2 SAMUEL 14 - KITAB NU TUMPU ALLA LELE MA'IMAI'

I Yoab nongusahakonmo da i Absalom minsusule'mo mae

¹ Sinumbu'mo i Yoab na i Tomundo' Daud talalomo hondo lewa' monginau' ka' nolibosmo hi Absalom,

² kalana aijo' pinokilaganyomo mae na boune samian anu pande hondo jojoong kiijo' i Tekoa. Salatan boune aijo' tinokamo, pinoto'imo i Yoab hi ia, “Kita totina mingadi-adi' au'aitu hau-haunyo montoongi adat nu tomate; pusok na baju' anu biasa opake de ko mian silaka ka' bolimo mompake minya-minya'. Obau susumo boune anu pininmo na lewa' nohaangi mian anu sinilakamo, te mian anu nu kanonongi hondo.

³ Lapas aijo' mambamo hi tomundo' poto'i hi ia sumo uuka.” Lantas pinoto'imo i Yoab apaa na anu tinyo ahi nu poto'i nu boune aijo.

⁴ Lantas nambamo na boune aijo' nangadap hi tomundo' ka' ia tinolodadupumo ka' nonsombah ka' notatae, “Tuanku Anu Talasanggo, tulungiakon mae na aku!”

⁵ Pinokilawa i tomundo' hi ia, “Mosiamo?” Tinaaman nu boune aijo', “Aku aiya samian na balu anu kasiasi. Langkai'ku sinilakamo.

⁶ Aku ko anak mo'ane ua aha, daagi kino sansinaan aha nahantuda'mo kiijo' mae i padang. Kalana madi' kino mian anu nongga'at sahingga samian na sinilakamo pinatean.

⁷ Ka' uuka aiya sampoto'utusanku iwi-iwi' nongka'idekimo mae aku, ka' nontuntutmo mae da ku bee'mo na anku anu nonompatei aijo' hi aha da ohukumo nu aha nu hukuman opateimo, kalana ia nompateimo utusnyo. De ku bee'mo na anak aijo', memenyomo aku sausa madi'mo ko sangalungku. Anu bau kataha'imananku nu pateimo nu aha, yo aitu memo ai-aijo'nyo, ka' madi'mo daagi ko samian na anak mo'ane anu ihumpaku hi langki'ku da molee'akon tulunannyo.”

⁸ Tinaaman i Tomundo', “Pinsusule'mo” “ku ulusje na palakala aijo'.”

⁹ “Tuanku Anu Talasanggo,” na koonyo nu boune aijo; “maumo pa' apaa na obau nu belento Tuanku, aku tiba kami sa'anakan na montanggungi de ko apa-apaanyo imihinyo mae; Belento Tuanku tiba sa'anakan nu belento Tuanku madi' ko kasala'an.”

¹⁰ Tinaaman i tomundo', “De ko mian motomuhuk hi beleyum boa mae na ia hi belengku, da madi'mo saja' ia mompoposia beleyum.”

¹¹ Boune aijo' notataemo, “De timbali balado'a na belento Tuanku hi TUMPU Allah nu belento Tuanku da mian anu kahanda' mombalosakon kalana anaku aijo' nompateimo, bolimo mombau han anu lebe ma'idek mule' ihe na monsumbu' aha kahanda'mo suele mompatei anaku anu memenyomo samian aijo'.” Tinaamanmo i Daud, “I uno nu sanggo nu Tumpu anu tumuu', anak nu beleyum aijo' madi'mo opoposia mau pe'e ola o'ende-endengi.”

¹² Lantas notataemo na boune aijo', “Tuanku Anu Talasanggo, pobee' pe'e mae da aku motatae sangkiding.” “Timbali,” na koonyo i tomundo'.

¹³ Boune aijo' notataemo, “Kalana belento Tuanku notataemo sumo itina', belento Tuanku nangakumo taalu' belento Tuanku suele sinala'mo kalana madi'mo mompobee' mae anak nu belento Tuan momo'ane anu kiijo' mae i tano' majo'on da minsusule'mo mae. Kadaka' belento Tuanku nombaumo kasala'an anu sumo aijo' hi mian anu pinalesayamo hi Tumpu Alla?

¹⁴ Kita suele iwi-iwi' silaka; kita aiya sumomo uee anu nobubusmo i tano' madi'mo opoko ala po'ule' opolimu'. Tumpu Allah madi'mo po'ule' mompotumuu' mian anu sinilakamo; kalana aijo' tionyo ahi' o'usahakaon nu belento Tuanku da mian anu binoamo i tano' majo'on po'ule' mae minsusule'.

¹⁵ Aku mamba mae nangadap hi belento Tuanku kalana aku ingohano mae nu mian. Lantas tinutuganku lebe ma'ima' ku sisik hi belento Tuanku ka' mule' ku taha'imani apaa na anu ku kakase aiya opopo ii' mae nu belento Tuanku.

¹⁶ Kututugi belento Tuanku mompotombihing mae ka' momposalamatmo mae aku da mian bolimo mae ko tanga'an kahanda' mompatei aku tiba anaku. Aha ko tanga'an molaa'mo kami da opala'imo na tano' anu binee'mo nu Tumpu Allah hi mian anu pinalesayamo hi Ia.

¹⁷ Ku palesaya hondo-hondo na janji' nu belento Tuanku aijo' timbalimo momposalamat aku, kalana belento Tuanku sumomo malaekat nu Tumpu Allah anu moko ala montoa apaa na anu ma'ima' ka' mule' apaa na anu ma'idek. O'amalakon da Tumpu Allah nu belento Tuanku na monjagai mae belento Tuanku!”

¹⁸ Tinaaman i tomundo', “Daagi ko anu ku pokilawa hi beleyum, soba taami mae hodi-hodi'.” “Soba poto'i mae kita Tuanku,” na koonyo nu boune aijo'.

¹⁹ I tomundo' notatae, “Tantu i Yoab na nonsai mae beleyum?” Boune aijo' nontaami, “Kalana mongianu' nyawa nu belento Tuanku, aku madi' mompohowini hi belento Tuanku. Memang totu'u kita Tuanku, i Yoab na nompoto'i mae hi belengku apaa na anu tionyo ahi' ku bau ka' ku poto'i.

²⁰ Panyo ia nombau sumo aijo' da palakala aijo' sampa o ulus ima-ima'. Kita Tuanku pande sumomo malaekat nu Tumpu Allah sahingga monsumbu' iwi-iwi' apa-apaa na anu jinadimo.”

²¹ Lapas aijo' ilagamo i tomundo' na i Yoab ka' pinoto'inyomo hi ia, “Apaa na anu nu kahanda'i aijo' ku situjuimo. Lako'mo mamba lagamae na i Absalom ka' poboamo mae na ia.”

²² I Yoab tinolodadupumo nonsombah i ahop i Daud ka' notatae, “O'amalakon da Tumpu Allah mombalakati belento Tomundo'! Uukaje ka' sinumbu'ku taalu' belento Tomundo' mongkanonongi ahi' mae aku kalana belento Tomundo' nompopo ii'mo mae apaa na anu pinoto'ingkumo.”

²³ Lantas nambamo na i Yoab i Gezur nolaga i Absalom da minsusule'mo mae i Yerusalem.

²⁴ Panyo i tomundo' madi' ahi' nompobee' i Absalom jojoong ilaigan nu tomundo'. “Aku madi' mongka'oho' montoa ia,” na koonyo i tomundo'. Jadi i Absalom balomo ninsusule' namba iposi laigannyo ka' madi'mo nangadap hi tomundo'.

I Absalom pinosumpiamo tiba i Daud

²⁵ I Absalom opuji' salaku mian anu olitau hondo hi aha songko-songko na Israel. Madi' ko anu moko ala molingkudui ko olitaunyo aijo'. Lengkat pe'e i pala nu tengkenyo sawe-sawe' aita' i puus nu ubaknyo madi' gana ko anu opisala'i.

²⁶ Ubaknyo hambokon hondo ka'ia monggunting sataun minsan, kalana nu oa'i maboatmo hondo. Ubak anu nu guntingakon koboatnyo madi' ola ohua' na kilogram de otimbang nu timbangan nu tomundo'.

²⁷ I Absalom ko anak mo'ane aha totolu' ka' samian na anak boune anu langkoyang hondo sanggonyo i Tamar.

²⁸ Ohua'mo na taun na i Absalom jinojoong i Yerusalem, panyo ma'isa toho' siningkabot tiba i tomundo'.

²⁹ Sahingga daagi kino sansinaan ia nolagamo i Yoab da nusai mamba mangadap hi tomundo' panyo i Yoab madi' nongka'oho' tinoka mae, po ule' mule' ilaga i Absalom panyo i Yoab madi' ahi' tinoka mae.

³⁰ Lapas aijo' notataemo na i Absalom hi to posa-posaihonnyo, “Osumbu' nu belemiu na ale' i Yoab isambiha' nu ale'ku anu sisinu'anannyo nu jelai? Mamba papu na ale'nyo aijo'.” Sahingga nambamo pinapu nu aha.

³¹ Sahingga i Yoab tinokamo mae hi laigan i Absalom ka' nompokilawa, “Kadaka' to posa-posaihon nu beleyum nompapumo ale'ku?”

³² Tinaaman i Absalom, “Kalana beleyum ilagangku madi mongkaoho toka mae. Kahanda' ku sai na beleyum mamba mangadap hi tomundo' ka' mompotoka anu ku pokilawa sumo uuka, ‘Apaa na gunanyo aku nompala'imo mae Gezur ka' ninsusule'mo mae i aiya? Sahanyo aku jinojoongmo kiijo' mae.’ ” Ka' po ule' mule' tinaloakon i Absalom, “Soba usahakon da aku timbali mangadap hi tomundo', ka' de daagi ahi' aku ko kasala'an halala'mo na aku obee'i hukuman opatei.”

³³ Lapas aijo' nambamo na Yoab nangadap hi Tomundo' Daud ka' nompotokakonmo apaa na anu nu kakase i Absalom. Lantas ilagamo i tomundo' na i Absalom ka' I Absalom tinokamo tinolodadupu nonsombah i ahop i tomundo'. Ka' ilalabotmo i tomundo' lantas ingookanmo i tomundo' na ia.