2 KORINTUS 4 - KITAB NU TUMPU ALLA LELE MA'IMAI'

Halata' lengkat i suluga' pinonguna'an, itampat tano' na binau

¹ Kami nombau kalaja aiya kalana kanonongan nu Tumpu. Mokonyo aijo' kami madi' ma'osa.

² Kami madi' mompake hahan anu oposuluk ka' mongambangi. Kami madi' mongka'oho' mokalaja mongakali kabai monggeo-geo'akon potatae nu Tumpu. Hodi-hodi' na kinyonyoa mami mohongo-hongo apaa na koonyo nu Tumpu mombatuki pongka'oho'-Nyo. Mokonyo aijo' o'inde'i mami da mian iwi-iwi' mompopikilakon kami ima-ima' i uno nu kinyonyoanyo.

³ De Lele Ma'ima' anu opolele kami aijo' ma'isa mule' osumbu', saba' aijo' ola to mia-mian anu hau-haunyo mongahopimo kapatean na anu madi' monsumbu'.

⁴ Pilogot ide-idek anu mongkuasai dunia aiya nongkulubimo pikilan nu to mia-mian anu madi' palesaya aijo'. Iamo na lewa' molingkang aha da aha madi' montoa jingka nu Lele Ma'ima' aijo' mongkona katalasanggoan i Kristus, anu salaku gambalan nu Tumpu Allah.

⁵ Lele anu opotokakon mami aijo' misa' lele mongkona posi butong mami. Lele aijo' te lele mongkona i Yesus Kristus; saba' Iamo aijo' na Tumpu; ka' kami te to posa-posaihon miu kalana Ia.

⁶ Tumpu na notatae, “Tionyo ahi' lengkat i uno nu pintung bete'mo na jingka,” Tumpu ai-aijo'mo na nompobete' jingka aijo' i uno nu kinyonyoanto, da pikilanto timbali majingka ka' monsumbu' kalonyingkaban nu Tumpu anu i lonyingkabanmo hi ohup i Kristus.

⁷ Panyo halata' nu rohani anu ma'ima' hondo aijo' oboa i butong mami anu madi' ko olinyo aiya anu tano' na binau. Jadi desumo aijo' nyata'mo taalu' kakuasa'an anu daka' aijo' una-una' hi Tumpu misa' hi kami.

⁸ Iwi-iwi'mo na han baumo pompahantuda'akonan kami, panyo kami madi' momosia. Mingkotmo na pikilan mami, panyo kami madi' ma'osa.

⁹ Manjoo' na anu monsampobali kami, panyo madi' toho' kami oposi pala'i. Ka' mau mule' toto minsan kami obanda sampe tohumpuk panyo kami madi' mate.

¹⁰ Saja' o'oa'i i butong mami na i Yesus sinilaka, da kantumuu'an-Nyo suele saja' otoa i butong mami.

¹¹ Kalana de daagi' kami tutuu', kami saja' mongahopi kapatean kalana i Yesus, da kalana aijo' kantumuu'an i Yesus suele timbali oponyata' i butong mami anu ola tumuu' sasaingoni' aiya.

¹² Aiya alati'nyo saba' i butong mami kasilakan hau-haunyo ko usaha mompojalanmo tanga'annyo, panyo kami lame' saba' kantumuu'an na anu hau-haunyo ko usaha i uno nu butongum.

¹³ I uno nu Kitab nu Tumpu daagi' ko potatae aiya, “Aku palesaya, mokonyo aijo' aku motatae.” Jadi, tiba kapalesaya'an anu daka-daka' na kinyonyoa sumo aijo' suele, kami notataemo kalana kami palesaya.

¹⁴ Opalesaya mami, saba' Tumpu na nompo'ule'mo nompotumuu' i Tumpu Yesus, suele mompotumuu'mo kami tiba i Yesus ka' nomboamo komiu ka' kami i ahop-Nyo.

¹⁵ Iwi-iwi' aijo' bau kapentingan. Kalana lebe manjoo' na mian mongoa'i kalibosan nu Tumpu, mompaka lebe manjoo' mule' suele na do'a pontalima kase anu opotoka hi Tumpu; jadi desumo aijo' Tumpu opopodaka'mo.

Tumuu' palesaya

¹⁶ Mokonyo aijo' kami madi' ma'osa. Mau mule' kantumuu'an i dunia aiya, kami ko ide-ideknyomo, panyo kinyonyoa mami toka sansina-sinaa saja' opotimbali bu'ou.

¹⁷ Ka' kasusa'an anu madi' tala-talalomo sumo aiya, anu o'oa'i mami ola sasaingoni', mompodaagi'je hi kami sa'angu' na kabilahian anu madi' ko gampanyo ka' sampe toka sidu-sidutu'. Kabilahian aijo' lebe daka' molingkudui kasusa'an ai-aijo'.

¹⁸ Kalana kami madi' mongka'ima'i hahan anu kantoan, panyo anu madi' kantoan. Anu kantoan ola montahan sasaingoni', panyo anu madi' kantoan aijo' pin sampe toka sidu-sidutu'.