2 KORINTUS 8 - KITAB NU TUMPU ALLA LELE MA'IMAI'

Doi pontulungi lengkat mae hi to mia-mian Kristen

¹ To Utu-utus, O'indi mami da komiu monsumbu' suele mongkona mosia na ko'ima'nyo na Tumpu hi to jama-jama'at i Makedonia.

² Aha inguji'mo nu kasusa'an anu toto boa-boat. Panyo mau mule' aha nongoa'imo kasusa'an-kasusa'an sumo aijo', aha bilahi ka' manonong hondo na kinyonyoa mombee'i bau pontulungi mian sangga'at, mau mule' aha kasiasi hondo.

³ Aku timbali montantukan aha mombee'i apaa na anu nupoko ala nu aha, sadang aijo' pe'e pa' nolabi. Madi' pilenje ko anu nompokau,

⁴ aha nomoita sabole-bole hi kami de timbali da aha suele mombee'i pontulungi hi mian anu palesayamo hi Tumpu i Yudea.

⁵ Aha nombee'i molabii apaa na anu tinaha'imananmo mami. Aha momonanyo nombee' butong hi Tumpu, lapas aitu hi kamije suele sosok sumo pongka'oho' nu Tumpu.

⁶ Mokonyo aijo' kami talalo hondo mompoto'i Titus – anu nontampu'unimo usaha aiya – da suele nubau na usaha anu ma'ima' aiya itina' hi komiu.

⁷ Komiu moko ala mombau iwi-iwi' na han: Komiu moko ala momponyata' kapalesaya'an, i uno nu han montaloakon pongka'oho', i uno nu han kapandean, i uno nu iwi-iwi' na ngahan nu usaha, ka' i uno nu kalibosanum hi kami. Mokonyo aijo' singkona ahi' komiu moko ala i uno nu usaha anu ma'ima' sumo aiya.

⁸ Aku madi' mompoto'i aijo' sumo sa'angu' na palentah. Panyo kalana mompotoa mosia na kokekenyo na mian sangga'at montulungi sangalunyo, aku suele mongka'oho' monsumbu' toka iya na kalibosan miu.

⁹ Kalana osumbu' miu hondo kita talalo nukalibosi i Yesus Kristus Tumpunto. Ia kaya, panyo Ia nompotimbalimo butong-Nyo kasiasi kalana kapentingan miu da kalana Ia kinasiasimo aijo', komiu timbalimo kaya.

¹⁰ De o'ala i pikilanku, sapantasnyomo na komiu mompodopusmo apaa na tinampu'unanmo miu i taun anu i hikuhakonmo. Kalana komiumo na anu momonanyo nompopikilakon ka' nontampu'uni usaha aiya.

¹¹ Jadi uuka tionyo komiu po'ule'mo ahi' mombau apaa na anu opoko ala miu. Okinyonyoai ahi' totu-totu'u na mompodopus usaha aijo', susumo komiu u'utu pe'e mae nongkinyonyoaimo tanga'an aijo'.

¹² De komiu halala' na mombee' saba' nutalima nu Tumpu na anu obee' aijo' iyamo na anu daagi' hi belemiu, misa' pa' apaa na anu madi' hi belemiu.

^13-14 Aku madi' hondo-hondo ko kahanda' mompobebas mian sangga'at apaa na anu olimu', ka' mompiboati komiu. Panyo kalana komiu uuka aiya i unomo nu kangalabian, jadi nukonamo na komiu momposukup kakulangan nu aha. De saidi' mae komiu ko kakulanganmo ka' aha i unomo nu kangalabian saba' aha suele montulungije komiu. Desumo aitu yo sambiha' ka' sambiha' bubuu' mohumpak.

¹⁵ I uno nu Kitab nu Tumpu tinulismo, “Mian anu ko polioan manjoo', madi' kangalabian, ka' mian anu ko polioan sangkiding, madi' ko kapaga'annyo.”

I Titus tiba to sanga-sangalunyo anu pinokau hingga-hinggat tiba ia

¹⁶ Tahahumo hondo na kami montalima kase hi Tumpu, kalana Ia nompotimbalimo i Titus nakekemo sumo kami da montulungi komiu!

¹⁷ Kalana i Titus misa' ola halala' mongganapi poitaon mami, panyo ia mule' makeke sumo aijo' kahanda' montulungi komiu sampe posi pongka'oho'nyo nontantukanmo da mamba hi belemiu.

¹⁸ Hingga-hinggat tiba ia kami nonsai mule' samian na Utus anu talalo o'angga'i i iwi-iwi' na jama'at kalana kalajanyo mompolele Lele Ma'ima' lengkat mae hi Tumpu.

¹⁹ Ka' mule' mian anu sinanggo aijo' pinile'anmo suele ka' tinantukanmo nu to jama-jama'at da monsangalui kami i lumambanan mami. Kalana kami batanga'mo mamba momboa pontulungi aijo', da Tumpu opopodaka' ka' da komiu montoa saba' kami halala' hondo na montulungi.

²⁰ Obala'ingati mami hondo da boli ko mian anu mompisala'i kami salatan obee'mo na pontulungi anu sumo aiya na konjoo'nyo.

²¹ Kami mongka'oho' mokalaja hodi-hodi' misa' ola i ahop nu Tumpu, panyo mule' suele i ahop nu mian.

²² Hingga-hinggat tiba i Titus ka' Utus anu sisinanggo aijo', kami singkona mule' monsai samian na Utus anu sangga'at. Kami saja'mo nonguji' ia ka' tinoamo na ia saja' mongka'oho' montulungi. Ka' uuka aiya ia mompaka ka'oho' mule' montulungi komiu kalana nutaha'imani hondo na komiu.

²³ Mongkona i Titus, ia te sangalungku anu mokalaja tiba aku da montulungi komiu. Ka' mongkona ua'aha na Utus aijo' anu inamba hingga-hinggat tiba ia, aha mian anu sinai nu to jama-jama'at, ka' timbali bau katalasanggoan nu sanggo i Kristus.

²⁴ O indi mami na komiu da mompotoa kalibosan miu hi aha da iwi-iwi' na jama'at monsumbu' taalu' komiu mongkalibosi aha, ka' da apaa na anu obuulakon mami mongkona komiu aijo' memang totu'u.