2 KORINTUS 7 - KITAB NU TUMPU ALLA LELE MA'IMAI'

¹ To Utu-utus anu okanonongi! Iwi-iwi' na anu jinanji'mo aijo' kona hi kita. Mokonyo aijo' iwi-iwi' na anu mombusiki kinyonyoa ka' butongto tionyo ahi' opobelesi'. Tumpu tionyo ahi' okabuhuk da kita timbali tumuu' maima ka' hondo-hondo mombau apaa na anu nu palentahkon.

Kabilahian i Paulus

² Talima na kami i uno nu kinyonyoa miu. Kami madi' ko sala' hi samian pe'e, ka' madi' toho' ko mian anu pinolugi'mo mami. Kami madi' hondo-hondo nongala ka'untungan mau mule' pa' hi he.

³ Kutaloakon sumo aitu misa' da mompisala'i komiu. Kalana sumo anu tinaloakonkumo u'utu mae, kami talalo hondo mongkalibosi komiu, ka' kita mosangalu sidu-sidutu' sampe silaka.

⁴ Kupalesaya totu-totu'u na komiu. Ka' mule' kami sanang hondo hi komiu! Mau mule' kami mongoa'i manjoo' na kasusa'an, molumu hondo na kinyonyoangku kalana komiu. Kinyonyoangku bilahi hondo!

⁵ Tempo'nyo mule' kami tinoka i Makedonia, kami madi' toho' kino kasampatan nilawe. Iwi-iwi' na han pinohumpakanmo mami kasusa'an: lengkat mae hi sangga'atan mompainggagakon, i uno nu kinyonyoa nabuhukmo.

⁶ Panyo talima kaseh, Tumpu saja' mompohoson kinyonyoa nu mian anu hentemo; Ia nomposanangmo kinyonyoa mami kalana tinokamo na i Titus.

⁷ Kinyonyoa kami sinanangmo misa' ola kalana i Titus tinokamo, panyo mule' kalana ia nonsisikmo mosia na kinyonyoanyo sinanangmo kalana komiu. Ia nompoto'imo hi kami tukoonyo komiu mongindi hondo da singkabot tiba aku; saba' komiu nompele-pele'mo i anu binau miu u'utu mae ka' uuka aiya mongka'oho'mo mompototu'u aku. Han aijo' nompaka posanangmo aku mule'.

⁸ Mau mule' sulatku nompopolibosmo kinyonyoa miu, aku madi' mompele-pele' na nontulis sulat aijo'. Memang salatan tinoangku na sulat aijo' mompopolibosmo komiu – maumo kalibosan aijo' ola sasaingoni' – aku gagana'mo ahi' nompele-pele'.

⁹ Panyo uuka aiya aku sinanangmo – misa' kalana kinyonyoa miu nolibosmo, panyo kalana kalibosan miu aijo' sahingga kalakuan miu nongabali'mo. Memang kalibosan miu aijo' no'imboamo tiba pongka'oho' nu Tumpu. Jadi kami madi' nompolugi' komiu.

¹⁰ Kalana kalibosan anu sumo aijo' sahingga kinyonyoa nongabali'mo ahennyo oposalamatmo. Ka' mian madi' ko mompele-pele' i han aijo'. Sumo aitu mule' kalibosan anu ola mombatuki kahanda' nu mian monsaduakon kapatean.

¹¹ Soba po'inau'akon miu apaa na hasinnyo hi komiu nu kalibosan anu mo'imboa kahanda' nu Tumpu! Hasinnyo aijo'mo komiu totu-totu'u bala usaha da mompokopiani anu ma'idek! Komiu mongka'idekimo dosa', komiu mabuhukmo, komiu molibosmo, komiu timbalimo bikas, komiu halala'mo na mohukum anu ko sala'nyo! I uno nu iwi-iwi' na han aiya komiu mompotoamo saba' komiu madi' ko sala'nyo.

¹² Jadi, mau mule' aku nontulismo sulat itina', aku nontulis misa' kalana mian anu ko sala'nyo aijo'. Misa' mule' kalana mian anu mongoa'i sansala, kalana kasala'an aijo'. Tinulisku na sulat itina' da i ahop nu Tumpu, komiu mosi sinsumbu'mo mosia na kinyonyoa miu anu talalomo hondo nonginau' kami.

¹³ Mokonyo aijo' kinyonyoa kami sinanangmo. Misa' ola kalana sinanangmo, panyo kami nompaka binilahimo mule', kalana nontoamo kabilahian nu kinyonyoa i Titus; kinyonyoanyo sinanangmo kalana to Utu-utus iwi-iwi'.

¹⁴ Aku memang nombuulakonmo komiu hi ia. Talima kaseh komiu madi' nongambangi aku. Iwi-iwi' na anu toho'mo tinaloakon mami hi komiu totu'u. Sumo aijo' mule' apaa na anu binuulakonmo mami mongkona komiu hi Titus memang ahi' totu'u.

¹⁵ Uuka ia nompaka kalibosimo komiu, kalana nututugi komiu Utus iwi-iwi' mongka'oho' mohongo-hongo pongatunnyo, ka' mosia na komiu nontalimamo ia ka' nongadatimo ia ka' tulu-tulutan.

¹⁶ Aku sanang hondo, kalana komiu timbali opalesaya i uno nu han iwi-iwi'.