1 TOMU-TOMUNDO' 9 - KITAB NU TUMPU ALLA LELE MA'IMAI'

Tumpu po'ule' mule' nanintoa hi Salomo

¹ Salatan i Salomo noko baumo Laigan nu Tumpu ka' laigan nu tomundo' tiba iwi-iwi' apaa na anu tinanga'annyomo,

² Tumpu po'ule' mule'nanintoa susumo anu jinadimo i Gibeon.

³ Tumpu nompoto'i hi ia, “Do'a nu beleyum i hongong-Kumo ka' tiba jalan aiya Laigan anu binaumo nu beleyum aiya, uuka aiya Ku poto'imo timbalimo tampat samata-mata bau ponsomban Aku sampe toka sidu-sidutu'. Saja'mo-Ku toa ka' Ku jagai na tampat aiya.

⁴ De totu-totu'u na kinyonyoa nu beleyum palesaya hi beleng-Ku hodi' totu-totu'u na kinyonyoa nu beleyum susumo tuuma nu beleyum i Daud, ka' beleyum montuluti totu-totu'u atulan-Ku ka' palentah-ngku haha aijo',

⁵ saba' anu jinanji'-Kumo hi Daud tuuma nu beleyum, tionyo Ku ganapi aijo' mo to lee'nyo na saja' mompalentah Israel.

⁶ Panyo' de beleyum kabai lee' nubeleyum mohikumo Aku, ka' madi'mo montuluti atulan-Ku ka' palentah-ngKu haha aijo' ka' mule' beleyum monsombahmo to pilo-pilogot sangga'at,

⁷ saba' Ku laa'mo na mian nu Israel anu pinalesayamo hi beleng-Ku haha aijo' da bolimo jojoong i lipu' anu binee'-kumo hi aha. Ka' mule' Ku pala'imo na Laigan aiya anu tinantukan-Kumo bau ponsomban Aku. Iyaya mae mian nu Israel saja' opopo ambang ka' okokojoi.

⁸ Laigan ponsomban aiya timbalimo tambulan nu anu nopapu sahingga toto samian anu montulu i kiijo' tolokengkeng ka' mongoa'i mabuhuk. Aha motatae, 'Kadaka' Tumpu nombaumo susumo aijo' i lipu' ka' laigan aiya?'

⁹ Lantas nu tamije nu mian. ‘Kalana aha nompala'imo Tumpu, Tumpu Allah nu aha anu nomboa mae mompolee' nu aha nompala'i mae Mesir. Aha nonsombahmo to pilo-pilogot sangga'at. Mokonyo' aijo' Tumpu nompotokamo mae balaa' aiya hi aha.’ ”

Palasetujuan i Salomo tiba i Tomundo' Hiram

¹⁰ I Salomo nombaumo Laigan nu Tumpu tiba laigan nu tomundo' inguampulu' na taun na kinopinnyo.

¹¹ Iwi-iwi' na kau' lontio' Libanon tiba kau' lontio' biasa ka' iwi-iwi' na mosoni' anu pinalaluan i Salomo pinombau laigan aijo', binee'mo i Tomundo' Hiram hi ia, Salatan pakalaja'an aijo' ilapasmo, binee'anmo i Tomundo' Salomo na i Hiram uampulu' ka' ohua' na kota' i da'erah Galilea.

¹² Sahingga nambamo tinoa i Hiram, panyo' madi' nu ka'ima'i na anu binee'mo aijo'.

¹³ Ia notataemo hi Salomo, “Utusku sumo aiya na kota' haha aijo' anu obee'to hi belengku?” Mokonyo' aijo' da'erah haha aijo' sinanggohanmo anu sinitujuanmo.

¹⁴ Molabi 4.000 kilogram na mosoni' anu binee'mo i Hiram hi Salomo.

Hahan sangga'at anu binaumo i Salomo

¹⁵ I Tomundo' Salomo nombaumo Laigan nu Tumpu, laigan nu tomundo', pagan mesen nu Yerusalem, pinakisanyo na anu mokalaja ka' nontambuni nu tano' sasu selatan Laigan nu Tumpu. Palentah anu susumo aijo' na binaunyo tempo'nyo ia po'ule' nombau kota Hazor, Megido ka' Gezer. (

¹⁶ Kota Gezer aijo'mo na kota anu naipuan tinumbuhan ka' pinatundu'mo nu tomundo' Mesir, lantas miannyo anu jojoong i kiijo' pinaha patean ka' kota'nyo pinapuanmo. Kota aijo' imihinyo mae binee'mo nu tomundo' Mesir hi anaknyo boune salaku palasennyo tempo'nyo ia inika'mo tiba i Salomo.

¹⁷ Ka' i Salomoje na po'ule' nombau kota haha aijo'.) Ka' i Salomo mule' na nompakisa mian po'ule' nombau Bet-Horon-Hilir.

¹⁸ Baalat, Tamar, anu kiijo' i padang mateges Yehuda,

¹⁹ to kota-kota' anu ponguna'an posadiaon anu okaan ka' mule' to kota-kota' ponguna'an kareta iwi-iwi' anu opake mahampate, ka' mule' ajahanyo iwi-iwi'. Iwi-iwi' na kinahanda'anyo obau i Yerusalem, i Libanon, ka' songko-songko na da'erah kakuasa'annyo noko baunyomo.

^20-21 Kalaja opakisa aijo', i Salomo nompalentahmo to mia-mian lee'mae nu aha mian Amori, Het, Feris, Hewi, tiba Yebus. Aha mian haha aijo' lee'mae nu bansa Kana'an anu madi' pinoko patean iwi-iwi', nu mian Israel tempo'nyo aha nonjojoongimo lipu' aijo'. Sampe tempo' uuka aiya lee' nu aha daagi' lewa' bau botuan.

²² Mian nu Israel madi' nu ala i Salomo bau botuan; aha ohangkat bau suludadu, suludadu anu matangkas na pangkatnyo, talenga' nu suludadu anu mongkapalai suludadu anu sumake' i kereta de mambamo mahampate, ka' suludadu anu sumake' i ajahan.

²³ Aha 550 na mian anu binee'anmo pangkat monjagai to mia-mian anu opakisa mokalaja apa-apaa, anu kahanda' nu pokibau i Salomo.

²⁴ Tano' anu i sasu selatan Laigan nu Tumpu tinambunan i Salomo, salatan bengkele'nyo, anak nu tomundo' Mesir, nolalilinmo mae i Kota Daud nambamo i laigan nu tomundo' anu binau i Salomo da pompojoongan ia.

²⁵ Pintolun sataun na i Salomo monsombahkon koloban anu opotunu ka' koloban bau pompodame i mezbah anu binaumo bau ponsomban Tumpu. Ia suele mompapui kamangian bau pomsombah Tumpu. Sumo aijo' na i Salomo nompojadi Laigan nu Tumpu aijo'.

²⁶ Bau pahampate i ambai i Tomundo' Salomo nombau kapan kiijo' i Ezion-Geber, koko Elot i sonibi nu bone' nu Akaba da'era Edom.

²⁷ I Tomundo' Hiram nombee'imo mian anu mokalaja i kapannyo ka' aha aijo' anu pandemo na i kapan da hingga-hinggat tiba anu mokalaja i kapan i Salomo.

²⁸ Aha toho' tinalabut namba i lipu' Ofir mongala 14.000 kilogram mosoni' ka' binoamo nu aha hi Salomo.