2 KORINTUS 12 - KITAB NU TUMPU ALLA LELE MA'IMAI'

Anu pinoto'i ka' tinoa ka' binee' nu Tumpu hi Paulus

¹ Memang madi' ko untungnyo na mombuulakon. Panyo aku mongka'oho' ahi' mombuulakon hahan anu pinoto'imo nu Tumpu Allah hi belengku, anu pinoto'i kabai anu pinotoa.

² Kusumbu' samian na Kristen u'utu mae sampulu'mo ka' opat na taun anu i hikuhakonmo, i hangkatmo nokiita' i tampat anu matangkas hondo i suluga'. (Aku madi' monsumbu' pa' butongnyo totu-totu'u tinahangkat kabai ola susumo anu kinohiabakon – ola Tumpu Allah na monsumbu'.)

^3-4 Po'ule' pe'e ku ulit minsan: Kusumbu' saba' mian aiya i hangkatmo ka' pinosoop i Firdaus. (Aku madi' monsumbu' pa' butongnyo totu-totu'u tinahangkat kabai o aijo' ola susumo kinohiabakon – ola Tumpu na monsumbu'.) I kiita' mae mian aijo' mompotombihing hahan anu madi' opoko ala otaloakon nu mian ka' madi' ahi' opoloas hi mian na montaeyakon.

⁵ Mongkona mian aijo' na anu ka'oho' ku buulakon misa' posi butongku. Mongkona butongku, ola hahan anu mompotoa kakulanganku aijo' na ka'oho' ku buulakon.

⁶ Bisuannyo aku ka'oho' suele mombuulakon apa-apaa, aku madi' mongka'oho' bau kalubatannyo nu anu madi' totu'u; anu totu'u na ku taloakon. Panyo aku momohokot, da madi' ko mian anu monsangka aku molingkudui apaa na anu tinoanyomo binaungku kabai anu i hongonyomo tinaloakonku.

⁷ Panyo da boli aku talalo buulon kalana saja' montoa anu madi' ko gampanyo aijo', aku binee'anmo sangahan na panyakit i butongku anu binau sumo sala'sa'angu' jalan nu Ibilis. Panyakit aijo' binee' bau pondoke aku, da aku madi' timbali buulon.

⁸ Pinintolun na aku binalado'a hi Tumpu, da panyakit aijo' osabatakon lengkat hi belengku.

⁹ Panyo Tumpu nontaami, “Aku mongkalibosi beleyum ka' aijo' sukupmo hi beleyum; kalana kuasang-Ku na anu talalo mahoson de beleyum mongoa'imo madi' mahoson.” Mokonyo aijo' aku lebe sanang na mombuulakon anu madi' ku poko ala, kalana de aku madi'mo mahoson, saba' tempo'je ahi' aitu na aku mongoa'i i Kristus monjagai aku nu kahosonan-Nyo.

¹⁰ Jadi, lame' na aku i han anu madi' ku poko ala. Aku mule' lame' de kalana i Kristus aku lewa' opobau-bau, aku nonta'up kasusa'an, pinotoitumputan ka' aku nongoa'i kasusa'an madi'mo nahoson. Kalana de aku madi'mo moko ala saba' i kiijo'je na tempo'nyo aku mongoa'imo mahoson.

I Paulus mombata-batai to mia-mian nu Korintus

¹¹ Aku totu'u timbalimo sumo mian ponga' – panyo komiumo na nonsaduakon aku tinimbali sumo aijo'. Sabenannyo komiu ahi' na tionyo mompuji' aku. Kalana mau mule' aku madi' ko kaliangannyo apa-apaa, aku madi' hondo-hondo mahungku' hi to “rasul-rasul” anu madi' ko anu mongkakanai aijo'!

¹² Anu okabangangi tiba hahan anu madi' ko anu mongkakanai tiba kalaja anu toto daka-daka', pinotoamo hi komiu i uno nu kasabalan da mompobukuti'i saba' aku samian na rasul.

¹³ I uno nu han apaa na komiu madi' pinalahatikan, de opokakanakon tiba to jama-jama'at sangga'at? Anu tahahumo ola i uno nu han aiya: aijo'mo aku madi' momposusa' komiu mongongkosi aku. Ampuniakon mae na aku i kasala'an aijo'!

¹⁴ Uuka aiya ko pintolunnyomo na aku mosadia mamba molenga komiu. Ka' aku madi' mongka'oho' momposusa' komiu, kalana anu ku kahanda'i misa' apaa na anu daagi' hi komiu, panyo butong miu. Kalana misa' to ana-anak na anu tionyo molio kaanon nu tu'anyo, panyo tu'anyo ahi' na anu tionyo molio kaanon nu to ana-anak.

¹⁵ Kalana aijo' sanang na kinyonyoangku halala' mongkulubanakon iwi-iwi' bau kapalaluan miu, aitu pe'e sagalamo butongku. De aku sumo aijo' mongkalibosi komiu, pa' patut na komiu madi' talalo mongkalibosi aku?

¹⁶ Jadi, komiu situju saba' aku madi' toho' nomposusa' komiu. Panyo daagi' ko anu notatae tukoonyo, aku aiya pangkelo; tukoonyo, aku mohumpak ka'untungan lengkat hi komiu kalana aku pande mongakali.

¹⁷ Iya na toho'! Pa' aku mongala to mia-mian anu kusai hi komiu aijo', aku molio da mohumpak ka'untungan hi komiu?

¹⁸ Aku nompokaumo i Titus mamba molenga komiu, ka' utusto sangga'at aijo' anu bubuu' Kristen pinokaungku da mamba hingga-hinggat tiba ia. Pa' i Titus nongalamo ka'untungan hi komiu? Panyo kami ohua' mokalaja ko tanga'an anu pokakana ka' mompojalan kalaja tiba tanga'an anu pokakana!

¹⁹ Kugantang komiu monsangka kami sumo uukamo na kopinnyo na binala usaha mompototu'u butong i ahop miu? Komiu madi' monsumbu' hondo! Tumpu monsumbu' saba' iwi-iwi' na anu tinaloakonmo mami aijo' mombatuki pongka'oho' i Kristus. Ka' iwi-iwi' na anu binaumo mami aijo', mombee'i pikilan da kapalesaya'an miu ko pintu-pintuangnyo.

²⁰ Aku bata-bata de aku mamba molenga saidi' mae, ku tokai na komiu madi' sumo anu tinahaimanankumo. Boli-boli saidi' mae daagi' ko anu mahantuda', anu sumpu, anu buhingison, anu mompentingkan kapalaluan nu posi butong, anu ola lewa' mompobau-bau, anu ola monsale'i da mombau gau' ma'idek, anu ola kobubuun, ka' anu ola momposubali pikilan.

²¹ Aku mabuhuk manga-manga tempo'nyo aku toka saidi' mae Tumpu Allah mompopo ambangmo aku i ahop miu ka' aku humaangmo kalana manjoo' itina' hi komiu na anu baladosa' u'utu mae, madi' nongabali' ka' madi' belenti na mombau bauon nu aha anu masala', pahengas ka' anu madi' halus obau.