2 SAMUEL 19 - KITAB NU TUMPU ALLA LELE MA'IMAI'

I Yoab nompoto'imo kasala'an i Daud

¹ Daagi' ko anu nompoto'i hi Yoab tukoonyo nu aha i Tomundo' Daud lewa'mo nohaangi ka' nombaumo adat nu tomate kalana i Absalom sinilakamo.

² Sahingga ka untungan nahampate sinaa aitu tinimbalimo kasusa'an nu suludadu i Daud iwi-iwi' kalana aha nohongomo i Tomundo' nohaangimo anaknyo momo'ane.

³ Aha ninsusule'mo hoko-hokot i kota' salaku suludadu anu na'ambangmo kalana nopalaimo maelengkat kiijo' mae nahampate.

⁴ I Tomundo' nongkukubimo ohupnyo ka' lewa'mo nolotando'. “O anaku! Anaku Absalom! Absalom anaku!”

⁵ I Yoab nambamo nangadap hi tomundo' ka' nompoto'i, “Sinaa aiya belento Tomundo' nongambangimo suludadu nu belento Tomundo' padahan ahamo na nompotuu' nyawa nu belento Tomundo', nyawa nu to ana-anak mo'ane ka' to bou-boune nu belento Tomundo', bengkele' tiba ambahue' nu belento Tomundo'.

⁶ Belento Tomundo' mongkalibosi mian haha aijo' anu mongka'ideki belento Tomundo' panyo belento Tomundo' mongka'ideki mian haha aijo' anu mongkalibosi belento Tomundo'! Nanasamo hi to sulu-suludadu anu matangkas na pangkatnyo ka' hi to sulu-suludadu iwi-iwi' na belento Tomundo' madi'mo hondo-hondo nompalesaya aha. Aitu pe'e tantu belento Tomundo' lebe sanang de bisuanyo sinaa aiya i Absalom na tinumuu' ka' kami iwi-iwi' na sinilaka.

⁷ Jadi tionyo ahi' belento Tomundo' mosabat ka' mompotenang kinyonyoa nu to sulu-suludadu nu belento Tomundo'. Aku basumpa i uno nu sanggo nu Tumpu de belento Tomundo' madi' mosabat mompahakabot aha, saba pihi uuka aiya mau pe'e ola samian madi'mo ko anu mongka'oho' monsangalui belento Tomundo'. Aijo' timbalimo sa'angu' na balaa' anu daka' hondo anu nu oa'i nu belento Tomundo' saidi' mae sidu-sidutu' i uno nu kantumuu'an.”

⁸ Sahingga tinuminjomo na i tomundo' ka' nosabat ka' sinumuhangmo koko sabatan daka'. To sulu-suludadunyo nohongomo taalu' kiijo'mo lantas aha iwi-iwi' tinokamo mae nangadap. Tempo'nyo aitu iwi-iwi' na gombuan nu suludadu nu aha Israel nopalaimo ka' ninsusule'mo ilaigan nu aha toto samian.

I Daud ninsusule'mo namba i Yerusalem

⁹ Aha iwi-iwi' na tulunan nu bansa Israel pinainggagamo. Koonyo nu aha “I Tomundo' Daud nompotumuu'mo kita da madi' pinatean nu aha Filistin ka' madi'mo pinoposia nu sampo bali' sangga'at panyo uuka aiya ia nopalaimo da madi'mo nu poposia i Absalom ka' nompala'imo lipu' aiya.

¹⁰ I Absalom na kahanda' ohangkato bau tomundo' panyo uuka ia sinilakamo nahampate. Kadaka' madi'mo daagi' ko samian anu bala usaha da i Tomundo' Daud mamba o'ala po ule' osule'akon mae?”

¹¹ Potatae haha aijo' tinokamo hi Tomundo' Daud. Kalana aijo' sinainyomo na i Imam Zadok tiba i Imam Abyatar da mompokilawa hi to pola-polaya' nu aha Yehuda sumo uuka, “Kadaka' belemiu tinongkoimihimo na namba mae nongala ka' nonsangalui i tomundo' minsusule' ilaigan nu tomundo'?

¹² Te misa' belemiu sampoto'utusanku ahi' mae ka' daagi' ahi' julungku mae? Kadaka' belemiu mule' ahi' na tinongkoimihi momoita da aku minsusule'mo?”

¹³ Ka' mule' i Daud nompokaumo aha da mompoto'i hi Amasa sumo uuka, “Temisa' beleyum suele julungku mae ahi'? Uuka aiya beleyum ku hangkatmo bau talenga' nu suludadungku pombolosi i Yoab. Tumpu Allah na monsilakai mae aku de madi' ku totu'ui na anu tinaloakonkumo aiya!”

¹⁴ Sumo aijo' na i Daud nongala kinyonyoa nu aha iwi-iwi' mian nu Yehuda sahingga aha nompotuunmo i tomundo' da minsusule'mo mae ilaigan nu tomundo' hingga-hinggat tiba iwi-iwi' mian anu ko pangkatnyo.

¹⁵ Lantas nambamo na i tomundo' ka' salatan tinokamo i Kaunyo nu Yordan tempo'nyo aitu mian nu Yehuda haha aijo' tinokamo mae i Gilgal da molabot i tomundo' ka' monsangalui ia motaap i kaunyo aijo'.

^16-17 I Simei anak i Gera, mian mae nu aha Benyamin aijo' nomboamo mae aha samadala na mian tulunan mae nu bansa Benyamin, ka' nambamo mae lia-lia' nojajalan mian nu Yehuda haha aijo' molabot i tomundo'. Sumo aijo' mule' na i Ziba posaihon nu aha sa'anakan mae i Saul, tiba sampulu' ka' olima' na anaknyo anu to momo'ane ka' aha uampulu' na posaihonnyo; aha notaapmo i Kaunyo nu Yordan momona ma'isa pe'e tinoka na i tomundo'.

¹⁸ Aha nontulungimo sa'anakan hai tomundo' notaap ka' nongkalajamo apa-apaa na anu pinalentahkon i tomundo hi aha. Salatan i tomundo' kahanda'mo motaap i kaunyo, i Simei tinolodadupumo nonsombah i ahopnyo ka' notatae,

I Simei kinanononganmo i Daud

¹⁹ “Ku kakase de timbali belento Tomundo' madi'mo montoa mae aku daagi' sabole-bole ko kasala'anku. De timbali kolilimimo mae Tomundo' apaa na anu binaungkumo tempo'nyo belento Tomundo' nompala'imo Yerusalem.

²⁰ Aku sininsumbu'mo taalu' aku nombaumo dosa', jadi kalana aijo' to tulu-tulunan nu bansa anu jojoong i da'erah utara akumo na anu momona tinoka mae nolabot belento Tomundo' sinaa aiya.”

²¹ Nohongo potatae aijo' i Abisai anak i Zeruya notataemo, “I Simei pantasmo na ohukum mate kalana ia nongkutukimo tomundo' anu pinile'anmo nu Tumpu.”

²² Panyo i Daud notatae i Abisai, ka' hi Yoab utusnyo tu'a, “Boli mae monggalo'i pikilanku. Kadaka' belemiu momposusa'mo mae aku? Sinaa aiya aku po ule'mo binau tomundo' nu aha Israel ka' madi'mo timbali ko mian nu Israel anu ohukum mate.”

²³ Lapas aijo' binasumpa'mo na i tomundo' da nu hongo i Simei, “Aku mangaku monjagai beleyum da madi'mo mohumpak hukuman mate.”

I Mefiboset suele kinanononganmo i Daud

²⁴ Ka' suele i Mefiboset makumpu i Saul tinokamo da suele molabot i tomundo'. Ia madi'mo toho' nombaso'i tengkenyo, madi'mo toho' nonggunting jangkutnyo ka' madi'mo toho' nombaso'i baju'nyo salatanmo pe'e i Tomundo' Daud nompala'imo Yerusalem, sampe ia po ule'mo ninsusule' mae ma'i-ma'ima' madi' ko anu nompoposia.

²⁵ Salatan i Mefiboset tinokamo lengkat mae i Yerusalem nolalabot i tomundo', i tomundo' notataemo hi ia, “O Mefiboset kadaka' beleyum madi'mo nombatuki mae aku tempo'nyo aitu?”

²⁶ Tinaamannyo, “Belento Tomundo' Anu Talasanggo tantu monsumbu'mo saba' aku aiya pengko'. Aku nompokaumo posaihonku da montoukai keledai anu ku sake'i da mombatuki belento Tomundo'. Panyo aku ola binaleko'an nu posaihon aijo'.

²⁷ Ka' mule' anu madi' totu'u sinisiknyomo hi belento Tomundo' anu ola mongidei sanggongku. Panyo belento Tomundo' sumomo ahi' malaekat nu Tumpu Allah. Kalana aijo' baumo pa' apaa na anu o'oa'i nu belento ma'ima' Tomundo'.

²⁸ Mau mule' aha sa'anakan nu tuumangku mohumpakmo hukuman mate hi belento Tomundo' panyo aku aiya pinobee'mo nongkaan hingga-hinggat tiba belento Tomundo' ilaigan nu tomundo'. Jadi uuka aiya aku madi' mo baani mongkakase apa-apaa hi belento Tomundo'.”

²⁹ Tinaaman i tomundo', “Bolimo beleyum pilenje mompoto'i apa-apaa. Tinantukankumo na halata' i Saul iwi-iwi' obee'mo hi beleyum ka' hi Ziba.”

³⁰ Lantas tinaamanmo i Mefiboset, “Sahanyo i Zibamo na mongala iwi-iwi'. Aku sinanangmo kalana belento Tomundo' ninsusule'mo mae ma'i-ma'ima' madi' ko anu nompoposia mae.”

I Barzilai suele kinanononganmo i Daud

³¹ I Barzilai mian nu Gilead aijo' suele tinokamo lengkat mae i Rogelim da monsangalui i tomundo' motaap i Kaunyo nu Yordan,

³² I Barzilai i langkai'mo hondo, umunnyo walumpulu'mo na taun. Ia kaya hondo ka' daagi tempo'nyo i tomundo' jinojoong i Mahanaim u'utu mae, i Barzilai na lewa' mompotoukai anu nu kaan i tomundo'.

³³ I Tomundo' notataemo hi ia, “Imbo' da mamba tiba aku i Yerusalem, apa-apaa na anu nu palalui nu beleyum kiijo' mae ku talakiniakonje ahi'.”

³⁴ Panyo tinaaman i Barzilai, “Aku madi'mo pin na tumuu'. Jadi madi'mo kokaliangannyo na aku mamba tiba belento Tomundo' i Yerusalem?

³⁵ Umunku walumpulu'mo na taun, ka' madi'mo ko anu timbali momposanang kinyonyoangku. Madi'mo ko anu ku oa'i sanang na anu ku kaan kabai ku inum, ka' madi'mo moko ala mohongo anu manyanyi. Aku monsansalamo belento Tomundo'.

³⁶ Madi'mo pantas na aku mohumpak tambo anu sumo itina' na ko daka'nyo. Aku ola monsangalui belento Tomundo' to pia-pialangkas lengkat aijo' i santoa nu Kaunyo Yordan.

³⁷ Lapas aijo' aku minsusule'mo ilaiganku, ka' silakamo kiijo' koko tampat pinolamunan tuumangku, panyo aiya na anakku i Kimham. Pobee' da iamo na monsangalui belento Tomundo' ka' baumo pa' apaa na anu otoa nu belento Tomundo' ma'ima' hi ia.”

³⁸ Tinaaman i Tomundo', “I Kimham ku boamo ka' ku ulusje susumo anu nu kahanda'i nu beleyum ka' iwi-iwi' apaa na anu pinoitamo nu beleyum itina' hi belengku ku podaagije.”

³⁹ Lapas aijo' i Daud tiba suludadunyo iwi-iwi' notaapmo i Kaunyo nu Yordan. Lantas ingokanmo i Daud na i Barzilai ka' siniloloamo hi ia. Lapas aijo' ninsusule'mo na i Barzilai ilaigannyo.

Mian nu Yehuda tiba mian nu Israel nahanggagamo topo-topo tomundo'

⁴⁰ Iwi-iwi' na gombuan nu suludadu nu aha Yehuda ka' suele sambagian na suludadu nu aha Israel nonsangaluimo i tomundo' notaap i kaunyo. Lapas aijo' i tomundo' nambamo lau-laus i Gilgal ka' suele i Kimham nombatukimo ia.

⁴¹ Mamamnga mian nu Israel iwi-iwi' tinokamo mae nangadap hi tomundo' ka' notatae hi ia, “Kita Tomundo' kadaka' to utu-utus mami mian nu Yehuda montaloakon tukoonyo nu aha, aha ahi' na ko hak molabot ka' monsangalui i Tomundo' tiba sa'anakan i Tomundo' iwi-iwi' tiba to sulu-suludadu i Tomundo' motaap i Kaunyo nu Yordan?”

⁴² Lantas tinaamanmo nu aha mian nu Yehuda, “Memang ahi' kalana i tomundo' daagi' ahi' julu mami mae. Kadaka' belemiu motambuha'mo? Te anu opalalui mami sansina-sinaa i tomundo'mo na nontanggungi, kabai pinalasenannyomo na kami?”

⁴³ Tinaaman nu aha mian Israel, “Hak mami hi tomundo' lebe daka' pinsampulu' lipat molingkudui hak nu belemiu maumo ahi' i tomundo' daagi julu miu mae. Kadaka' belemiu montemo mae kami? Boli okolilimi, saba' kamimo ahi' na momona hondo nonsale'i da mambamo po ule' o'ala mae na i tomundo'!” Panyo aha mian nu Yehuda na lebe baani na monggagakon sahingga ihungku'an nuaha na mian nu Israel, ka' madi' nongka'oho' tinundu'.