2 SAMUEL 20 - KITAB NU TUMPU ALLA LELE MA'IMAI'

I Seba nombaumo gau' anu ma'idek

¹ I kota' Gilgal daagi ko samian anu nombaumo gau' anu ma'idek sanggonyo i Seba. Ia anak i Bikri, ia tulunan mae nu bansa Benyamin. Tempo'nyo mian da'isan nolabot i Daud po ule'mo mae tinoka, i Seba nompuuhimo tolompetnyo ka' noloboo'akon, “Kita madi' mompahasumbu' tiba i Daud. Kadaka' kita mombatukimo ia? O, mian nu Israel, pinahasan na kita pinsusule'mo!”

² Sahingga nambamo na aha mian nu Israel haha aijo', nompala'imo i Daud ka' nombatukimo i Seba. Panyo to mia-mian nu Yehuda na tataap ahi' montuluti ka' monsangalui i Daud lengkat pe'e mae i Kaunyo nu Yordan tinoka-toka i Yerusalem.

³ Salatan i Daud tinokamo kiijo' ilaigan nu tomundo' i Yerusalem, aha sampu-sampulu' na ambahue'nyo anu pinala'ianyomo nontamongi laigan nu tomundo' pinojoongnyomo i sa'angu' na laigan ka' ojagai nu suludadu. Apa-apaa na anu nu palalui nu aha oposukupakon na obee', panyo i Daud madi'mo lewa' male' hi aha, jadi aha jinagaanmo madi' timbali momoya, ka' kantumuu'an nu aha sumomo ahi' anu binalumo sanpe silaka.

⁴ I tomundo' nompalentahmo i Amasa, “Paha posihuk mae na aha mian nu Yehuda ka' mambamo mae tiba aha ku tempo'i ola tolunsinaa.”

⁵ Lantas nambamo na i Amasa nomposihuk mae aha panyo ia madi'mo mae ninsusule' salatan tinokamo na tempo'nyo anu pinoto'imo i tomundo' hi ia.

⁶ Sahingga notataemo na i tomundo' hi Abisai, “I Seba aijo' lebemo monsusa'i mae kita molingkuduimo i Absalom. Kalana aijo' boa na suludadungku ka' loloi' na ia, da boli sampe nu kuasai na to kota-kota' anu ko bentengnyo ka' mopalaimo mompala'i kita.”

⁷ Jadi i Abisai na nongkapalai gombuan nu suludadu anu nu toongi i Yoab tiba suludadu anu monjagai i tomundo' tiba iwi-iwi' na suludadu sangga'at nambamo lengkat i Yerusalem nololoi'mo i Seba.

⁸ Salatan aha tinokamo i batu daka-daka' anu kiijo' i Gibeon, i Amasa tinokamo mae nonsingkaboti aha. I Yoab tempo'nyo aitu nompusokmo baju' anu opake mahampate ka' nontakosmo bajak. Salatan ia nokiijo'mo nongahopi tinalabakasmo na salungnyo ka' bajaknyo tinoongannyomo nu kewe'nyo.

⁹ I Yoab notataemo hi Amasa, “Mosiamo na lele sangalu?” ka' tinoongannyomo na jangkut i Amasa nu koanannyo, sinangka i Amasa na i Yoab mongookimo ia.

¹⁰ Madi' tinoa i Amasa na bajak aijo' i kewe' i Yoab. Monti-montiik jinalo'mo i Yoab na kompong i Amasa nu bajaknyo, sahingga isi nu kompongnyo nobubusmo i tano'. Ia balomo i nate tempo'nyo aijo' sahingga i Yoab madi'mo po ule' nonjalo'. Lantas i Yoab tiba i Abisai utusnyo ise' sabole-bolemo nololoi' i Seba.

¹¹ Samian na suludadu i Yoab tinuminjo koko bangke' i Amasa sisinilakamo aijo' ka' notatae daka-daka', “Ihe na monsangaja'i i Yoab tiba i Daud, batuki na i Yoab!”

¹² Bangke' i Amasa anu nindi'mo nu baso' aijo' nanintimpasmo i totonga' nu jalan. Suludadu i Yoab nontoa iwi-iwi' na mian anu motulu ikiijo' sonso' tolotinjo. Kalana aijo' ihela'nyomo na bangke' aijo' nokiijo' i ale' ka' kinukubannyomo nu sabut.

¹³ Salatan bangke' aijo' madi'mo ko anu kiijo' i jalan atina'je ka' mian iwi-iwi' ilumajang lau-laus nombatuki i Yoab da mololoi'mo i Seba.

¹⁴ I Seba noliu-liumo iwi-iwi' na da'erah nu aha tulunan nu bansa Israel, lantas tinokamo i kota' Abel-bet-Maakha sinangaluan mae nu aha iwi-iwi' tulunan i Bikri.

¹⁵ Suludadu i Yoab nohongomo taalu' i Seba kiijo' lantas tinumbuhanmo nu aha na kota' aijo'. Aha nontambunimo nu tano' i pagan mesen nu kota' anu sasu sambiha'nyo ka' mule' nongkekeimo tano' i aluknyo nu pagan mesen aijo', da ohobo'akonmo.

¹⁶ I kota' aijo' daagi ko samian na boune anu pande hondo', ia tinuminjo aita i pagan mesen ka' notatae daka-daka', “Potombihing mae! Potombihing mae! Opoita da i Yoab mamba pe'e mae daagi' ko anu ku poto'i hi ia.”

¹⁷ Lantas tinokamo mae na i Yoab ka' pinokilawamo nu boune aijo', “Belentomo tuan na i Yoab?” “Ii',” na koonyo. Boune aijo' notataemo, “Potombihing mae na potataengku aiya, kita hai Tuan.” “Ma'ima'mo na koonyo i Yoab,” ku potombihingje.

¹⁸ Boune aijo' notataemo, “Naipuan mae to mia-mian lewa' montaloakon sumo uuka, 'De beleyum mompalalui pokinde' lako' i kota Abel' — lantas sumo aijo' na nu bau nu aha.

¹⁹ Kota' mami Abel aiya daka', sala'sa'angu' na kota anu madi' lewa' mombau kahengge'an ka' tulu-tulutan hondo aiya i tano' nu Israel. Kadaka' belento Tuan ko tanga'anmo mongidei? Te ko kahanda'mo na belento Tuan mongidei tano' nu Tumpu?”

²⁰ “Madi' hondo” na koonyo i i Yoab, “aku madi' hondo ko kahanda' mongidei kabai mohansuni kota nu belemiu.

²¹ Aijo' misa' tanga'an mami. Panyo samian na boune sanggonyo i Seba anak i Bikri, anu lengkat mae i daerah nu bungkutnyo Efraim, na nombaumo gau' ma'idek hi Tomundo Daud. Bee'mo mae na ia da ku pala'imo na kota' aiya.” Boune aijo' notatae, “Ubak nu boune aijo' olumbu'akonje mami mae hi belento Tuan lengkat mae aiya i pagan mesen.”

²² Lantas nambamo na ia ka' tiba kapandeannyo aijo' pinotokanyomo na tanga'annyo aijo' hi aha mian nu kota aijo'. Lapas aijo' ubak i Seba pinolomo nu aha ka' ilumbu'akonnyo nu aha nokiijo' hi Yoab. Jadi pinuuhanmo i Yoab na tolompetnyo sahingga suludadunyo nompala'imo kota aijo' lantas ninsusule'mo ilaigan nu aha toto samian. I Yoab suele ninsusule'mo i Yerusalem nangadap hi tomundo'.

Mian anu ko pangkatnyo mokalaja hi Daud

²³ Aiyamo na mian anu singkap ko ko pangkatnyo matangkas anu ihangkat i Daud. Talenga' nu aha Israel iwi-iwi'; i Yoab. Anu mongkapalai gombuan nu suludadu anu monjagai i Daud; i Benaya anak i Yoyada.

²⁴ Anu mongkapalai pakalaja'an opakisa; i Adoram. Anu montoongi doi nu negara; i Yosafat anak i Ahilud.

²⁵ Julutulis nu negara; i Seya. Imam; i Zadok tiba i Abyatar.

²⁶ Imam ilaigan nu tomundo': i Ira anu lengkat mae i kota' Yair.