1 YOHANES 4 - KITAB NU TUMPU ALLA LELE MA'IMAI'

Roh anu totu'u ka' roh anu madi' totu'u

¹ To Utu-utus anu okanonongi! Boli palesaya hi mian iwi-iwi' anu mangaku ko Roh nu Tumpu, panyo o uji' pe'e na aha da osumbu' pa' roh anu daagi' hi aha aijo' nolengkat mae hi Tumpu Allah kabai misa'. Kalana nabi anu madi' totu'u nanjoo'mo na namba noyaya.

² Sumo uuka na obau da osumbu' miu pa' Roh nu Tumpu kabai misa': Mian anu mongakui tukoonyo i Yesus Kristus tinokamo i dunia salaku mian, mian aijo' ko Rohmo anu tinoka mae lengkat hi Tumpu.

³ Panyo mian anu madi' mongakui han aijo' mongkona i Yesus, madi' ko Roh nu Tumpu. Mian aijo' ko roh lengkat mae hi Sampo Bali' i Kristus. Kita Utus nohongomo tukoonyo Roh aijo' tokamo mae, ka' tempo' uuka ia, aiyamo i uno nu dunia aiya.

⁴ Panyo to Ana-anakku komiu anumo nu Tumpu. Komiu nohungku'imo to nabi-nabi anu madi' totu'u kalana Roh anu daagi' hi belemiu lebe daka' na kuasanyo molingkudui roh anu daagi' hi to mia-mian anu kinuasanmo nu dunia aiya.

⁵ To nabi-nabi anu madi' totu'u aijo' basisik mongkona hahan nu dunia, ka' dunia nohongomo potatae nu aha, kalana aha kinuasanmo nu dunia.

⁶ Panyo kita to ana-anakmo nu Tumpu; ka' mian anu nonsumbu'mo Tumpu, nohongomo potataento. Mian anu misa' anu nu Tumpu, madi' nohongo potataento. Sumo aijo' na balu-balu'nyo kita monsumbu' pompahasala'an nu Roh anu mombee'i pangajalan anu totu'u, ka' roh anu madi' totu'u.

Tumpu mongkalibosi

⁷ To Utu-utus anu okanonongi! Imbo' da kita mompaha kali-kalibosi samian ka' samian, kalana kalibosan nolengkat mae hi Tumpu. Mian anu mongkalibosi atina' Anak nu Tumpu, ka' ia monsumbu' Tumpu.

⁸ Mian anu madi' mongkalibosi, madi' monsumbu' Tumpu; kalana Tumpu aijo' mongkalibosi.

⁹ Tumpu nompopiamo kalibosanan-Nyo hi kita, aijo'mo, nonsaimo mae Anak-Nyo anu sa'a-sa'angu'nyomo tinoka i dunia da kita mohumpak kantumuu'an hi Anak-Nyo aijo'.

¹⁰ Aiyamo na kalibosan: Misa' kita na anu nongkalibosimo Tumpu Allah, panyo Tumpu na anu nongkalibosimo kita, ka' anu nonsaimo mae Anak-Nyo da kalana Ia, dosa'to iwi-iwi' nohumpakmo ka'ampunan.

¹¹ To Utu-utus anu okanonongi, de Tumpu sumo aijo' na pongkalibosinyo kita, kita suele tionyo ahi' mompaha kali-kalibosi samian ka' samian.

¹² Madi' ko samian pe'e na anu toho'mo nontoa Tumpu, panyo de kita mompaha kali-kalibosi, Tumpu mosa'angu'mo tiba kita, ka' kalibosan-Nyo ganaapmo i butongto.

¹³ Kalana Tumpu nombee'imo kita Roh-Nyo, jadi osumbu'tomo taalu' kita tinumuu'mo nosa'angu' tiba Tumpu, ka' Tumpu nosa'angu'mo tiba kita.

¹⁴ Kami nontoamo Anak nu Tumpu, ka' kami nompolelemo Ia, anu sinai mae nu Tuuma da timbali Tomundo anu Momposalamat dunia aiya.

¹⁵ Ihe na mongakui tukoonyo i Yesus aijo' Anak nu Tumpu, Tumpu tumuu' nosa'angu'mo tiba mian aijo', ka' mian aijo' suele tumuu'mo mosa'angu' tiba Tumpu.

¹⁶ Kita nonsumbu'mo ka' pinalesayamo i kalibosan nu Tumpu Allah hi kita. Tumpu aijo', mongkalibosi. Mian anu kantumuu'annyo kinuasanmo nu kalibosan, mian aijo' nosa'angu'mo tiba Tumpu Allah, ka' Tumpu nosa'angu'mo tiba ia.

¹⁷ Kalibosan aijo' pinotimbalimo ma'ima' hondo i uno nu butongto, da kita ko kabaanian toka i Sinaa anu Pomputusianmo. Kita ko kabaanianmo, kalana kantumuu'anto i dunia aiya pokakanamo sumo kantumuu'an i Kristus.

¹⁸ Mian anu nongoa'imo totu-totu'u kalibosan nu Tumpu, madi'mo monsumbu' mongoa'i mabuhuk, kalana kalibosan anu ma'ima' hondo aijo' nongalinakonmo iwi-iwi na kabuhukan anu o'oa'i. Jadi osumbu'mo de mian ma'isa nongoa'i kalibosan nu Tumpu anu ma'ima' hondo, mian aijo' mabuhuk na mongahopi Sinaa anu Pomputusianmo.

¹⁹ Kita mongkalibosi, kalana Tumpu momonamo na mongkalibosi kita.

²⁰ De samian motatae, “Aku mongkalibosi Tumpu,” panyo ia madi' mongkalibosi utusnyo, mian aijo' baleko'. Kalana mian anu madi' mongkalibosi utusnyo anu nutoa, madi' moko ala mongkalibosi Tumpu anu madi' nutoa.

²¹ Kalana aijo', aiyamo na palentah anu binee'mo i Kristus hi kita: Ihe na mongkalibosi Tumpu tionyo ahi' suele mongkalibosi utusnyo.