2 KORINTUS 11 - KITAB NU TUMPU ALLA LELE MA'IMAI'

I Paulus ka' rasul-rasul anu madi' totu'u

¹ Situjui mae na aku da mimbau-bau momoho' ponga' sangkiding. Tantu timbali?

² Aku molibos hi beleyum, sumo Tumpu suele molibos hi beleyum. Komiu sumo samian na anak langkoyang anu ma'isa toho' no'osoa, anu daagi' susi' anu jinanji'kumo da oponika'mo tiba samian na mo'ane, aijo'mo i Kristus.

³ Panyo aku bata-bata mamanga pikilanum saidi' mae tagoda madi'mo daagi' tulu-tulutan hi Kristus, pokakana sumo i Hawa u'utu mae suele tinagoda kalana kapandean nu ulo.

⁴ Kalana lupanyo komiu ola sanang na montalima mian anu toka hi komiu ka' mompogulu' mongkona Yesus sangga'at – misa' i Yesus anu pipinoto'i mami hi komiu. Ka' komiu mongka'oho' mule' montalima roh ka' “lele ma'ima'” anu mompahasala' hondo tiba Roh nu Tumpu ka' Lele Ma'ima' anu toho'mo tinalima miu hi kami.

⁵ Aku madi' hondo-hondo mongoa'i lebe i aluknyo nu to “rasul-rasul” anu madi' ko anu mongkakanai aijo'!

⁶ Ugaat aku madi' talalo pande babisala, panyo mongkona kapandean, aku misa' mian ponga'. Aijo' pinonyata'mo mami hi komiu i uno nu iwi-iwi' na han.

⁷ Tempo'nyo aku nompolele hi komiu Lele Ma'ima' anu lengkat mae hi Tumpu, aku madi' nompoita komiu mongongkosi aku mau pe'e sangkiding; ka' tiba jalan anu sumo aijo' saba' aku nompotimbalimo butongku madi' talakana'. Kubau na aijo' da mohangkat komiu. Pa' aijo' sa'angu' na kasala'anku hi komiu?

⁸ Tempo'nyo aku nompolele aijo' hi komiu, aku ingongkosan nu jama-jama'at sangga'at. Timbali otaloakon aku nompolugi'mo jama'at haha aijo' da timbali montulungi komiu.

⁹ De tempo'nyo aitu aku kinakulanganmo, aku madi' toho' nomposusa' samian pe'e itina' hi komiu. Iwi-iwi' na anu kupalalui tinoukan mae nu to Utu-utus anu tinoka lengkat mae i Makedonia. Pagala pinimpalianku ima-ima' da aku madi' momposusa' komiu i uno nu han mau mule' pa' apaa, ka' saja' kupimpali da sabole-bole sumo aijo'.

¹⁰ Anu kukabubulakon aiya madi' opoko kolilimi mau pe'e pa' iyaya mae i lipu' nu Akhaya, kalana pangajalan i Kristus anu totu'u aiya hi belengku.

¹¹ Kadaka' aku motatae sumo aitu? Ugaat kalana aku madi' mongkalibosi komiu? Nu sumbu' nu Tumpu na aku mongkalibosi komiu!

¹² Apaa na anu kubau uuka aiya sabole-bole saja' kubau da to “rasul-rasul” sangga'at aijo' madi' ko tanga'an mombuulakon posi butong ka' motatae tukoonyo aha mombau kalaja susumo hi kami.

¹³ To mia-mian anu sumo aijo', aijo'mo na to rasul-rasul anu madi' totu'u. Aha topo bau kalaja anu momposangkalinga mian ka' mingadi-adi' susumo rasul-rasul i Kristus.

¹⁴ Madi'mo okatalanggangakon na aha mombau sumo aijo', kalana Ibilis pe'e mingadi-adi' sumo malaikat anu susi'!

¹⁵ Jadi, madi'mo okabangangi de to posa-posaihon nu Ibilis mingadi-adi' sumo to posa-posaihon anu mompojalan kahanda' nu Tumpu. Ahennyo aha suele mohumpak pombalosi anu sitimbang tiba iwi-iwi' na anu binaumo nu aha.

Kasansala'an i Paulus salaku rasul

¹⁶ Daagi' minsan na ku ulit: Boli sampe daagi' ko anu monsangka aku ponga'. Panyo de komiu ahi' monsangka aku sumo aijo', pobee' pe'e na aku anu ponga' aiya kobubuun suele sangkiding.

¹⁷ Lapas aiya kusanggoje na anu ku buulakon, panyo misa' Tumpu na nompokau aku montaloakon aijo'. I uno nu han aiya aku totu-totu'u notatae sumo mian ponga'.

¹⁸ Memang manjoo' na mian anu mombuulakon hahan nu dunia, jadi aku mongka'oho' mombuulakon singkona.

¹⁹ Komiu sanang na kinyonyoa monsabaanakon mian anu ponga', kalana komiu mongoa'i butong miu aijo' pande!

²⁰ Ola opojohok miu na mian mombotuani komiu, kabai mongakali ka' mongala ka'untungan hi komiu, kabai mongoa'i butong lebe matangkas molingkudui komiu, ka' baani mohapa' komiu.

²¹ Aku ma'ambang na mangaku au'aitu kami talalo mabuhuk na mombau anu sumo aijo'. Panyo apaa na anu nu kabaaniakon ka' okabubuulakon nu mian sangga'at, aku suele baani! (Aku motatae sumo mian ponga'.)

²² Mian nu Ibrani ugaat na aha! Aku singkona mian nu Ibrani. Mian anu Israel ugaat na aha? Aku singkona mian nu Israel. Lee' i Abraham ugaat na aha? Aku singkona sumo aijo'.

²³ To posa-posaihon i Kristus ugaat na aha? De ohongo aku sumo anu i ningkotmo na pikilan, panyo aku memang posaihon anu lebe ma'ima' molingkudui aha iwi-iwi'! Aku mokalaja lebe makeke, aku lebe saja' oposoop i uno nu talungku', aku lebe saja' hondo sinakisa, ka' toto minsan mompai patemo.

²⁴ Pinilimanmo na aku sinakisa nu mian Yahudi, ka' pinahampohosakon pinintolumpulu' ka' osio'.

²⁵ Pinintolun na aku pinohos nu to mia-mian nu Roma; aku mule' toho' pinahambunu'akon nu batu. Pinintolun na aku nongoa'i kapan kinandas i ambai, ka' i ninsan na aku binandole-ndoleng i ambai inguampulu' ka' opat na jam na kopinnyo.

²⁶ Toto minsan ilumambananku mompai silakamo: iyaba' mompai silakaimo, tololang mompai silakaimo, mian nu Yahudi kabai misa' mian nu Yahudi mompai silakaimo, mian i uno nu kota mompai silakaimo, ka' mule' mian anu i sambiha'nyo nu kota mompai silakaimo, ambai mompai silakaimo, ka' suele anu mompai silakai aijo'mo to mia-mian anu mangaku butongnyo salaku moto utus kalana bubuu' Kristen padahan misa'.

²⁷ Aku mokalaja totu-totu'u nongusahakon mompai patemo: toto minsan madi' hoyot, madi' mongkaan, madi' monginum, saja' mongintim ohop, mabakin kalana madi' sukup na baju' ka' madi' ko tampat kajojoongan.

²⁸ Ka' mule' i han iwi-iwi' aijo', sansina-sinaa aku bata-bata kalana montoa kalakuan nu jama'at iwi-iwi'.

²⁹ De ko anu susa', aku suele mongoa'i susa'. De ko anu mombau dosa'; kinyonyoangku suele ma'idekanmo ka' tongkolibosonmo.

³⁰ Yoh de aku sabole-bole mombuulakon apa-apaa, saba' aku mombuulakonmo hahan anu madi' ku poko ala ku bau.

³¹ Tumpu Tuuma i Tumpu Yesus monsumbu' saba' aku madi' baleko'. Puji' na sanggo-Nyo sampe toka sidu-sidutu'.

³² Tempo'nyo aku kiijo' i Damsyik, gubernur anu mompalentah i kiijo' i aluk nu kapalentahan i Tomundo Aretas, nompalentah suludadu monjagai tumban nu kota aijo' da mohakop aku.

³³ Panyo aku inguluakon i sa'angu' na kalanjang nonkaiyong nontulu sa'angu' na bolo' nu pagan mesen. Sumo aijo' na aku nolapas lengkat i lima nu gubernur aijo'.