2 SAMUEL 21 - KITAB NU TUMPU ALLA LELE MA'IMAI'

Lee' i Saul pinokonanmo hukuman mate

¹ Tempo'nyo i Daud daagi' nompalentah tinokamo na balaa' kasusa'an i anu okaan tinotolu' na taun na kinopinnyo. Lantas i Daud nomoitamo pokinde' hi Tumpu pa' mosiamo na han anu sumo aijo', jadi pinoto'imo nu Tumpu, “Balaa kasusa'an i anu okaan atina' kalana kasala'an i Saul tibamo aha sa'anakan, aha nompateimo to mia-mian nu Gibeon.” (

² To mia-mian nu Gibeon misa' mian nu Israel; aha mian nu Amori anu minsoop tompukan nu mian anu ola sangkiding. To mia-mian nu Israel nonjanji'mo hi aha madi' mompoposia aha, panyo i Saul nompateimo aha kalana ia nonginau'mo kapalaluan nu mian Israel tiba Yehuda.) Lantas ilagamo i Daud na mian nu Gibeon haha aijo',

³ ka' pinokilawanyo hi aha, “Apaa na anu tionyo ahi' ku bau hi belemiu? Aku ko tanga'an kahanda' montokong kasala'an anu binaumo hi belemiu, da belemiu mombalakati mae mian anu pinalesayamo hi Tumpu.”

⁴ Tinaaman nu aha, “Palakala mami tiba i Saul ka' aha sa'anakannyo madi' opoko ala opoko ima'i nu salaka kabai mosoni', panyo kami mule' madi' ahi' ko kahanda' mompatei mau pe'e ola samian na bansa Israel.” Lantas notataemo na i Daud, “Desumo itina' yo apaa na anu okahanda'i nu belemiu da kubau?”

⁵ Tinaaman nu aha, “I Saul tomundo' anu pinile'anmo nu Tumpu ko kahanda' mompateimo kami iwi-iwi' da kami madi'mo daagi' ko anu otoa hi aha Israel iwi-iwi'.

⁶ Kalana aijo' aha popi-popitu' na mo'ane lee'nyo mae bee'mo mae hi kami da osegot ka' opokalayo'mo mami i ahop nu Tumpu kiijo' i Gigea kota i Tomundo' Saul.” Tinaaman i tomundo', “Ma'ima'mo de sumo itina', aha ku bee'mo.”

⁷ Panyo kalana i Daud tiba Yonatan nompaha sumpa-sumpa'mo samian ka' samian sahingga i Daud madi'ahi' nombee' i Mefiboset anak i Yonatan.

⁸ Anu ingala i Daud aijo'mo i Armoni tiba i Mefiboset, aijo'mo anak mo'ane i Saul ua aha aijo' anu ihampeakon i Rizpa anak i Aya; ka' suele aha olima' na anak mo'ane i Merab, i Merab aiya anak boune i Saul, anak haha aijo' atina'mo anu ihampeakon i Merab langkai'nyo i Adriel anak i Barzilai, aha mae mian nu Mehola.

⁹ Aha binee'mo hi aha mian nu Gibeon lantas aha popi-popitu' aijo' sinilakamo hingga-hinggat sinegot ka' pinokalayo'mo aita i bungkutnyo hi ahop nu Tumpu. Hukuman mate aijo' binee' hi aha tempo'nyo lapasmo na kau' nimbuhak, ka' tempo'nyo aitu pangalapanmo bua'nyo nu jalai.

¹⁰ Lantas i Rizpa ambahue' i Saul nilatasmo nu kalung aijo' i batu anu pipinompo una'an bangke' haha aijo' sika-sikatimpas. I Rizpa madi'mo nompala'i tampat aijo' salatan pe'e pinongalapanmo isi nu ale' sahingga tinokamo na tempo'nyo nu ehua ka' tempo'nyo aitu hon nu kau' nohudu'mo. Sinaa madi' nu pobee' na bangke' haha aijo' nu tungkugi nu to tomo-tomonsi' kabai de malomo dumo nu kaan nu to bina-binatang anu mahangas.

¹¹ Salatan pinoto'imo hi Daud apaa na anu binaumo i Rizpa aijo'

¹² ia nambamo nongala bukunyo i Saul tiba i Yonatan anu kijo' mae hi aha anu jojoong i kota Yabes i Gilead. (Mian haha ikiijo' nontomangmo buku haha aijo' anu kiijo' i bangka'nyo nu kota' Bet-San, tampat nu aha mian Filistin lewa' ponsegotan ka' pompokalayo'an nu aha to bangke-bangke' salatan pinatundu'mo nu aha na i Saul i bungkutnyo nu Gilboa).

¹³ Buku i Saul tiba i Yonatan haha aijo' ingalamo mae ikiijo' lantas suele tinolukanmo na bukunyo nu aha popi-popitu' na mian anu pinokalayo'mo aijo'.

¹⁴ Lapas aijo' buku i Saul tiba i Yonatan haha aijo' tiba bukunyo nu aha popi-popitu' haha aijo' ilamunmo i pinolamunan i Kish tuuma i Saul kiijo' i Zela i da'erah nu aha Benyamin. Salatan iwi-iwi' pinokobaumo susumo koonyo nu palentah i tomundo' Tumpu Allah nontalimamo do'a nu aha, nondo'akon lipu' aijo'.

Mian nu aha Filistin anu toto daka-daka' hondo pinatundu'mo

¹⁵ Mian nu aha Filistin ka' mian nu aha Israel po ule' mule' nahampate. I Daud tiba to sulu-suludadunyo nambamo nahampate nongewa mian nu Filistin. Aha nahampate aijo' i Daud kinainmo.

¹⁶ Mamanga tinokamo mae na mian anu daka' hondo sanggonyo i Yisbi-Benob. Talombo'nyo tambaga na binau ko boatnyo kila-kila totolu' ka' mintonga' na kilogram. Ka' mule' ia nontakos mae bajak anu daagi' ahi' bu'ou, ka' kinila-kilanyo nu pateimo na i Daud.

¹⁷ Panyo i Abisai anak i Zeruya tinokamo mae nontulungi i Daud. Lako'mo ilalubusannyo na mian daka-daka' hondo aijo' ka' pinateannyomo. Lapas aijo' suludadu i Daud nonsale'imo i Daud da bolimo daagi' mamba hingga-hinggat mahampate. “Belento Tomundo' bau kataha'imanan nu mian Israel boli-boli dumo kami madi'mo ko Tomundo'nyo,” na koonyo nu aha.

¹⁸ Po ule' mule' nahampate nongewa aha mian nu Filistin kiijo' mae i Gob. Tempo'nyo nahampate aijo' i Sibkhai mian nu Husa nompateimo samian anu daka-daka' hondo sanggonyo i Saf.

¹⁹ Po ule' mule' nahampate i sinaa sangga'at nongewa aha mian nu Filistin kiijo' i Gob, i Elhanan anak i Yair anu lengkat mae i Betlehem nompateimo i Goliat anu nolengkat mae i Gat. Duhukan nu talombo' i Goliat aijo' ko daka'nyo sumo kau' anu opake montonun.

²⁰ Po ule' mule' nahampate nongewa aha mian nu Filistin kiijo' i Gat. Ikiijo' daagi' ko samian anu daka' hondo ka'mongka'oho' hondo mahampate. Kangkam nu limanyo bubuu' anom i koanan tiba i kowinyo ka' suele i tengkenyo i kowi tiba i koanannyo.

²¹ Ia lewa' mompopo'ambang mian nu Israel, kalana aijo' ia pinateanmo i Yonatan anak i Simea utus tu'a i Daud.

²² Aha opa-opat anu pinateanmo i Daud tiba aha gombuan nu to sul-suludadunyo haha aijo' atina'mo lee' mae nu anu toto daka-daka' hondo kiijo' i Gat.