2 SAMUEL 12 - KITAB NU TUMPU ALLA LELE MA'IMAI'

I Natan nompokinde'imo i Daud sahingga i Daud nompele-pele'mo

¹ Lapas aijo' Tumpu nonsaimo i Nabi Natan da mamba hi Daud. I Natan nambamo hi ia ka' nompoto'i, “Daagi ko mian ua'aha jojoong i sa'angu' na kota'; samian kaya ka' samian mule' kasiasi.

² Mian anu kaya aijo' manjoo' hondo na potuu'onnyo,

³ panyo mian anu kasiasi aijo' ola sa'angu' na anak nu domba anu ingolinyo. Anak nu domba aijo' pinotuu'nyomo sahingga dinaka'mo ilaigannyo hingga-hinggat tiba to ana-anaknyo. Anak nu domba aijo' nu bee'i mongkaan kaanon anu nu kaan nu mian aijo', ka' mule' monginum i mangko'nyo ka' hoyot i kamale'annyo; memang ahi' nu bau susumo posi anaknyo boune.

⁴ Daagi kino sansinaan mian anu kaya aijo' kino mianmo anu sinonso'. Mian anu kaya aijo' madi' nongkolot domba kabai sapi'nyo da okola' bau pompokaan mian anu sinonso' aijo'. Panyo domba nu mian anu kasiasi aijo' na ingalanyo ka' kinola'nyo binau pompokaan mian anu sinonso' hi ia aijo'.”

^5-6 Nohongo aijo' i Daud pinusamo hondo kalana mian anu kaya aijo' nombaumo sumo aijo' sahingga ia notataemo, “Uesan hondo na mian anu kaya aijo'! I uno nu sanggo nu Tumpu anu tumuu' mian aijo' tionyo ahi' mombolosiakon anak nu domba aijo' pimpaton lipat na konjoo'nyo hi ia ka' ia tionyo ahi' ohukum mate!”

⁷ I Natan notataemo hi Daud, “Belentomo Tomundo' na mian ai-aijo'! Ka' sumo uuka na pinoto'i mae nu Tumpu, Tumpu Allah nu Israel, 'Beleyum ihangkat-Kumo binau tomundo' hi aha mian nu Israel ka' mule' pinosalamat-Kumo da madi' pinatean i Saul.

⁸ Kalaja'an i Saul tiba to bengke-bengkele'nyo binee'-Kumo hi beleyum ka' mule' beleyum ihangkat-Kumo binau tomundo' nu aha Israel tiba Yehuda. De aijo' ma'isa sukup tantu daagi Ku paka bee'i beleyum sumo aijo' na konjoo'nyo.

⁹ Kadaka' beleyum madi'mo nompajuli anu pinalentahkon-Kumo? Kadaka' beleyum nombaumo kalakuan anu ma'idek susumo aijo'? I Uria pinoki patean nu beleyum i uno nu pahampatean; pinobakasmo nu beleyum na ia da pinatean nu aha mian Amon, ka' mule' ingosoanmo nu beleyum na bengkele'nyo.

¹⁰ Kalana beleyum madi' nontuluti Aku, ka' mule' ingalamo nu beleyum na bengkele' i Uria, saba' batu-batu lee' nu beleyum molapi-lapis mae daagi ko anu nu patei nu mian.

¹¹ Ku sumpa'akon na beleyum da nu tokai mae nu balaa' anu lengkat mae hi posi sa'anakan nu beleyum. Ku ala na to bengke-bengkele' nu beleyum i ahop nu mata nu beleyum ka' Ku bee' hi mian sangga'at anu mongkamale'i aha sonsu'un sinaa.

¹² Pinohuwini nu beleyum na nombau dosa', panyo Ku potoamo na ka'idekan nu kinyonyoang-Ku da nu toa nu mian Israel iwi-iwi'.’ ”

¹³ Lantas notataemo na i Daud hi Natan, “Aku binaladosa'mo hi Tumpu.” Tinaaman i Natan, “Tumpu mongampunimo belento Tomundo'; jadi belento Tomundo' madi'ahi' silaka.

¹⁴ Panyo kalana belento Tomundo' nongambangimo Tumpu kalana nombaumo anu susumo aijo', anak mo'ane nu belento Tomundo' anu salaje' ihampe aijo' na tionyo ahi' silaka.”

¹⁵ Lapas aijo' i Natan ninsusule'mo ilaigannyo. Anak i Daud anu momo'ane, anu ihampe hi Batsyeba balu i Uria pinosakitmo nu Tumpu.

Anak i Daud anu momo'ane sinilakamo

¹⁶ Lantas i Daud binalado'amo hi Tumpu da anaknyo aijo' ma'alin. Ia lewa'mo binapuasa' ka' de malommo ia male'mo isalo nu salipi'nyo sampe mopatas.

¹⁷ Lantas to pangka-pangkat anu matangkas na pangkatnyo i uno nu kalaja'an nambamo hi ia ka' pagala ahi' monsale'i da ia mobula, panyo ia madi' ahi' nongka'oho' ka' madi' ahi' nongkaan hingga-hinggat tiba aha.

¹⁸ Salatan sina'angu'mo na duminggu anak aijo' sinilakamo, ka' to posa-posaihon i Daud nabuhukmo na nompoto'i hi ia. Notataemo na posi-posi aha aijo', “Tempo'nyo anak aijo' daagi tutuu' i tomundo' madi' mongka'oho' mohongo de kita motatae hi ia. Apaa mule' uuka aiya anaknyo momo'ane aijo' sinilakamo! Boli-boli dumo ia minoo'mo!”

¹⁹ Salatan i Daud nontoa posaihon haha aijo' lewa'mo no'oyong nangalati'mo na ia taalu' anaknyo aijo' sinilakamo. Lantas pinokilawanyomo hi aha, “Pa' anaknyo aijo' sinilakamo?” Tinaaman nu aha, “Ii' kita Tomundo'.”

²⁰ Jadi nobulamo na i Daud aijo' male-male' isalo lantas nindii'mo ka' binasubatmo ka' mule' nombolosimo baju'nyo. Lapas aijo' ia nambamo ilaigan nu Tumpu nonsombahmo Tumpu. Lapas aijo' ia ninsusule'mo mae ilaigan nu tomundo' ka' nomoitamo nongkaan na ia, lantas ia nongkaanmo.

²¹ Nontoa han aijo' to posa-posaihonnyo notataemo hi ia, “Kami madi' mangalati' pa' mosia na belento Tomundo'. Tempo'nyo anak aijo' daagi tutuu', belento Tomundo' binapuasa' ka' mule' lewa' nohaangi ia, panyo salatan ia sinilakamo belento Tomundo' nobulamo ka' mule' nongkaanmo!”

²² “Ii',” tinaaman i Daud, “memang aku lewa'mo binapuasa' ka' ihumaangmo tempo'nyo anak aijo' daagi tutuu' kalana kututugi: Ihe na monsumbu' Tumpu daagi mongkalibosi mae aku ka' daagi ko kahanda' mompotumuu' akon mae anak aijo'.

²³ Panyo uuka aiya salatan ia sinilakamo apaa na daagi ko kaliangannyo de aku daagi sabole-bole bapuasa'? Te aku moko ala po'ule' mompotumuu'? Aku suele saidi mae mamba-mambamo ahi' i tampat kaka jojoongannyo, ka' uuka aiya ia madi'mo minsusule' mae hi belengku.”

I Salomo i hampemo

²⁴ Lantas i Daud nohase'mo kinyonyoa i Batsyeba bengkele'nyo lantas inale'mo tiba ia. I Batsyeba nohampeakonmo samian na anak mo'ane anu sinanggohanmo i Daud na ia i Salomo.

²⁵ Tumpu mongkalibosi anak aijo' ka' nonsaimo i Nabi Natan da mamba monsanggohi anak aijo' i Yedija, kalana Tumpu mongkalibosi ia.

I Daud nompatundu'mo Raba

²⁶ Tempo'nyo aitu i Yoab daagi hau-haunyo lewa' mahampate mongewa Raba puso nu kota' nu lipu' Amon, ka' malia'mo nu patundu'.

²⁷ Lantas ia nonsaimo namba hi Daud ka' nompoto'i, “Aku nontumbuhimo Raba ka' kinuasankumo na uee anu bau posadiaon nu aha.

²⁸ Jadi uuka aiya de timbali Tomundo' posihukmo na suludadu anu ma'isa namba mae nahampate, ka' pimpinmo mae na montumbuhi da opatundu'mo na kota' aijo'. Tiba jalan anu sumo aijo' saidi' mae madi' nu taloakon nu mian, koonyo nu aha aku na nompatundu' kota' aijo'.”

²⁹ Lantas pinosihukmo i Daud na suludadunyo iwi-iwi' ka' nambamo nontumbuhi kota Raba, tinumbuhannyomo ka' pinatundu'nyomo.

³⁰ Songko' nu tomundo' nu aha ingalamo i Daud anu aijo' songko-songko' hi tomundo' nu aha ka' pinosongko'nyomo i ubaknyo. Songko' nu Tomundo' aijo' kila-kila 35 kilogram na ko boatnyo ka' ko mai-mainannyo ma'ima' hondo. Ka' mule' manjoo' hondo na to bala-balang anu pinahuhuakon mae i kota' aijo'.

³¹ Ka' mule' mian nu kota' aijo' binoamo nu aha ka' pinalentahmo nu aha da momboa galagaji, pason, bobolo' ka' mule' aha binee'anmo kalaja i tampat pombauan batu tela. Sumo aijo' mule' na pinombaunyo to kota-kota' sangga'at anu i da'erah Amon. Lapas aijo' i Daud tiba iwi-iwi' na suludadunyo ninsusule'mo i Yerusalem.