2 SAMUEL 23 - KITAB NU TUMPU ALLA LELE MA'IMAI'

Anu pupuusnyomo tinaloakon i Daud

¹ I Daud anak i Isai pinile'anmo binau tomundo' ka' pinotimbalimo nu Tumpu Allah i Yakub sahingga tinimbalimo mian daka'. Iamo na nompotiju' nyanyanyian hi aha Israel. Aiya na anu pupuusnyomo tinaloakon i Daud:

² Roh nu Tumpu Allah notataemo hi belengku da opotokakon; potuunon tiba palentah-Nyo aiya i biwingku.

³ Tumpu Allah i Yakub notataemo; hi belengku anu monjagai Israel nompoto'imo, “Tomundo' anu adin na mompalentah mian da'isan anu mompalentah montuluti Tumpu.

⁴ Ia sumomo jingka nu sinaa anu bete'mo mae daagi subu-subu hondo salatan majingkamo na langit Ia sumomo jingka nu batu nu sinaa de batamo na ujan sahingga hemput molunoumo ma'imamo na otoa ka' malonde'mo.”

⁵ Sumo aijo'mo na lee'ku anu nu balakatimo nu Tumpu Allah, Palajanjian-Nyo hi belengku madi'mo mongabali' anu jinanji'-Nyomo aijo sampe toka sidu-sidutu' ka' madi'mo ko anu kulangnyo iwi-iwi' ta atun hondo. Tumpu Allah na montantukan ka untunganku mahampate ka' mombee'mae iwi-iwi' apaa na anu nu kahanda'i nu kinyonyoangku.

⁶ Panyo mian anu madi' montuluti palentah nu Tumpu sumomo hii' anu ingalinmo Lima nu mian madi' moko ala montoongi ia;

⁷ mau pe'e samian madi' ko anu mongka'oho' mongkanyang ia de madi' mompake kau' kabai besak. Mian haha aijo' nohopu'mo tinoyo'an nu apu.

To sulu-suludadu i Daud anu talasanggo hondo

⁸ Aiya na sanggo nu to sulu-suludadu i Daud anu talasanggo hondo: Anu momona aijo'mo i Ishbaal mian nu Hakhmoni, anu mongkapalai, “Tompukan ko Totolu'nyo” (Triwira). Daagi kinominsan ia nahampate nongewa aha walu'atu na mian ka' nompateimo aha iwi-iwi' nu talombo'nyo.

⁹ Mian anu ko'ohua'nyo i Triwira aijo' aijo'mo i Eleazar anak i Dodo aha mae mian nu Ahohi. Ia nonsangalui i Daud tempo'nyo aha nongahopi mian nu Filistin anu sinihukmo kahanda'mo mahampate. Lantas tempo'nyo aitu gombuan nu suludadu nu Israel tinolo ule'mo,

¹⁰ i Eleazar na sabole-bolemo nahampate ka' nompateimo mian nu Filistin sahingga ia nalawemo hondo. Limanyo i hojokmo sahingga ia madi'mo noko ala nongkakabasakon bajaknyo. Sinaa aitu Tumpu nombee'mo ka untungan nahampate anu daka' hondo hi aha mian nu Israel. Gombuan nu suludadu nu aha Israel anu tinolo ule'mo ninsusule' nokiijo' i tampat pinahampatean i Eleazar. Lantas lewa'mo nongukatakon baju' anu pinusok nahampate nu to bangke-bangke' haha aijo' ikiijo'.

¹¹ Mian anu ko totolu'nyo i Triwira aijo', aijo'mo i Sama anak i Age anu lengkat mae i Harari. Daagi kino minsan mian nu Filistin sinihukmo i Lehi, i sa'angu' na ale' anu ola saja' sanggoleng momea' na pinontugali, gombuan nu suludadu nu Israel nopalaimo nompala'i mian nu Filistin.

¹² Panyo i Sama sabole-bolemo nahampate, nompateimo ka' nompatundu'mo mian nu Filistin sahingga noko alamo nompo ago ale' aijo'. Sumo aijo' nu Tumpu nombee'mo ka untungan nahampate anu daka' hondo.

^13-14 I sinaa sangga'at tempo'nyo ohanimo pongalapan isi nu ale' anu 30 na suludadu i Daud ka' matangkas na pangkatnyo ka anu talasanggo hondo aha totolu' na ninsoop nokiijo' i Liang Adulam. Tempo'nyo aitu i Daud kiijo' i unonyo nu benteng i liang aijo'. Mian nu Filistin binakemahmo i Bangka'nyo nu Refaim.

¹⁵ I Daud lewa'mo nontutugi kampung kinahampeannyo ka' nompoto'imo, “Ah de aku opo inumi pe'e mae uee anu kiijo' i bubung koko sabatan daka' nu kota' Betlehem!”

¹⁶ Salatan aha totolu' na suludadu anu matangkas na pangkatnyo nohongomo aijo', aha nompokiijo'imo kemah nu mian Filistin lantas nontaukmo mae uee nu bubung aijo' ka' binoamo nu aha hi Daud. Panyo i Daud madi' nongka'oho' nonginum ola mule' ahi' binubusakonyo salaku palasombahannyo hi Tumpu.

¹⁷ Ia notatae, “O, Tumpu aku madi' timbali monginum uee aiya! De ku inum sumomo aku nonginum baso' nu to mia-mian anu nomboto'akonmo nyawa nu aha!” Jadi i Daud madi' ahi' hondo-hondo nonginum uee aijo'; Aijo'mo na usaha anu binaumo nu aha totolu' na suludadu anu baani hondo haha aijo'.

^18-19 Aha tolumpulu' na suludadu anu matangkas na pangkatnyo ka' anu tinalasanggomo aijo' sinanggohan mule' “Tridasawira”. Anu mongkapalai aha i Abisai utus ise' i Yoab anak i Zeruya. Ia toho'mo nompatei nu talombo'nyo tolu'atu na mian. Kalana aijo' sahingga ia tinalasanggomo. Panyo ia madi' lebe baani molingkudui “Triwira”.

²⁰ Samian na suludadu sanga'at anu matangkas na pangkatnyo ka' suele talasanggo aijo'mo i Benaya anak i Yoyada mian nu Kabzeel. Ia baani hondo. Ua aha na talenga' anu talasanggo lengkat mae i Moab pinateannyomo. Daagi' kino minsan tempo'nyo nu bakin ia ninsoopmo i sa'angu' na liang, ka' nompateimo sa'angu' na singa ikiijo'.

²¹ Ia mule' toho'mo nompatei mian nu Mesir samian anu mahoson ka' ko toongonnyo talombo'. Ola ingahopan i Benaya nu tokon. Talombo' anu aijo' hi lima nu mian Mesir ingagoannyo lantas pinompateinyomo mian aijo'.

²² Aijo'mo na usaha anu binau i Benaya nahampate, mian anu ninsoop i “Tridasawira”.

²³ I uno nu gombuan aijo' i Benayamo na anu talalo talasanggo panyo ia madi' ahi' molingkudui “Triwira”. Ia i hangkatmo i Daud mongkapalai anu monjagai ia.

^24-39 Mian sangga'at anu minsoop i “Tridasawira” aijo'mo: I Asael utus ise' i Yoab I Elhanan anak i Dodo mian nu Betlehem I Sama ka' i Elika mian nu Harod I Heles mian nu Palti I Ira anak i Ikes mian nu Tekoa I Abiezer mian nu Anatot I Mebunai mian nu Husa I Zalmon mian nu Ahohi I Maharai mian nu Netofa I Heleb anak i Baana mian nu Netofa I Itai anak i Ribai mian nu Gibea i da'erah nu aha tulunan nu bansa Benyamin I Benaya mian nu Piraton I Hidai mian anu jojoong isongko-songko na bangka'nyo nu Gaas I Abialbon mian nu Araba I Azmawet mian nu Bahurim I Elyahba mian nu Saalbon To ana-anak i Yasyen I Yonatan I Sama mian nu Harari I Elifelet anak i Ahasbai mian nu Maakha I Eliam anak i Ahitofel mian nu Gilo I Hezrai mian nu Karmel I Paerai mian nu Arbi I Yigal anak i Natan mian nu Zoba I Bani main nu Gad I Zelek mian nu Amon I Maharai mian nu Beerot anu lewa' montoongakon toongon bau pahampate i Yoab I Ira tiba i Gareb mian nu Yetri I Urim mian nu Het Iwi-iwi' aha tolumpulu' ka' popitu' na mian aijo'mo na suludadu anu talasanggo.