2 SAMUEL 15 - KITAB NU TUMPU ALLA LELE MA'IMAI'

I Absalom kino niatmo anu ma'idek

¹ Lapasa aijo' i Absalom nompotokamo sa'angu' na kaleta tibamo ajahannyo anu opake mahampate ka' aha limampulu' na mian anu monsangalui ia.

² Sansina-sinaa daagi subu-subu i Absalom mobulamo lantas ia tuminjomo isohipi' nu jalan koko sabatan daka' ilaigan nu tomundo'. Toto samian na anu toka mae mongkalak palakalanyo hi tomundo' nu laga ka' nu pokilawa i Absalom, koonyo, “Beleyum lengkat mae hi tulunan ihe?” Ka' de mian aijo' montaami, “Lengkat mae hi tulunan nu bansa aiya kabai aijo',”

³ nu poto'imo i Absalom, “De koonyo nu atulan, na beleyum na kona ahi' madi' sala', panyo ola sala'nyo madi' ko wakin nu tomundo' anu mohongo palakala nu kalak atina'.”

⁴ Lapas aijo' po ule' mule' nu taloakon, “Soba de aku na timbali mian kopian tantu toto samian na anu toka mae mongkalak pahantuda'an kabai montuntut apa-apaa timbali toka mae hi belengku, ku ulusje ma'i-ma'ima'ka' adin hondo.”

⁵ De ko anu mokiijo' hi Absalom tolodadupumo ka' monsombah ia, nu salanggu'mo i Absalom na lima nu mian aijo' ka' nu ookimo.

⁶ Sumo aijo' na i Absalom mombau de ko mian nu Israel kahanda' toka mae mongkalak palakalanyo hi tomundo', jadi tiba jalan anu sumo aijo' na i Absalom mongala kinyonyoa nu aha mian Israel.

⁷ Salatan ingopatmo nataun pinoto'imo i Absalom hi Tomundo' Daud, “Papa, pobee' pe'e mae na aku mamba i Hebron mompilapasi anu jinanji'kumo hi Tumpu.

⁸ Kalana tempo'nyo aku daagi jinojoong kiijo' mae i Gesur, lipu' nu aha Siria, aku binajanji'mo mamba monsombah Tumpu kiijo' mae i Hebron de daagi Nu balakati mae na aku minsusule' i Yerusalem.”

⁹ Tinaaman i Tomundo', “Lako'mo ka' ma'i-ma'ima' mae.” Lantas nambamo na i Absalom i Hebron.

¹⁰ Panyo ma'isa pe'e ia namba sinainyomo na to mia-mian namba hi iwi-iwi' na tulunan nu bansa Israel da mompotokakon potuunon, “De ohongomo nu belemiu na onyi' nu tolompet, loboo'akonmo taalu' i Absalom binaumo tomundo' kiijo' i Hebron!’ ”

¹¹ Anu lengkat mae i Yerusalem aha ua' atu na mian nonsangalui mae i Absalom namba i Hebron. Madi' nu sumbu-sumbu' nu aha na kasangaja'an aijo' sahingga aha iwi-iwi' suele nambamo madi' pa' ko anu binata-bata.

¹² Lantas hau-haunyo i Absalom nonsombahkonmo koloban ia mule' ahi' nonsaimo mian namba i kota' Gilo da molaga mae i Ahitofel, sala'samian anu lewa' mompokinde'i Tomundo' Daud. Sumo aijo' na kasangaja'an anu ma'idek hi Tomundo' lebemo nompaka pahoson ka' nompaka panjoo'mo na anu mombatuki i Absalom.

I Daud nopalaimo nompala'imo Yerusalem

¹³ Lapas aijo' ko anumo nomboa mae lele nompoto'i hi Daud, “Mian nu Israel haha aijo' nosangaja'mo tiba i Absalom.”

¹⁴ Lantas pinoto'imo i Daud hi iwi-iwi' na mian anu ko pangkatnyo kiijo' i Yerusalem, “Imbo' kita mopalaimo, Ola aiya na jalan da kita madi' nu patei i Absalom. Madi' pin ia tokamo mae. Donganmo palia-lia' dumo kita nu loloi'mo mae ka' nu patundu'mo sahingga mian iwi-iwi' i kota' aiya nu pateimo!”

¹⁵ “Ma'ima'mo sumo itina'mo Tomundo'” na pinontaami nu aha. “Maumo pa' apaa na anu nu kahanda'i nu belento Tomundo' obaumo mami.”

¹⁶ Lantas nambamo na i tomundo' ka' sinangaluanmo nu aha sa'anakan tiba to mia-mian anu ko pangkatnyo, ola to amba-ambahue'nyo na madi' namba aha sampulu' jinojoongmo montamongi laigan nu tomundo'.

¹⁷ Salatan i tomundo' tiba iwi-iwi' na anu nonsangalui, ilumajangmo nompala'imo kota, aha daagi tinolotinjo koko laigan anu i pupuusnyomo nu kota.

¹⁸ Iwi-iwi' na anu ko pangkatnyo mokalaja hi tomundo' tinuminjomo i sohipi'nyo salatan gombuan nu suludadu anu monjagai i tomundo' notulumo so' noliu-liu aha. Ka' suele ano atu na suludadu anu nombatukimo mae lengkat i Gat, tinuminjomo nojiji' i ahopnyo.

¹⁹ Nontoa aijo' i tomundo' notatae'mo hi Itai, anu mongkapalai aha ano atu na suludadu haha aijo', “Kadaka' beleyum suele nombatukmo mae kami? Sahanyo beleyum pinsusule'mo ka' paninggalumo tiba i tomundo' anu sala'je ihangkat. Temisa beleyum aiya mian ahi' anu i salipu'an mae, anu nopalaimo mae lengkat i lipu' nu belemiu?

²⁰ Ma'isa pinin na beleyum jinojoong i aiya, te toho' mule' beleyum ku palentah lewa' moyaya tiba aku? Aku aiya madi'mo kusumbu' pa' moyamo na kalambananku. Pinsusule'mo ka'poboamo na to sanga-sangalu nu beleyum anu sangko bansa nu belemiu, o'amalakonje da Tumpu mongkalibosi beleyum ka' saja' montoa beleyum.”

²¹ Panyo tinaaman i Itai, “Belento Anu Talasanggo, i uno nu sanggo nu anu tumuu' ka' kalana nyawa nu belento Tuanku, maumo pa' moya na belento Tuanku mamba, ku batuki, mau mule' mongahopimo kapaten.”

²² “Yo ii'mo desumo itina'” na koonyo i Daud, “Lajangmo lau-laus!” Sahingga i Itai ilumajangmo hingga-hinggat tiba to sulu-suludadu iwi-iwi' ka' aha sa'anakan iwi-iwi'.

²³ Iwi-iwi' na aha mian da'isan ihumaangmo ka' nolotando'mo, salatan aha nompala'imo kota'. Lantas i tomundo' notaapmo i panga' nu Kaunyo Kidron ka' suele binatukanmo nu to sulu-suludadunyo lantas i lumajangmo na aha nokiijo'mo i padang anu mateges.

²⁴ I Imam Zadok tiba i Imam Abyatar suele batu-batuk tiba aha mian nu Lewi anu momboa Peti' Palajanjian nu Tumpu. Peti' Palajanjian nu Tumpu aijo' daagi koko-koko, ka' ma'isa timbali ohangkat de ma'isa pe'e mian da'isan iwi-iwi' mompala'imo kota aijo'.

²⁵ Lantas notataemo na i tomundo' hi Zadok, “Sule'akon na Peti' Palajanjian aijo' i kota'. De daagi nu ka'ima'i nu Tumpu na aku tantu aku daagi po ule' Nu pobee' minsusule' mae montoa Peti' Palajanjian aijo' tiba tampat kajojoongannyo.

²⁶ Panyo de Tumpu madi'mo mongka'ima'i aku, yo yayamo ahi' pa' mosia na pongka'oho'-Nyo hi butongku aiya.”

²⁷ Po ule' mule' i tomundo' notatae hi Zadok, “Ende na i Ahimaas anak nu beleyum tiba i Yonatan anak i Abyatar ka' pinsusule'mo na belemiu i kota' boli mabuhuk.

²⁸ Ku tanda'ije kiijo' koko tampat anu lewa' potaapan i kaunyo i padang anu mapeges, sahingga ku humpakmo na lele lengkat mae hi belemiu.”

²⁹ Lantas i Zadok tiba i Abyatar nomboamo Peti' Palajanjian aijo' sinule'akonmo i Yerusalem ka' aha mule' jinojoongmo kiijo' mae.

³⁰ Lapas aijo' ingukatakonmo i Daud na sapatunyo. Ia tiba iwi-iwi' na sangalunyo nondakomo i Bungkutnyo nu Zaitun ka' i humaangmo ka' ningkukumbungmo salaku tanda nontoongimo adat nu tomate.

³¹ Salatan pinoto'imo hi Daud na i Ahitofel suele naninggalumo ka' nosangaja'mo hi Absalom, i Daud binalado'amo sumo uuka, “O Tumpu de timbali da pokinde' i Ahitofel boli mingkaliangan!”

³² Salatan i Daud tinokamo aita mae i bawo nu puge'nyo itampat anu saja' ponsomban nu mian Tumpu ia ilalabotmo nu sangalunyo anu mompahasumbu' hondo, aijo'mo i Husai mian nu Arki. Baju' i Husai nobeakmo ka' ubaknyo kinakambuhannyomo nu abu'.

³³ I Daud notataemo hi ia, “De beleyum mombatukimo mae aku, ku pangakuimo na beleyum.

³⁴ Panyo beleyum montulungi mae ahi' aku, de beleyum minsusule'mo i kota' ka' basisik hi Absalom, nu poto'i sumo uuka: uuka aiya beleyum montulutimo ia ma'i-ma'ima' ka' mombaumo apa-apaa na anu opalentahkon susumo beleyum nontulutimo palentah nu tuumanyo u'utu mae. Tiba jalan anu sumo aijo' iwi-iwi' na pokinde' i Ahitofel madi'mo mingkaliangan.

³⁵ I Imam Zadok tiba i Abyatar suele kiijo' mae. Poto'i hi aha iwi-iwi' apaa na anu ihongomo nu beleyum aiya hi laigan nu tomundo'.

³⁶ I Ahimaas anak i Zadok tiba i Yonatan anak i Abyatar suele nombatuki tuuma nu aha, jadi aha suele kiijo' mae. Anak haha itina' na nu sai mae hi belengku da toka mae monsisik lele iwi-iwi' anu ihongomo nu beleyum.”

³⁷ Maka i Husai sangalu i Daud ninsusule'mo no kijo i Yerusalem, kina kona i Absalom tinoka ikijo'.