2 PETRUS 2 - KITAB NU TUMPU ALLA LELE MA'IMAI'

To gulu-gulu' anu madi' totu'u

¹ Tempo'nyo naipuan mae mian anu palesayamo hi Tumpu itina' hi komiu ko anumo tinimbali to nabi-nabi anu madi' totu'u. Sumo aijo' mule' itina' hi komiu saidi' mae ko anumo timbali to gulu-gulu' anu madi' totu'u. Aha mompogulu' to panga-pangajalan anu madi' totu'u, anu mombinasai mian. Ka' aha saidi' mae mompojalomo Anu Matangkas na kuasanyo anu nompobebasmo aha. Tiba jalan anu sumo aijo' aha mompotokamo kasilaka'an i posi butong, anu madi'mo pin nuta'upmo nu aha.

² Mau mule' sumo aijo', nanjoo'mo na mian nombatukimo jalan nu kantumuu'an nu to gulu-gulu' anu madi' totu'u aijo' anu kinuasanmo nu napisu nu aha. Ka' pakalaja'an nu to gulu-gulu' haha aijo' nonsaduakonmo da nanjoo'mo na mian nonjojoamo Jalan Anu Totu'u mamba hi Tumpu.

³ Kalana aha mangoa, sahingga to gulu-gulu' anu madi' totu'u aijo' nonsisikakonmo hi belemiu to sisi-sisik anu o posi kalang da bau pohumpakan ka'untungan hi belemiu. Panyo anu momputusi monabu'akonmo hukuman hi aha pininmo na pinosadia, ka' kabinasa'an anu tinantukanmo bau bagi nu aha hau-haunyomo montanda'imo aha.

⁴ To mala-malaikat pe'e anu baladosa' madi' nu pojohok nu Tumpu da opobebas madi' mohumpak hukuman, panyo o'alin i uno nu nalaka. Aha oposoopmo i uno nu bolo' anu pintung da opo'una' i kiijo' sampe toka i Sinaa Pomputusianmo.

⁵ Sumo aitu mule' na dunia tempo'nyo naipuan mae, Tumpu madi' mompojohok aha da opobebas madi' o hukum. Tumpu nompotoka mae iaba' daka' i dunia nu to mia-mian anu ma'idek tempo'nyo aitu. Ola i Nuh tiba popitu' na mian sangga'atnyo na anu pinosalamat, kalana i Nuh nompolelemo lele mongkona kantumuu'an anu nuka'ima'i nu kinyonyoa nu Tumpu.

⁶ Pokakanamo na balu-balu'nyo sumo kota nu Sodom ka' Gomora: Tumpu nonggalisimo kota haha aijo' nu apu da timbali sonto' mongkona apaa na anu saidi' mae timbali hi to mia-mian anu ma'idek.

⁷ Panyo i Lot pinosalamat, kalana ia na montuluti pongka'oho' nu Tumpu; ia talalo hondo nongoa'i kasansala'an kalana kalakuan nu to mia-mian anu palaganta.

⁸ Jojoong maninggalum tiba to mia-mian susumo aijo', i Lot anu ma'ima' na kinyonyoanyo aijo' tumuu' madi' hondo sanang na butongnyo, kalana sansina-sinaa ia montoa ka' mohongo palabuatan nu aha haha aijo' anu ma'idek.

⁹ Jadi, nusumbu' nu Tumpu mosia na momposalamat anu montuluti pongka'oho'-Nyo de aha mongahopimo soba'an-soba'an. Ka' nusumbu' nu Tumpu mosia na mompo'una' to mia-mian anu ma'idek da osakisa i Sinaa Pomputusianmo,

¹⁰ utamanyo to mia-mian anu montuluti apaa na anu nu kamilui nu aha, aijo'mo napisu anu mahenyu ka' anu monjojoa kakuasa'an nu Tumpu. Baani ka' takabun hondo na to gulu-gulu' anu madi' totu'u haha aijo' sahingga aha madi' bata-bata na monjojoa Tumpu anu opopodaka' kiita' i suluga'!

¹¹ Sadang pe'e to mala-malaikat anu lebe mahoson ka' mongkuasai to gulu-gulu' anu madi' totu'u aijo', madi'mo mompisala'i Tumpu anu opopodaka' aijo' nu potatae ponjojoa i ahop nu Tumpu.

¹² Panyo to gulu-gulu' haha aijo', palias! Aha ola sumo binatang anu inganakakon da o hakop ka' opatei. Aha madi' ko inau'an apa-apaa; panyo ola mokalaja montuluti kabiasa'an nu dunia, sahingga nu gagakon nu aha na hahan anu madi' nu pangalati'i nu aha nu potatae haha aijo' salaku bau ponjojoa. Kalana aijo' posi kalajamo nu aha haha aijo', na aha mate susumo to bina-binatang mangahas.

¹³ Salaku bau pohukum kalana kasansala'an anu sinaduakonmo nu aha, aha mongoa'ije kasansala'an. De hi aha, anu momposanang kinyonyoa atina'mo mombau tulu-tulumo pa' apaa sinaa, bau pomposanang anu nuka'ima'i nu butong nu aha. De aha sumuhang hingga-hinggat tiba komiu i uno nu bau-bauon mongkakan, kalakuan nu aha monsaduakon da kita mahega kalana aha talalo ahi' mongka'ima'i da ma'osa i napisu.

¹⁴ Aha madi' ko kapa'osannyo na mombau dosa', ka' anu nu ka'ima'i aha aijo'mo montoa boune anu lewa' masala'. Ka' mian anu sala'je palesaya ka' anu ma'isa talalo palesaya totu-totu'u, nugoda nu aha. Kinyonyoa nu aha inanayamo nu mangoa. Aha to mia-mian anu kinutukanmo!

¹⁵ Kalana aha madi' mongka'oho' montuluti jalan anu hodi', sahingga aha tinalasmo. Aha nongalamo jalan anu tinuus i Bileam, anak i Beor naipuan mae. I Bileam aiya mongka'ima'i hondo da mohumpak doi i palabuatannyo anu ma'idek.

¹⁶ Panyo ia nohumpakmo pokinde' anu mapohos hondo mongkona palabuatannyo anu ma'idek aijo', salatan keledainyo aijo' notataemo susumo potatae nu mian. Sahingga nabi aijo' pinakisamo da bolimo mombau palabuatan anu ulawon aijo'.

¹⁷ To gulu-gulu' anu madi' totu'u aijo' sumo mata nu uee anu noti'imo ka' sumo sehu' anu pinuuhakonmo nu antong. Pinotoukamo nu Tumpu na tampat sa'angu' ponguna'an aha anu talalo hondo pikat.

¹⁸ Aha saja' monsisik anu toto ima-ima' ka' madi' ko kaliangannyo, napisu da masala' nupake nu aha bau pontua to mia-mian anu sala'je montampu'uni mae mompala'i to mia-mian anu tumuu' ginumpomo.

¹⁹ To gulu-gulu' anu madi' totu'u haha aijo' binajanji'mo hi to mia-mian tukoonyo saidi' mae madi' mohumpak hukuman, padahan posi aha binotuananmo nu anu saja' nubau nu aha anu nongideimo mian. Kalana de mian i hungku'anmo nu apa-apaa, saba' ia binotuananmo nu anu nohungku'imo aijo'.

²⁰ Mian anu monsumbu' Tumpu ka' anu Momposalamat kita aijo'mo i Yesus Kristus, madi'mo nukuasai nu dunia anu mompohenyu mian. Panyo de lapas aijo' ia po'ule' mule' tagoda sahingga nuhungku'i mule' nu kuasa haha aijo', saba' bauon nu mian aijo' ahennyo lebemo ma'idek nulingkuduimo na anu momonanyo.

²¹ Lebe ma'ima' mian anu susumo aijo' madi' toho' nonsumbu' jalan anu totu'u lengkat mae hi Tumpu, da boli ola aha monsumbu' padahan lapas mae madi'mo mongka'oho' montuluti to pale-palentah anu binee'mo nu Tumpu hi aha.

²² Apaa na anu binaumo nu aha mompototu'umo kahondoan nu basa' aiya, “Dedeng po'ule'mo mongkaan apaa na anu i lua'akonnyomo,” ka' “Bau' anu pinindi'mo po'ule'mo mingkaliade' i uno nu hensek.”