1 YOHANES 5 - KITAB NU TUMPU ALLA LELE MA'IMAI'

Kita mohungku'i dunia

¹ Mian anu pinalesayamo tukoonyo i Yesus aijo'mo na Tomundo anu Momposalamat anu jinanji'mo nu Tumpu, mian aijo' Anakmo nu Tumpu. Mian anu mongkalibosi tuumanyo, tuumanyo suele mongkalibosi anaknyo.

² Tiba jalan anu sumo aijo', timbalimo osumbu'to taalu' kita nongkalibosimo to ana-anak nu Tumpu. Kita mongkalibosi Tumpu ka' tulu-tulutanmo i iwi-iwi' na palentah-Nyo.

³ Kalana mongkalibosi Tumpu alati'nyo tulu-tulutanmo i palentah-Nyo iwi-iwi'. Ka' palentah-Nyo iwi-iwi' madi' maboat hi kita,

⁴ kalana toto samian na anak nu Tumpu moko ala mohungku'i dunia anu ma'idekmo aiya. Ka' pohungku'into dunia aiya aijo'mo kita palesaya totu-totu'u.

⁵ Ihe na moko ala mohungku'i dunia? Ola mian anu palesayamo tukoonyo i Yesus aijo'mo na Anak nu Tumpu.

Sakisi anu mompototu'u i Yesus Kristus

⁶ I Yesus Kristusmo na anu tinoka i dunia tiba uee pinompalamandikan Ia ka' tiba baso' anu Ia sinilakamo. Ia tinoka misa' ola uee, panyo tiba uee ka' baso'. Ka' posi Roh nu Tumpu Allah na nompoto'i anu sinakisiannyomo tukoonyo memang aijo' totu'u, kalana Roh madi' toho' baleko'.

⁷ Totolu' na anu nonsakisi aijo':

⁸ Roh nu Tumpu, uee ka' baso' – toto-totolu' aijo' nompoto'i anu sinakisiannyomo pokakana.

⁹ Kita palesaya hi anu sinakisianmo nu mian, panyo anu sinakisianmo nu Tumpu na lebe totu'u. Ka' aijo'mo na anu sinakisianmo nu Tumpu mongkona Anak-Nyo.

¹⁰ Kalana aijo', mian anu palesayamo hi Anak nu Tumpu nontalimamo anu sinakisian aijo' i uno nu kinyonyoanyo; panyo mian anu madi' mompalesaya Tumpu, mombata-bataimo au'aitu Tumpu baleko', kalana ia madi' palesaya apaa na anu pinoto'imo nu Tumpu mongkona Anak-Nyo.

¹¹ Aiyamo na anu sinakisianmo aijo': Tumpu nombee'imo kita kantumuu'an kopian ka' sampe toka sidu-sidutu', ka' Anak-Nyo aijo'mo na pinolengkatan nu kantumuu'an aijo'.

¹² Mian anu pinalesayamo hi Anak nu Tumpu, nohumpakmo kantumuu'an aijo'; ka' mian anu madi' palesaya hi Ia, ia madi' ko kantumuu'an aijo'.

Tumuu' kopian ka' sampe toka sidu-sidutu'

¹³ Aku nontulis toka hi komiu anu pinalesayamo hi Anak nu Tumpu Allah, da osumbu' miu saba' komiu ko kantumuu'anmo kopian ka' sampe toka sidu-sidutu'.

¹⁴ Ka' baanimo na kita mangadap hi Tumpu, kalana opalesayanto totu-totu'u do'anto Nu talimamo, de opoitanto, mau mule' pa' apaa, asan anu kona i pongka'oho'-Nyo.

¹⁵ Kalana osumbu'to taalu' Ia mohongo kita, de kita momoita hi Ia, sahingga osumbu'to suele taalu' Ia mombee' hi kita apaa na anu opoitanto hi Ia.

¹⁶ De komiu montoa sala'samian sangko kita mian Kristen mombau dosa' anu madi' mongahenakon mian aijo' talakangkanan i kantumuu'an kopian ka' sampe toka sidu-sidutu', tionyo ahi' komiu mondo'akon hi Tumpu; ka' Tumpu mombee'je kantumuu'an aijo' hi ia. Aiya kona hi aha anu dosa'nyo madi' mongahenakon aha talakangkanan i kantumuu'an aijo'. Panyo daagi' ko dosa' anu mongahenakon mian talakangkanan i kantumuu'an aijo'. Mongkona han aijo' aku madi' notatae tukoongku komiu tionyo mondo'akon hi Tumpu.

¹⁷ Iwi-iwi' na kalakuan anu sala' atina' dosa', panyo daagi' ko dosa' anu madi' mongahenakon mian talakangkanan i kantumuu'an kopian ka' sampe toka sidu-sidutu'.

¹⁸ Osumbu'to saba' iwi-iwi' na mian anu tinimbalimo to ana-anak nu Tumpu, madi' sabau-baunyomo dosa', kalana Anak nu Tumpu Allah na monjagai ia, ka' Anu Ma'idek madi'mo moko ala mombau apa-apaa hi ia.

¹⁹ Osumbu'to saba' kita aiya anumo nu Tumpu, mau mule' songko-songko na dunia aiya Anumo Ma'idek na nongkuasai.

²⁰ Osumbu'to saba' Anak nu Tumpu tinokamo ka' nompopangalati'mo kita, da kita monsumbu' Tumpu anu totu'u. Kita tumuu' nosa'angu'mo tiba Tumpu anu totu'u, ka' tumuu' mosa'angu'mo tiba Anak-Nyo i Yesus Kristus. Aiyamo na Tumpu anu totu'u, ka' aiyamo na kantumuu'an anu kopian ka' sampe toka sidu-sidutu'.

²¹ To ana-anakku, opimpali na butong miu i to pilo-pilogot! 13