1 TOMU-TOMUNDO' 8 - KITAB NU TUMPU ALLA LELE MA'IMAI'

Peti' Palajanjan nu Tumpu binoamo i Laigan nu Tumpu

¹ Lapas aijo' i Tomundo' Salomo nompalentahmo iwi-iwi' anu mongkapalai tulunan nu bansa ka' mian nu bansa Israel da toka mae hi ia i Yerusalem da olalinmo na Peti' Palajanjian nu Tumpu nu lengkat i Sion, Kota Daud mambamo mo kiijo' i Laigan nu Tumpu.

² Sahingga tinokamo na aha iwi-iwi' i Sina nu Lamean tempo'nyo aitu nombaumo Tahop atopnyo hon nu kau' i bitu'on Etanim.

³ Salatan to kapa-kapala sinihukmo iwi-iwi', to ima-imam nohangkatmo Peti' Palajanjian aijo'

⁴ ka' binoamo nu aha i Laigan nu Tumpu. Kemah nu Tumpu ka' iwi-iwi', na pakakasnyo i lalinmo suele binoamo i Laigan nu Tumpu nu to ima-iman ka' aha mian nu Lewi.

⁵ I Tomundo' Salomo ka' iwi-iwi' na mian da'isan nu aha Israel sinihukmo i ahop nu Peti' palajanjian aijo' lantas aha nonsombahkonmo hi Tumpu domba ka' sapi' manjoo' hondo madi mo pinoko bilang.

⁶ Lapas aijo' to ima-imam nomboamo Peti' Palajanjian aijo' i uno nu Laigan nu Tumpu ka' pinokokomo nu aha i patu nu patong nu malaekat haha aijo' i Salipi' Anu Susi' hondo.

⁷ Polipiknyo nu patong haha aijo' natikalambomo nongkukubi peti' aijo' tiba ka' kau' anu bau polembanan.

⁸ Kau' bau polembanan aijo' mantan hondo sahingga puusnyo kantoan i ahop nu Salipi' anu Susi' hondo. (Sampe sinaa uuka aiya kau' haha aijo' daagi' ko anu kiijo'.)

⁹ I uno nu Peti' Palajanjian aijo' madi' ko sangga'atnyo ola ahi' ohua' na batu. Batu haha aijo' pinosoopmo i Musa i kiijo' tempo'nyo kiita' mae i Bungkutnyo nu Sinai, tempo'nyo Tumpu binajanji'mo tiba bansa Israel, tempo'nyo aha nambamo mae lengkat i Mesir nokiijo' i lipu' Kana'an.

¹⁰ Tempo'nyo to ima-imam nosabatmo lengkat i Laigan nu Tumpu aijo', monti-montiik laigan aijo' sinaputmo nu kundom.

¹¹ Kundom aijo' jinongkilabanmo kalana Tumpu anu daka' na kuasanyo tinokamo sahingga imam haha aijo' madi'mo noko ala po'ule' ninsoop mombau pakalaja'an nu aha.

¹² Sahingga binalado'amo na i Salomo, ia notatae, “Belento na nompokona jingka i langit, o Tumpu, Panyo Belento lebe mongka'ima'i jojoong i kundom anu pintung.

¹³ Uuka aiya binauankumo na Belento laigan daka', anu ma'ima' hondo da bau kajojoongan nu Belento sampe toka sidu-sidutu'.”

I Tomundo' binapedatumo hi mian da'isan

¹⁴ Noko lapas binalado'a i Tomundo' Salomo nongahopimo mian da'isan iwi-iwi' anu hau-haunyo tinjo-tinjo i kiijo', lantas nompoitakonmo balakat hi Tumpu Allah toka hi aha.

^15-16 Ia notatae, “Naipuan mae Tumpu nojanji'mo hi tuumangku i Daud, sumo uuka, 'Saltanmo pe'e Aku nomboa mian anu pinalesayamo hi beleng-Ku nosabat mae i Mesir, songko-songko na lipu' nu Israel mae pe'e sa'angu' na kota madi' ko anu pinile'an-Ku da timbali tampat pombauan laigan bau ponsomban Aku. Panyo beleyum Daud pinile'an-Kumo da mompalentah mian anu pinalesayamo hi beleng-Ku.' O Puji' na Tumpu Allah Israel anu nongganapimo janji'-Nyo aijo'!”

¹⁷ Ka' mule' i Salomo notatae, “Tuumangku i Daud binatanga'mo mombau Laigan ponsomban Tumpu Allah nu Israel.

¹⁸ Panyo' pinoto'imo nu Tumpu hi ia, 'Tanga'an nu beleyum aijo' ma'ima'.

¹⁹ Panyo', misa' beleyum panyo' anakje nu beleyum na mombau Laigan-Ku aijo'.

²⁰ Uuka aiya Tumpu nongganapimo anu jinanji'-Nyomo Aku tinimbali Tomundo' nu Israel nombolosakon tuumangku, ka' aku mule' nombaumo Laigan bau ponsomban Tumpu, Tumpu Allah Israel.

²¹ I uno nu Laigan nu Tumpu aijo' pinotoukankumo na pompokokoan Peti' Palajanjian anu pinongisian batu palajanjian nu Tumpu tiba mompolee'to tempo'nyo Ia nomboa mae nosabat lengkat mae i Mesir.”

Do'a i Salomo

²² Lapas aijo' i ahop nu mian da'isan anu tinokamo, i Salomo tinuminjomo nongahopi mezbah lantas nohangkatmo ua-uambiha' na limanyo,

²³ ka' binalado'a, “O Tumpu, Tumpu Allah nu Israel! Aita' i langit kabai aiya i Tano' madi' ko anu pokakana sumo Belento!

²⁴ Belento nongganapimo janji' nu Belento hi tuumangku i Daud. Apaa na anu jinanji'mo nu Belento aijo' binaumo nu Belento sinaa aiya.

^25-26 Belento mule' nojanji'mo hi tuumangku tukoonto de lee'nyo mae totu-totu'u tulu-tulutan hi Belento susumo Ia, jadi daagi' saja' ko samian lee'nyo mae anu timbali tomundo' hi aha Israel. Uuka aiya o Tumpu Allah Israel, ganapimo mae iwi-iwi' na anu jinanji'mo nu Belento hi tuumangku i Daud, posaihon nu Belento aijo'.

²⁷ Panyo' O Tumpu Allah, pa' totu-totu'u ahi sanang na Belento jojoong i dunia aiya? Mau langit songko-songko madi' sampa' na ko ewanyo bau kajojoongan nu Belento apaa mule' ola laigan bau ponsomban anu binaungkumo aiya!

²⁸ O Tumpu, Tumpu Allah-ngku, aku posaihon nu Belento! Maumo sumo aijo' de timbali potombihingakon mae na do'angku, ka' bee'mo mae na anu pinoitangkumo sinaa aiya.

^29-30 Ku taha'imani sinaa ka' pihi Belento montoakon mae Laigan aiya anu pinile'anmo nu Belento salaku tampat ponsomban Belento. Ku taha'imani lengkat mae i kajojoongan nu Belento i Suluga' Belento mompotombihingakon mae ka' mongampuni aku ka' mian anu pinalesayamo hi Belento de kami tokamo mae i laigan aiya ka' balado'a hi Belento.

³¹ De daagi' ko samian anu o tumpak nombaumo kasala'an hi mian sangga'at ka' oboamo mae i mezbah nu Belento i uno nu laigan ponsomban aiya da osumpa' au'aitu ia madi' ko sala'nyo,

³² o Tumpu, tionyo ahi' Belento mompotombihing mae kiita' i Suluga' ka' momputusi palakala nu to posa-posaihon nu Belento aiya. O hukum na anu ko sala'nyo tiba anu binaunyomo ka' opobebas na anu madi' ko sala'nyo.

³³ De mian nu Israel anu pinalesayamo hi Belento nu patundu'mo nu sampo' bali'nyo iwi-iwi' kalana binaladosa'mo lantas aha po'ule'mo balatobat hi Belento ka' mongadatimo Belento salaku Tumpu, lapas aijo' mambamo mae i laigan ponsomban aiya ka' balado'amo momoita da o ampuni nu Belento,

³⁴ ku taha'imani Belento kiita' ii suluga' mompotombihingakon mae aha. Ku taha'imani Belento mongampuni dosa' nu mian anu pinalesayamo hi Belento aiya ka' po'ule' mo momboa aha i lipu' anu binee'mo nu Belento hi mompolee' nu aha.

³⁵ De mian anu pinalesayamo hi Belento ka' baladosa'mo hi Belento ka' o hukummo nu Belento na aha madi'mo montudunakon mae ujan lantas aha balatobatmo madi'mo mombau dosa' nu aha ka' mongadatimo Belento salaku Tumpu, lapas aijo' aha tokamo mae i laigan ponsomban aiya ka' balado'amo hi Belento, de timbali Belento kiita' i suluga' mompotombihingakon mae naha,

³⁶ ka' ampuniakon mae na dosa' nu mian Israel anu pinalesayamo hi Belento tiba tomundo' nu aha. Pokinde'iakon na aha da mombau apaa na anu totu'u. Lapas aijo' Tumpu tudunakonmo mae na ujan i lipu' nu Belento aiya, lipu' anu binee'mo nu Belento hi mian anu pinalesayamo hi Belento da timbali anu nu aha sampe toka sidu-sidutu'.

³⁷ De lipu' aiya nu tokai nu kasusa'an i anu o kaan kabai panyakit anu molele ka' anu o su'an iwi-iwi' ola manggas nu posinaa, koe'on kabai nu kekedi nu kihi-kihi', kabai de mian anu pinalesayamo hi Belento nu tumbuhi nu sampo bali' kabai nu tokai mae nu panyakit,

³⁸ otaha'imani da Belento mompotombihingakon mae do'a nu aha. De ko mian nu Israel anu pinalesayamo hi Belento daagi' ko anu talalomo susa' na kinyonyoa balado'a hi Belento ka' ia monsimpalaakon limanyo mompatui laigan ponsomban aiya,

³⁹ de timbali da Belento kiita' mae i suluga' i uno nu kajojoongan nu Belento mompotombihingakon mae ka' mongampuniakon mae ka' montulungi aha. Ola Belento na monsumbu' kinyonyoa nu mian. Kalana aijo' o hukum na toto samian apaa na anu binaunyomo,

⁴⁰ da mian anu pinalesayamo hi Belento saja' tulu-tulutan hi Belento hau-haunyo aha daagi' jojoong i lipu' anu bineemo nu Belento hi mompolee' mami.

^41-42 De mian anu lengkat mae i salipu'an mohongo mae mongkona kakuasa'an nu Belento ka' hahan anu okabangangi. Anu binaumo nu Belento hi mian anu pinalesaya'mo hi Belento lantas ia tinokamo mae i laigan ponsomban aiya da mongadatimo Belento ka' balado'amo hi Belento.

⁴³ O poita da itina' mae i kajojoongan nu Belento i suluga' o hongo mae nu Belento na do'anyo ka' bee'mo apaa na anu pinoitanyomo. Sahingga iwi-iwi' na bansa i songko-songko na dunia monsumbu'mo Belento ka' montulutimo Belento susumo mian nu Israel anu pinalesaya'mo. Da nusumbu' nu aha na laigan anu ku bau aiya bau tampat ponsomban Belento.

⁴⁴ De Belento mompalentahmo mian anu pinalesayamo hi Belento da mambamo mahampate mongewa sampo bali', maumo pa' iya mae na kajojoongan, aha mo'ahop mae i kota anu pinile'anmo nu Belento aiya ka' balado'a mompatui mae laigan aiya anu binaungkumo ponsomban Belento.

⁴⁵ Ku poita da kiita' i suluga' Belento mompotombihingakon mae do'a nu aha aitu, ka' mombee'i kauntungan de mahampate na aha.

⁴⁶ De mian anu pinalesayamo hi Belento binaladosa'mo hi Belento – memang totu-totu'unyo madi'mo daagi' ko samian anu madi' baladosa' – lantas kalana Belento montambuha'mo opojohokmo nu Belento na aha nu patundu'mo nu sampo bali' ka' mian anu i hakopmo oboamo i lipu' sangga'at anu majo'on kabai anu ohani

⁴⁷ opoita daa Belento mopotombihingankon do'a nu aha. De i lipu' aijo' aha mompala'imo to dosa-dosa' nu aha ka' balado'amo hi Belento ka' mule' mongakuimo na aha binaladosa'mo ka' nombaumo anu ma'idek, potombihingakon mae na do'a nu aha o Tumpu.

⁴⁸ De ilipu' aijo' aha sanaangmo ka' totu-totu'umo na kinyonyoa nu aha mompala'imo to dosa-dosa' nu aha ka' balado'amo hi Belento mongahopi mae lipu' aiya anu binee'mo nu Belento ka' laigan ponsomban anu binaungkumo ponsomban Belento aiya.

⁴⁹ Sahingga itina' mae i kajojoongan nu Belento i suluga' potombihingakon mae ahi' nu Belento na do'a nu aha ka' okalibosi na aha.

⁵⁰ Ampuniakon na dosa' nu aha iwi-iwi' ka' kalakuan nu aha anu ma'idek hi Belento, ka' potimbali na sampo bali' nu aha iwi-iwi' ka' mombau han anu ma'ima' hi aha.

⁵¹ Aha mian anu pinalesayamo hi Belento anu binoamo mae nu belento nosabat lengkat i Mesir lipu' anu pinonsansala'an aha.

⁵² Ku poita da Belento Tumpu Allah saja' montoa mae mian nu Israel anu pinalesayamo hi Belento tiba Tomundo' nu aha. Ka' sanang mae na kinyonyoa nu Belento mompotombihingakon do'a nu aha de aha momoitamo tulung hi Belento.

⁵³ Belento o Tumpu Allah nompile'imo aha aijo' i bansa sangga'at iwi-iwi' da opotimbali mia anu pinalesayamo hi Belento, susumo anu tinaloakonmo nu Belento hi aha anu pinoto'imo hi Musa posaihon nu Belento aijo', tempo'nyo Belento nolaya' mae mompolee' mami nosabat lengkat mae i Mesir.”

Do'a anu pinontuduinyo

⁵⁴ Sumo aijo' na i Salomo binalado'a, ia tinolodadupu i ahop nu mezbah ka' limanyo pinotalanyo nokiita'.

⁵⁵ Noko lapas aijo' ia tinuminjomo, ka' ia notataemo daka-daka' nomoita hi Tumpu Allah da obalakati na mian iwi-iwi' anu sinihukmo i kiijo', ia notatae,

⁵⁶ “O puji' na Tumpu anu nombee'imo mae ka'amanan hi mian anu pinalesayamo hi ia susumo anu jinanji'-Nyomo hi Musa posaihon-Nyo. Iwi-iwi' na anu ma'ima' anu jinanji'-Nyomo ginanapan-Nyomo.

⁵⁷ O'amalakon da Tumpu Allah-nto montoa mae kita susumo Ia nonjagai mompolee'to, o amalakon da Ia madi' mompala'i kita.

⁵⁸ O'amalakon da Tumpu Allah mompotimbali mae kita to mia-mian anu tulu-tulutan hi Ia, dan i uno nu kantumuu'anto saja' mombatuki pongka'oho-Nyo, ka' montuluti atulannyo iwi-iwi' ka' palentah-Nyo anu binee'-Nyomo hi mompolee'to.

⁵⁹ O'amalakon da Tumpu Allah-nto saja' monginau' mae do'anto ka' apaa na anu pinoitangkumo aiya hi Ia. O'amalakon da Ia saja' mae mompotoa kalibosan-Nyo hi mian Israel tiba tomundo' nu aha ka' obee'i mae na aha apaa na anu nu palalui nu aha sansina-sinaa.

⁶⁰ Tiba jalan anu sumo aijo' iwi-iwi' na bansa i dunia aiya monsumbu'je taalu' ola-olamo ahi' Tumpu, na Tumpu Allah, madi' ko sangga'atannyo.

⁶¹ Tionyo ahi' belemiu, mian anu palesayamo hi Ia saja' ahi' tulu-tulutan hi Tumpu, Tumpu Allah-nto ka' montuluti atulan-Nyo iwi-iwi' susumo anu binaumo nu belemiu sinaa aiya.”

Nompisasawe'imo Laigan nu Tumpu

⁶² Lapas aijo' i Tomundo' Salomo ka' iwi-iwi' na mian anu sinihukmo kiijo' nonsombahkonmo koloban hi Tumpu.

⁶³ Kakona koloban anu bau pompodame, i Salomo nonsombahkonmo 22.000 na sapi' ka' 120.000 na domba. Sumo aijo' na i tomundo' ka' iwi-iwi' na mian da'isan nombau lamean nomposawe'i Laigan nu Tumpu.

⁶⁴ Ka' i sinaamo aijo' suele na i Salomo nolame'akon natannyo sasu unonyo anu i ahop nu Laigan nu Tumpu aijo'. Ka' i natannyo aijo' sinombahkonnyomo na koloban anu opotunu, koloban gandum ka' lompo'nyo nu binatang bau koloban pompodame. Iwi-iwi' aijo' sinombahkonnyomo i kiijo', kalana mezba tambaga' ise' hondo madi' moko ala mongisi iwi-iwi' apaa na anu osombahkon i kiijo'.

⁶⁵ I Laigan nu Tumpu aijo' na i Salomo ka' iwi-iwi' mian nu Israel anu pinalesayamo nombau lamean Tahop o atapi nu Hon nu kau', pitunsinaa na kopinnyo. Manjoo' hondo na mian anu tinoka i kiijo' Aha tinoka lengkat mae i da'erah anu majo'on hondo montulu Jalan Hamat sasu utara tinoka-toka ipotempasan tiba Mesir sasu salatan.

⁶⁶ I sinaa kino alunnyomo i Salomo nompalentahmo mian haha aijo' da minsusule'mo i laigan nu aha, kinyonyoa nu aha i lame'mo, kalana iwi-iwi' na balakat anu binee'mo nu Tumpu hi posaihon-Nyo i Daud ka' hi bansa Israel mian anu pinalesayamo hi Ia.