2 SAMUEL 2 - KITAB NU TUMPU ALLA LELE MA'IMAI'

I Daud ihangkatmo binau tomundo' nu aha Yehuda

¹ Lapas aijo' i Daud nompokilawamo hi Tumpu, “Pa' kita Tumpu mongka'oho'aku mamba mongkuasai sala'sa'angu' na kota' i Yehuda?” “Ii',” Tinaaman nu Tumpu. Pinokilawa i Daud “Kota' anu iya mae?” “Hebron,” na koonyo nu Tumpu.

² Sahingga nambamo na i Daud nokiijo' i Hebron tiba ua-ua'aha na bengkele'nyo: i Ahinoam boune nu aha mian Yizreel, ka' i Abigail balu i Nabal boune nu aha mian Karmel.

³ Sumo aitu mule' to sulu-suludadunyo tibamo auan nu aha toto samian nombatukimo i Daud lantas aha aijo' jinojoongmo kiijo' i Hebron ka' iwi-iwi' na da'erahnyo.

⁴ Lapas aijo' to mia-mian nu Yehuda nambamo i Hebron ka' nohangkatmo i Daud binau tomundo' nu aha mian Yehuda. Salatan ihongomo i Daud na aha mian nu Yabesh anu kiijo' i Gileat nolamunmo i Saul,

⁵ ia nonsaimo mian namba nokiijo' da mompotoka potuunon, “O'amalakon da Tumpu mombalakati belemiu kalana belemiu nompotoamo kanonongan nu belemiu hi tomundo' nu belemiu, nolamunmo bangke'nyo.

⁶ Mokonyo' aijo' o'amalakon da Tumpu mompotoa kalibosan-Nyo ka' kanonongan-Nyo hi belemiu. Aku suele mompalentahje belemiu ma'i-ma'ima' kalana belemiu nombaumo sumo aijo'.

⁷ Posahaan na kinyonyoa nu belemiu ka' baumo na apa-apaa susumo suludadu anu baani hondo! I Saul tomundo' nu belemiu memang sinilakamo, panyo aha mian nu Yehuda nohangkatmo aku binau tomundo' nu aha.”

I Isyboset ihangkatmo binau tomundo' nu aha Israel

⁸ Talenga' nu suludadu i Saul anu mongkapalai suludadu iwi-iwi' aijo'mo i Abner anak i Ner, nopalaimo tiba i Isyboset anak i Saul, nambamo i Mahanaim i santoa nu Kaunyo Yordan.

⁹ I kiijo' mae i Isyboset i hangkatmo i Abner binau tomundo' da mompalentah da'erah-da'erah Gilead, Asyuri, Yizreel, Efraim, tiba Benyamin, ka' mule' songko-songko na Israel.

¹⁰ I Isyboset umunnyo patompulu'mo na taun tempo'nyo ihangkat binau tomundo' nu aha mian Israel, ka' ia nompalentah ingohua' na taun na kinopinnyo. Panyo tulunan nu bansa Yehuda tataap montuluti i Daud,

¹¹ ka' i Daud kiijo' i Hebron nompalentahmo Yehuda pinopitu' ka' mintonga' na taun na kinopinnyo.

Israel tiba Yehuda nahampatemo

¹² Daagi kino sansinaan i Abner lengkat mae i Mahanaim namba nokiijo' i kota Gibeon, sinangaluan nu suludadu i Isyboset.

¹³ Ka' suele i Yoab (tinanyo sanggonyo i Zeruya) tiba suele suludadu i Daud nambamo i kota' aijo'. Ohu-ohua' na gombuan nu suludadu anu mompaha bali' aijo' nompaha ahopmo ikolam Gibeon; i Abner tiba to sanga-sangalunyo sinumuhang i santoanyo sasu aijo' mae, i Yoab tiba to sanga-sangalunyo sinumuhang i santoanyo sasu aijo' mae.

¹⁴ Lantas notataemo na i Abner nokiijo' hi Yoab, “Mosia da suludadunto opokaumo da bakutanding!” Tinaaman i Yoab, “Timbali.”

¹⁵ Lantas nokiijo'mo na aha sampulu' ka' ohua' na mian tulunan mae i Benyamin anu mowakini i Isyboset, ka' suele aha sampulu' ka' ohua' na mian suludadu i Daud.

¹⁶ Aha toto samian nompaha totoongimo bulu nu ubak nu samian ka' nompaha jalo-jalo'mo kompong nu samian, sahingga sinilakamo na aha hingga-hinggat. Mokonyo aijo' tampat kiijo' i Gibeon sinanggohanmo “Ale' nu Bajak”.

¹⁷ Lapas aijo' nahampatemo ide-idek na aha, i Abner tiba suludadu nu Israel pinatundu'mo nu suludadu i Daud.

¹⁸ Aha toto-totolu' na anak i Zeruya tempo'nyo aitu daagi aijo'mo: i Yoab, i Abisai, tiba i Asael. I Asael de mopadeka' malia' hondo sumo jonga,

¹⁹ sahingga sabole-bolemo i loloi'nyo na i Abner.

²⁰ Siniloi mae i Abner ka' pinokilawanyo, “Pa' beleyumo na i Asael?” Tinaamannyo, “Li'.”

²¹ “Boli mae ololoi' na aku!” na koonyo i Abner. “Soba hakop na sala' samian na suludadu haha aijo' ka' alamo na toongon nu aha!” Panyo i Asael sabole-bolemo ahi' nololoi' ia.

²² Po ule' mule' pinoto'inyo hi ia, “Boli mo mae ololoi' na aku! Dumo beleyum ku pateimo. Jadi mosiaje na aku montoa ohup nu utus nu beleyum tu'a-tu'anyo i Yoab aijo'?”

²³ Salatan i Asael madi' ahi' tinolo tinjo panyo sabole-bole ahi' nololoi' binunu'akonmo i Abner na talombo'nyo no kaiyong ka' kinonamo i kompong i Asael sahingga talombo' aijo' ilampasan tinoka-toka ihikunyo. I Asael tinombahangkangmo ka' sinilakamo itampat aijo'. Iwi-iwi' na mian salatan tinokamo itampat kinatombahangkangannyo madi'mo nololoi'.

²⁴ Panyo i Yoab tiba i Abisai sabole-bolemo ahi nololoi' i Abner. Salatan batu nu sinaa nakakinsapmo tinokamo na aha i Bungkutnyo nu Ama anu i sasu kabete'an Giah mompatuimo mokiijo' padang anu mateges Gibeon.

²⁵ Ikiijo' mae aha mian tulunan nu bansa Benyamin suele nosa'angu'mo hi Abner lantas nongatun suludadu da sinihukmo i bawo nu sa'angu' na bungkutnyo.

²⁶ I bungkutnyo aijo' iloboo'akonmo i Abner nokiijo' hi Yoab, “Pa' sabole-bole ahi' kita saja'mo mahampate? Madi' nu sumbu' na mahampate susumo aiya, misa' ola ahi' mompodaagi' kasusa'an? Kami aiya to utu-utus nu beleyum sa'a-sa'angu'mo na bansanto. Hipianje na beleyum mompalentah suludadu nu beleyum da madi'mo mololoi' mae kami?”

²⁷ Tinaaman i Yoab, “Ko Tumpu Allah anu tumuu' na bau sakisi de beleyum madi' notatae mae tantu suludadungku sabole-bole ahi' mololoi' belemiu, sampe toka dodop subu.”

²⁸ Lantas pinuhanmo i Yoab na tolompetnyo salaku tanda toka hi to sulu-suludadunyo da bolimo mololoi'aha mian nu Israel, sahingga madi'mo nahampate.

²⁹ I Abner tiba to sulu-suludadunyo sinampahu na aha ilumajang nontulu Bangka'nyo nu Yordan lantas notaapmo i Kaunyo nu Yordan, ka' sabole-bolemo ahi' ilumajang sampe dodododopnyo sinansinaa tinokaje na aha i Mahanaim.

³⁰ Salatan i Yoab madi'mo nololoi' i Abner, pinosihuknyomo na suludadunyo iwi-iwi'. I Asael na sinilakamo ka' mule' aha sampulu' ka'osio na suele sinilakamo.

³¹ Suludadu i Daud nompateimo aha 360 na mian aijo'mo suludadu i Abner tulunan mae nu bansa Benyamin.

³² Lapas aijo' i Yoab tiba to sulu-suludadunyo nomboamo bangke i Asael ka' ilamunmo nu aha na ia ikubulan nu aha sa'anakan. Lantas aha nambamo sinampahu ijalan sahingga tinokamo i Hebron dagi subu-subu hondo.