2 KORINTUS 9 - KITAB NU TUMPU ALLA LELE MA'IMAI'

Pontulungi sangko mian Kristen

¹ De o'ala i kahondoannyo madi'mo daagi' palalu aku montulis sulat toka hi komiu mongkona pontulungi anu opakatumo hi mian anu palesayamo hi Tumpu i Yudea.

² Kusumbu' komiu mongka'oho' montulungi, ka' aku nombuulakonmo komiu hi to mia-mian i Makedonia. Tinaloakonkumo hi aha tukoongku lengkat pe'e i taun anu i hikuhakonmo, to Utu-utus i Akhaya nontoukaimo bau pontulungi. Ka' kasanangan nu kinyonyoa miu pinontihoanmo nu sambagian mian da'isan kiijo' hi aha.

³ Uuka aiya aku nonsaimo i Titus ka' ua'aha na Utusto aijo' hi belemiu da apaa na anu sola' obuulakon mami mongkona komiu boli ola sumo potatae anu madi' ko kaliangannyo. Jadi komiu tionyo ahi' montoukaimo, kalana tinaloakonkumo hi aha, tukoongku aha nontoukaimo anu haha aijo'.

⁴ Aku bata-bata ihe na monsumbu' daagi' ko to mia-mian nu Makedonia anu mombatuki aku hingga-hinggat saidi' mae de aku mambamo hi komiu. Ka' de nutokai nu aha na komiu ma'isaje nontoukai, paya' na ko'ambangnyo na kami saidi' mae, kalana nontaloakonmo, kami palesaya hondo hi komiu! Ka' posi komiu singkona ma'ambangmo ahi'.

⁵ Mokonyo aijo' ku oa'i palalu monsai aha aijo' mamba hi komiu tongkoimoona da mongulus pontulungi anu jinanji'mo miu aijo'. Kubau sumo aijo' da saidi' mae de aku toka, anu obee' miu aijo' daagi'mo. Desumo aitu yo nyata' saba' anu obee' miu aijo', obee' nu kinyonyoa sanang, ka' misa' kalana opakisa.

⁶ O inau'! Mian anu monsa'u bine' toto sangkiding, mohumpak hasinnyo suele sangkiding. Panyo mian anu monsa'u bine' manjo-manjoo', mohumpak hasinnyo suele manjoo'.

⁷ Batu-batu mian tionyo mombee' iya na kasanangan nu kinyonyoanyo. Boli ia mombee' bata-bata kabai kalana opakisa, kalana Tumpu mongkalibosi mian anu mombee' nu kinyonyoa sanang.

⁸ Tumpu ko kuasa mombee'i komiu balakat anu molabi-labi, da komiu saja' daagi' ko anu opake; ka' mule' komiu saja' molabi-labi na mombau anu ma'ima' ka' manonong, na montulung mian.

⁹ I uno nu Kitab nu Tumpu tinulismo sumo uuka mongkona Tumpu. “Ia monsasagakon hi mian kasiasi; ka'ima'an nu kinyonyoa-Nyo sampe toka sidu-sidutu'.”

¹⁰ Tumpu na montoukai binee' hi mian topo sau binee' ka' anu okaanto. Ia mule' na montoukai ka' momponjoo' apaa na anu osau miu, da hasin nu kanonongan nu kinyonyoa miu mompaka pintuang mule'.

¹¹ Desumo aijo'nyo komiu saja' sukup i uno nu iwi-iwi' na han, sahingga komiu saja' moko ala mobagi kalana manonong na kinyonyoa. Ka' anu lewa' binee' miu, anu binagi-bagiakonmo mami, nompotuka'mo mian da'isan nontalima kaseh hi Tumpu.

¹² Kalana palabuatan anu ma'ima' bibinaumo miu aiya misa' ola da momposukup kakulangan nu mian anu pinalesayamo hi Tumpu, panyo mule' suele mompotuka'mo mian da'isan da montalima kase hi Tumpu.

¹³ Ka' kanonongan anu pinotoamo miu aijo' manjoo' na mian Kristen i Yudea nompuji'mo Tumpu kalana aha nontoamo komiu mohongo-hongo hondo Lele Ma'ima' mongkona i Kristus anu nu nu tuluti miu aijo'. Aha singkona nompuji'mo Tumpu kalana komiu talalo manonong, nombagi-bagiakonmo hi aha ka' hi iwi-iwi' na mian sangga'at apaa na anu daagi' hi belemiu.

¹⁴ Jadi aha mondo'akonje komiu kalana kinyonyoa nu aha mongoa'i molibos kalana Tumpu talalo manonong hi komiu.

¹⁵ Tionyo ahi' kita montalima kase hi Tumpu kalana anu binee'-Nyomo aijo' madi' ko gampanyo!