2 SAMUEL 10 - KITAB NU TUMPU ALLA LELE MA'IMAI'

I Daud nompatundu'mo aha mian nu Amon tiba aha mian nu Siria

¹ Madi' pinin ilapas na aijo', i Nahas tomundo' nu aha mian Amon sinilakamo, ka' i Hanun anaknyo momo'ane i hangkatmo binau tomundo'.

² Lantas notataemo na i Tomundo' Daud, “I Nahas bela'ku anu manonong hondo. Jadi aku mule' tionyo mobela'mo ahi' tiba i Hanun anaknyo.” Kalana aijo' i Daud nonsaimo mian namba ilipu' Amon da mohase i Hanun kalana tuumanyo sinilakamo.

³ Salatan aha tinokamo i Amon aha to pola-polaya' nu lipu' aijo' notataemo hi Tomundo' Hanun, “Boli belento Tomundo' bapikin i Daud nonsaimo mae mian haha aijo' kalana ia kahanda' moholomati tuuma nu belento Tomundo'! Ia nonsai mae mian haha aijo' ola salaku mian anu mamba mae mondoyoni kota' aiya da timbali nupoko ala nupatundu' nu aha.”

⁴ Lantas ihakopmo i Hanun na mian haha aijo' anu sinai mae i Daud ka' kinisnyomo na jangkut nu aha sambiha' ka' mule' kinolongannyomo na baju' nu aha, me toka i peko'an na ko kodo'nyo ka' sinainyomo na aha ninsusule'.

⁵ Panyo aha na ambangmo na ninsusule' ilipu'nu aha. Salatan han aijo' pinoto'imo hi Daud pinotuunnyomo da mian haha aijo' jojoong pe'e mae i Yerikho sampe jangkut nu aha po ule'mo tumuu'.

⁶ Lapas aijo' aha mian nu Amon sininsumbu'je saba' kalakuan nu aha aijo' nonsabapimo da i Daud mongka'idekimo aha. Mokonyo aijo' aha nontamboimo ahamian nu Amon 20.000 na mian suludadu nu Siria anu jojoong i Bet-Rehob tiba Zoba, ka' mule' 12.000 na mian suludadu lengkat mae i Tob, tiba tomundo' nu Maakha ka' 1.000 na mian suludadunyo.

⁷ Salatan ihongomo i Daud na han aijo' pinalentahnyomo na i Yoab tiba suludadunyo iwi-iwi' da mambamo otumbuhi na sampo bali' nu aha.

⁸ Mian nu Amon nosabatmo mae ka' nomposadiamo suludadu nu aha i ahop nu sabatan daka' nu kota' nua ha aijo'mo kota' Raba ka' suele mian nu Siria, mian nu Tob tiba Maakha nomposadiamo suludadu nu aha i padang.

⁹ Tinoa i Yoab taalu' ia tinumbuhanmo mae suludadu nu sampo bali' lengkat mae aita i ahop ka' mule' aitu mae i hiku. Kalana aitu ia nompile'imo suludadu nu Israel anu otaha'imani ka' pino una'nyomo na aha mompaha-paha ahop tiba suludadu nu Siria.

¹⁰ Labinyo nu suludadu nu Israel sangga'at, binee'nyomo hi Abisai utusnyo ise, na momposadia suele suludadunyo mompaha-paha ahop tiba suludadu nu Amon.

¹¹ I Yoab nompoto'imo hi utusnyo ise aijo', “De aku madi'mo moko ala mongewa suludadu nu Siria malia-lia' sampa mae tulungi na aku; ka' suele de beleyum madi'mo moko ala mongewa suludadu nu Amon, aku tokaje mae montulungi beleyum.

¹² Pohoson na kinyonyoa ima-ima'! Imbo' babaani mae na kita mahampate montinjohakon bansanto tiba to kota-kota' nu Tumpu Allah. O'amalakon da Tumpu mombaumo apa-apaa na anu nu kahanda'i.”

¹³ I Yoab tiba suludadunyo nambamo nontumbuhi sahingga suludadu nu aha Siria nopalaimo.

¹⁴ Salatan aha mian nu Amon nontoa suludadu nu Siria nopalaimo aha suele nopalaimo madi'mo nongewa i Abisai lantas ninsusule'mo i kota'. Noko lapas na nahampate tiba mian nu Amon, i Yoab ninsusule'mo i Yerusalem.

¹⁵ Mian nu Siria nonsumbu'mo taalu' aha pinatundu'mo nu mian Israel, kalana aijo' ilagamo nu aha na suludadu nu aha iwi-iwi' da po ule'mo si huk mae.

¹⁶ Lantas i Tomundo' Hadadezer nompoto'imo da toka mae na aha mian nu Siria anu kiijo' mae i sasu kabete'an Kaunyo nu Efrat sahingga tinokamo, na aha i Helam tinanasakon mae i Sobakh, talenga' nu suludadu i Tomundo' Hadadezer lengkat mae i Zoba.

¹⁷ Nohongo lele aijo' i Daud nomposihukmo lia-lia' suludadu nu Israel iwi-iwi' lantas notaapmo i Kaunyo nu Yordan ka' nokiijo'mo i Helam. Ikiijo' aha mian nu Siria nomposaimo suludadu nu aha lantas nontumbuhimo suludadu i Daud.

¹⁸ Panyo aha mian nu Israel nompahantutukakonmo suludadu nu Siria, i Daud tiba suludadunyo nompateimo 700 na mian anu mompojalan kaleta anu pinake mae nu aha nahampate, tiba 40.000 na suludadu anu monsake'i ajahan; ka' mule' i Sobakh talenga' nu suludadu nu sampo bali' tinadokmo hondo na binelaon sahingga ia sinilakamo daagi hau-haunyo mahampate.

¹⁹ Salatan aha to tomu-tomundo' anu nu kuasai i Hadadezer nontoa taalu' aha pinatundu'mo nu suludadu nu aha Israel, aha nomoitamo da baladamemo, lantas tulutmo hi aha mian Israel. Lengkat pe'e i aijo' mian nu Siria madi'mo binaani na montulungi aha mian nu Amon.