2 KORINTUS 10 - KITAB NU TUMPU ALLA LELE MA'IMAI'

I Paulus nontutuhakonmo kahondoannyo ia nompojalan kalajanyo

¹ Uuka aiya aku i Paulus, monsisikmo apa-apaa hi beleyum. Aku aiya de koonyo nu mian manonong de mompaha ahop tiba komiu, panyo baani de to majo'onanmo. Jadi, kalana kanonongan ka' ka'ima'an nu kinyonyoa i Kristus,

² kupoita sabole-bole boli monsaduakon aku, sahingga aku masigomo hi komiu de aku tokamo itina'. Kalana aku ko kahanda'mo masigo na mongatun to mia-mian anu nonontaloakonmo tukoonyo kami mokalaja ola kalana kapentingan nu dunia.

³ Kami memang daagi' tutuu' i uno nu dunia, panyo kami madi' mombau apa-apaa de ola kalana kapentingan nu dunia.

⁴ Posadiaon toongon anu opake mami i uno nu usaha mami misa' posadiaon toongon nu dunia aiya, panyo posadiaon toongon nu Tumpu Allah, anu matangkas na kuasa-Nyo. Tiba posadiaon toongon haha aijo' kami monggalisi to bente-benteng; pompedas mami de kami painggagamo,

⁵ ka' montumpak to bente-benteng nu kasombongan anu opotinjo bau pongewa kapandean da osumbu' na Tumpu. Ihungku'anmo mami na pikilan nu to mia-mian, ka' mompotimbalimo aha tinundu'mo hi Kristus.

⁶ Ka' de komiu tulu-tulutanmo totu-totu'u, kami mohukumo mian iwi-iwi' anu madi' tulu-tulutan.

⁷ Sinsu-sinsumbu'mo ahi' na komiu i han anu sahondo-hondonyo. De toto samian palesayamo tukoonyo, ia anumo i Kristus, yo tutugimo ahi' na posi butong, ka' sinsumbu'mo ahi' saba' kami singkona anumo i Kristus pokakana sumo ia.

⁸ Aku madi' ma'ambang de aku talalo mombuulakon kakuasa'an anu binee'mo nu Tumpu hi kami, kalana kakuasa'an aijo' binee' mae da mombangonakon komiu misa' da mongidei.

⁹ Aku madi' mongka'oho' komiu mongoa'i au'aitu aku mompopobuhuk komiu nu sulatku haha aiya.

¹⁰ Mian notatae, “Sulat i Paulus haha aijo' talalo hondo mapohos ka' o'adati hondo, panyo de posi ia na aiya hi kita, butongnyo mangkuyu ka' potataenyo madi' ko alati'nyo apa-apaa!”

¹¹ Sabenanyo mian anu sumo aijo' sinsumbu' ahi', de kami daagi' aiya hi komiu, pongatun mami memang pokakana sumo apaa na anu tinulismo mami i uno nu sulat mami haha aijo'.

¹² Memang ahi' kami madi' baani na momposukatakon kabai montampatakon butong mami pokakana tiba to mia-mian anu mongoa'i butongnyo pande hondo. Ponga' hondo na aha! Aha mosi bau sukatan ka' mosi angga'i butongnyo nu sukatan aijo'.

¹³ Kami madi' sumo aijo'. De kami kobubuun, kami madi' moliu-liu batas. Kami jojoong i batas-batas nu da'erah pokalajan anu tiniju'mo nu Tumpu hi kami. Ka' komiu tinonsoopmo suele i uno nu da'erah aijo'.

¹⁴ Jadi, tempo'nyo kami namba nolenga komiu ka' nomboa Lele Ma'ima' mongkona i Kristus hi komiu, kami totu-totu'u madi' nosabat lengkat i batas-batas nu da'erah pokalajan mami.

¹⁵ Kami madi' mompuji' posi butong mami i pokalajan nu mian sangga'at anu daagi' i sambiha'nyo nu batas anu tiniju'mo nu Tumpu Allah hi kami. Ola ahi' kami tataap i batas-batas anu tiniju'mo nu Tumpu hi kami ka' montaha'imani da komiu mompaka palesaya hi Kristus, da kami timbali mombau kalaja anu lebe daka' hi komiu.

¹⁶ Desumo aitu yo kami timbali mompolele suele Lele Ma'ima' aijo' i to lipu-lipu' sangga'at mau madi' pilenje mombuulakon butong i pakalaja'an anu binaumo i da'erah pokalajan nu mian sangga'at.

¹⁷ I uno nu Kitab nu Tumpu tinulismo, “Mian anu mongka'oho' mombuulakon apa-apaa, tionyo ahi' mombuulakon apaa na anu binaumo nu Tumpu.”

¹⁸ Kalana mian anu opuji' aitumo mian anu nu puji' nu Tumpu, misa' mian anu mosi puji' butongnyo.