2 KORINTUS 1 - KITAB NU TUMPU ALLA LELE MA'IMAI'

¹ To Utu-utus jama'at nu Tumpu i Korintus tiba iwi-iwi' mian anu palesayamo hi Tumpu songko-songko i Akhaya. Aku, i Paulus, rasul i Kristus Yesus, anu i hangkatmo kalana pongka'oho' nu Tumpu hingga-hinggat tiba Utusto i Timotius,

² montaha'imani ka' mongamalakon da Tumpu Tuumanto tiba i Tumpu Yesus Kristus mombee'i balakat ka' ka'ima'an hi komiu.

I Paulus nontalima kaseh hi Tumpu

³ O puji' na Tumpu, Tuuma nu Tumpunto i Yesus Kristus. Ia Tuuma anu talalo ma'ima' na kinyonyoanyo, ka' Ia Tumpu Allah anu mombee'i kahosonan nu kinyonyoa hi mian.

⁴ Ia mompohoson kinyonyoa mami i uno nu kasusa'an anu o'oa'i mami, da kahosonan anu otalima mami lengkat hi Tumpu aijo', kami suele timbali mompohoson kinyonyoa nu iwi-iwi' mian anu i uno nu kasusa'an.

⁵ Iwi-iwi' na kasansala'an anu ingoa'anmo i Kristus suele sumo aijo'mo na konjoo'nyo na anu ingoa'anmo mami. Ka' kahosonan anu i humpakmo mami hi Kristus, kinyonyoa mami pinohosonmo hondo.

⁶ De kami mongoa'i kasusa'an, aijo' bau pompohoson kinyonyoaum da bau kasalamatanum. De kinyonyoa mami opohosonmo, saba' komiu suele opohosonmo sahingga komiu timbali sabaan mongoa'i iwi-iwi' na kasusa'an susumo suele anu ingoa'anmo kami.

⁷ Kami saja' mongakui ka' madi' toho' mombata-batai komiu Utus, kalana osumbu' mami na komiu suele nongoa'imo sansala tiba kami. Mokonyo aitu komiu suele ahi' nupohoson hingga-hinggat tiba kami.

⁸ To Utu-utus! Pongka'oho' mami da osumbu' miu na kasusa'an anu ingoa'anmo mami i tano' nu Asia. Sansala anu sinumbu'mo mami aijo' talalo maboat na o'oa'i mami, sahingga kami madi'mo nontaha'imani daagi' tumuu';

⁹ o'oa'i pokakanamo sumo anu binee'anmo hukuman da matemo. Panyo anu haha aijo' tinimbalimo da kami boli montaha'imani kahosonan nu posi butong mami, panyo hi Tumpu anu mompotumuu' mian anu sinilakamo.

¹⁰ Iamo na anu nomposalamatmo kami i balaa' nu kapatean anu daka' aijo'. Ka' Iamo suele na momposalamat kami i sinaa imihinyo mae, kalana ola hi Ia na kataha'imanan mami.

¹¹ Opalesaya mami kalana do'a miu hi kami, sahingga Tumpu Allah po'ule' momposalamat kami da boli balaa'. Tumpu mombalakatimo kami salaku pontaami do'a anu nanjo'mo pinondo'akon mae kami, kalana aijo' manjoo' na mian montalima kase hi Tumpu Allah.

I Paulus nombali'imo tanga'annyo

¹² Kami sanang kalana kinyonyoa mami na mompohoson kami, saba' kantumuu'an mami i dunia aiya – anu talalo hondo pompahasumbu'an mami tiba kita Utus – pinojalanmo mami ma'i-ma'ima' ka' sahondo-hondonyo. Kami nombau aijo' misa' kalana kapandean nu mian, panyo kalana kahosonan anu binee' nu Tumpu Allah.

^13-14 Anu tinulis mami toka hi belemiu ola mongkona hahan anu opoko ala obasa' miu ka' osumbu'. Uuka aiya komiu madi' monsumbu' kami totu-totu'u, panyo kutaha'imani saidi' mae komiu totu-totu'u monsumbu'je kami. Sahingga de Tumpu Yesus tokamo mae komiu sanangje hi kami, susumo kami suele sanang hi komiu.

¹⁵ Kalana kapalesaya'an aijo', sahingga aku salatanmo pe'e imoonanyo nontanga'imo mamba montoa komiu da komiu mohumpak balakat pinduan lipat.

¹⁶ Aku ko kahanda' mamba montoa komiu de aku mambamo i Makedonia ka' po'ule' sonsoo' hi komiu de minsusule'mo mae, da komiu timbali montulungi aku molausakon lajangku mokiijo' i Yudea.

¹⁷ Panyo binali'ankumo na tanga'anku aijo'; jadi te aijo' momponyata' au'aitu pikilanku madi' tataap? Tempo'nyo nombau tanga'an, te aku binatanga' mombatuki posi pongka'oho' nu butongku, saidi' motatae, “Ii'” ka' saidi' mule' “Madi'”?

¹⁸ Tiba sanggo nu Tumpu anu timbali opalesaya, janji'ku hi kita Utus misa' “Ii'” kabai “Madi'”.

¹⁹ Kalana i Yesus Kristus, Anak nu Tumpu, anu pinolele i Silas, i Timotius, hi belemiu; ka' tiba aku, misa' mian “Ii'” ka' “Madi'”. Panyo ola ahi' Ia susumo pinontaami “Ii'” lengkat mae hi Tumpu.

²⁰ Kalana montului Ia Tumpu notataemo “Ii'” hi iwi-iwi' na anu jinanji'-Nyomo. Mimpu'u i aijo' sahingga kita montaloakonmo “Amin” hi Tumpu kalana i Yesus Kristus. Kami mombau sumo aijo' da Tumpu opopodaka'.

²¹ Posi Tumpu na nompotimbalimo kami tiba kita Utus mahoson na mosa'angu' tiba i Kristus; Iamo singkona na nompile'i kita matungka' bau kapalaluan-Nyo.

²² Kalana han aijo' sahingga Tumpu nompotantumo kita, iamo na tumpu-Nyo, ka' nombee'imo Roh-Nyo i kinyonyoanto salaku tanda pompohoson saba' tionyo nu bee' hi kita iwi-iwi' na anu jinanji'-Nyomo.

²³ Tumpu na sakisingku – kalana nusumbu' na isi nu kinyonyoangku – kadaka' aku madi' sida mamba i Korintus, kalana aku madi' mongka'oho' kinyonyoa miu molibos.

²⁴ Aku madi' mompakisa komiu, apaa na anu tionyo opalesaya miu, kalana komiu pinalesayamo hondo hi Kristus. Aku ola mokalaja hingga-hinggat ka' komiu da komiu mompaka humpak ka'ima'an.