oli ka' sombahkonmo hi Tumpu apaa na anu o'oa'i nu belento ma'ima' Tomundo'. Aiya na sapi' bau koloban anu opotunu ka' kau' anu oposun nu belento Tomundo', alamo na pulu nu pajeko ka' dopi' haha aijo' anu binau pongututan.”

²³ Binee'mo i Arauna aijo' iwi-iwi' hi tomundo' ka' notatae, “O' amalakon da Tumpu Allah i Tomundo' montalima anu osombahkon nu belento Tomundo'.”

²⁴ Panyo' tinaaman i Tomundo' “Boli! Ku oli ahi' aku madi' mongka'oho' monsombahkon apa-apaa hi Tumpu Allah-ngku anu ola i humpaku na balang madi' pinai oli.” Lantas i Daud nongolimo tampat pongututan gandum aijo' ka' sapi' haha aijo' olinyo limampulu' na doi salaka'.

²⁵ Lantas pinotinjomo i Daud na mezba i kiijo' ponsomban Tumpu lantas nonsombahkonmo koloban anu pinotunu ka' koloban anu bau pompodame. Tumpu nontalimamo do'a i Daud ka' panyakit anu momolele aijo' i Israel madi'mo nolele.