1 TOMU-TOMUNDO' 7 - KITAB NU TUMPU ALLA LELE MA'IMAI'

Laigan nu tomundo' ka' kajojoongan i Salomo

¹ I Salomo nompotinjo mule' laigan nu tomundo' bau kajojoongannyo. Kinopinyo na nompotinjo laigan nu tomundo' aijo' sinampulu' ka' totolu' na taun.

^2-3 I laigan nu tomundo' aijo' binauan mule' i Salomo sa'angu' na laigan anu ewa hondo anu osa-osanggohi, “Laigan Alas nu Libanon”. Kodaka'nyo: 44 meten, na komantannyo ka' ko bolanyo 22 meten, ka' ko tangkasnyo 13,5 meten. Laigan aijo' totolu' na ohi'nyo pinojiji' te kau' lontio' nu Libanon na binau; toto sanjiji' sampulu' ka' olima' na ohi'nyo ka' aita' i buannyo kinaso'an nu kau' lontio' Libanon. Palaponnyo suele kau' aijo' na binau, ka' pinaha pokona da kaso'nyo aijo' boli kantoan.

^4-5 Pimpi'nyo kowi koanan nu laigan aijo' pinaha pokonaan tolongannyo: totolu' na jiji'annyo i pimpi'nyo sa'angu' mompaha ahop tiba totolu' na jiji'annyo nu tolongan i pimpi'nyo sangga'at. Bingkai nu tumbannyo ka' tolongan haha aijo' sulapa' opat mantan.

⁶ I Salomo suele nompotinjo sa'angu' na “Laigan Pilar.”. Ko mantannyo nu laigan aijo' 22 meten, ka' ko bolanyo 13 ka' mintonga' na meten. I ahop nu laigan aijo' ko lambingnyo ka' ko pilarnyo ka' ko ojannyo.

⁷ Laigan sangga'at, “Laigan Tahta” anu biasa suele osanggohi Laigan Pomputusian palakala, Laigan aijo' lengkat pe'e i salonyo toka-toka aita' mae i kaso'nyo i lapisan nu kau' lontio' Libanon. I Laiganmo aiya na Pomputusian i Salomo iwi-iwi' na palakala.

⁸ Kajojoongan i Salomo binau susumo laigan toto daka-daka' sangga'at pinotinjo i natan sangga'at i hiku nu Laigan anu Pomputusian palakala. Laigan kajojoongan nu bengkele'nyo, anak boune nu tomundo' Mesir, suele binauan i Salomo laigan daka' pokakana sumo laigan kajojoongan i Salomo.

⁹ Iwi-iwi' na laigan aijo', tiba natannyo ko daka'nyo lengkat pe'e i mesennyo toka-toka i atopnyo, te batu anu toto ima-ima' na binau. Batu haha aijo' pinotoukamo i tampat pinengkekean batu, ka' kinolo-kolongmo susumo sukatannyo; sasu unonnyo ka' sambiha'nyo pinolata nu galagaji.

¹⁰ Mesen nu laigan haha aijo' batu anu toto daka-daka' na binau ka' anu mahan na olinyo. Batu haha aijo' dagi' ko anu 3,5 meten na komantannyo, ka' mule' daagi' ko anu opat na meten.

¹¹ Aita' i buannyo pinokonaan batu sangga'at anu mahan na olinyo ka' kinolo-kolong susumo sukatannyo, lantas tinalopan nu kau' lontio' Libanon.

¹² Pagan mesen i natan nu laigan nu tomundo' ka' pagan mesen i natan nu Laigan nu Tumpu tiba pagan mesen nu laigan anu sasu i ahopnyo nu Laigan nu Tumpu, toto sa'angu' i lapisan nu kau' lontio' Libanon, de totolu'mo na lapisannyo nu batu.

I Huram bine'an kalaja da mombau pakakas pongisi Laigan nu Tumpu

^13-14 I kota Tirus daagi' ko mo'ane samian, sanggonyo i Huram. Ia totu-totu'u pande hondo na mombau apa-apaa ka' manjoo' na anu nusumbu' mombau to paka-pakakas tambaga'. Tuumanyo anu sini-sinilakamo mian nu Tirus suele pande hondo na mombau to paka-pakakas tambaga'. Tinanyo nu aha mae tulunan nu bansa Naftali. I Tomundo' Salomo nompalentahmo mian da mamba mompoboa i Huram da toka mae mongkapalai pakalaja'an iwi-iwi' mombau pakakas tambaga'. Sahingga tinokamo mae na i Huram ka' nombaumo apaa na anu pinoto'imo i Salomo.

Ohua' na ohi' anu daka' tambaga' na bau

¹⁵ I Huram nombaumo ohua' na ohi' tambaga na binau ka', toto sa'angu' ko tangkasnyo 8 meten, ko daka'nyo 5,3 meten, ka' ko butolunyo nu tambaga' aijo' 7,4 senti meten. Ohi' haha aijo' lulu na unonyo.

¹⁶ Ohi' haha aijo' pinaha bauan ubaknyo sasu aita'i puusnyo tambaga' na binau toto sa'angu' ko tangkasnyo 2,2 meten

^17-20 sumo bunga bakung ko tangkasnyo 1,8 meten. Toto sa'angu' na ubaknyo nu ohi' haha aijo' binunga-bungan nu bua' nu dalima ohua' na jiji'nyo tambaga' na binau. Iwi-iwi' ua'atu na bua'nu dalima na pi okona hi toto sa'angu' na ubaknyo nu ohi' sasu aita' mae. Lantas i Huram nonganyammo lante tambaga' ka' pinokonanyo aita i ohi' haha aijo' ka' i buannyo nu lante anu inganyam haha aijo',

^21-22 aijo'mo na ubaknyo nu ohi' haha aijo' anu susumo bunga bakung anu pinaha pokona i ohi' haha aijo'. Ohi' haha aijo' pinotinjo i ahop nu sabatan pinsoopan mokiijo' i Laigan nu Tumpu – sa'angu' i sasu selatan osanggohi, Yakhin, ka' anu i sasu utara osangohi' Boas. Sumo aijo' na i Huram nombau ahi'nyo haha aiji.

Gumbang tambaga

²³ Lapas aijo' i Huram nombaumo sa'angu' na gumbang tambaga anu timpodon, sukatannyo sumo uuka: unonyo 2,2 meten, ko bola nu totonga'nyo 4,4 meten ka' titikupnyo 13,2 meten.

²⁴ Titikup i sambiha'nyo sasu aita' binunga-bungaan susumo bua' nu labu' pinojiji' ahua', anu pinokonamo tempo'nyo pe'e nombau gumbang aijo'.

²⁵ Gumbang aijo' pinokoko aita' i tonga' nu sapi' tambaga' anu sampulu' ka' ahua' – totolu' mo'ahop i sasu utara, totolu' sasu selatan totolu' sasu kinsoban, ka' totolu' isasu kabete'an

²⁶ Ko butolunyo nu gumbang aijo' 75 mili meten. Biwi nu nganga'nyo sumo sasangkina anu tompeluk sasu sambiha'nyo moho-moho' sumo bunga bakung anu tingkokamo. Gumbang aijo' isinyo kila-kila 40.000 liter.

Kareta tambaga na binau

²⁷ I Huram suele nombaumo sampulu' na kareta tambaga, toto sa'angu' ko mantannyo 1,8 meten, ko bolanyo 1,8 meten, ko tangkasnyo 1,3 meten.

²⁸ Kareta haha aijo' dopi' sulapa' opat na binau pinokonan bingkainyo.

²⁹ Dopi' haha aijo' binunga-bungaan susumo singa na binotik, susumo sapi' ka' susumo malaekat. I Bingkainyo haha aijo' – sasu aita' ka' i aluknyo nu to gamba-gambalan singa ka' sapi' haha aijo' pinokalayo'an bunga-bunga anu binotik ka' pinaha poka-pokait.

³⁰ Toto sa'angu' na kareta haha aijo' ko lodanyo opat tambaga na binau ka' asnyo suele tambaga na binau. Opa-opat na pasu'nyo nu kareta aijo' ko ohi'nyo bau pontahani mangko' tambaga ka' binunga-bungaan, anu susumo bunga-bunga anu mompaha kai-kait i sasu sambiha'nyo.

³¹ Opa-opat na ohi'nyo sasu aita' anu montahani mangko' aijo' pinokonan mule' sa'angu' na bingkai anu timpodon da bau pontahani mangko'. Ohi'nyo haha aijo' anu bau pontahani moliu-liu mokiita' ko tangkasnyo 44 senti meten lengkat i dopi' anu sula-suapa' opat aijo' ka' 22 senti meten na mokaiyong i aluknyo. I bingkai anu i nganga'nyo nu kareta aijo' pinaha boti-botikan.

³² Ko tangkas nu lodanyo haha aijo' 66 senti meten; pinompokonan akaong i aluknyo nu dopi' anu pinonsaloi. Asnyo nu bolanyo tiba karetanyo osanggohi sa'angu' na bahagian.

³³ Bolanyo haha aijo' pokakanamo bola nu kareta anu opake mahampate; lingkar nu bolanyo, jalaja'nyo, asnyo ka' kapala kambingnyo iwi-iwi' tambaga na binau.

³⁴ Opat na ohi'nyo bau pontahani pasu'nyo sasu aluknyo anu pinaha pokona i kareta haha aijo: Ohi'nyo haha aijo' timbalimo osanggohi sa'angu' na bahagian tiba karetanyo.

³⁵ Duhu duhuknyo sasu aita' i kareta aijo' pinokonan dopi' ko bolanyo 22 senti meten. Ohi'nyo bau pontahani dopi'nyo haha aijo' iwi-iwi' timbalimo osanggohi sa'angu' na bahagian tiba karetanyo.

³⁶ Ohi'nyo anu bau pontahani ka' dopi'nyo haha aijo' binunga-bungaan anu susumo malaekat, singa kau' palem na pinaha gamban iya na anu ma'isa ko gambannyo aijo' pinaha pokonan gambalan nu bunga-bunga mompaha kai-kait titikup.

³⁷ Sumo aijo' na nombau kareta haha aijo'. Iwi-iwi' pokakana na nombau.

³⁸ I Huram suele nombau sampulu' na mangko' anu toto, toto sa'angu' na kareta pino'una'an sa'angu' na mangko'. Toto sa'angu' na mangko' aijo' kobolanyo i totonga'nyo 1,8 meten ka' isingyo 800 liter na uee.

³⁹ I Huram nompo'una' olima' na kareta i sasu selatan Laigan nu Tumpu, ka' olima' i sasu utara. Gumbang tambaga aijo' pinokokonyo i susunyo sasu tenggara.

Pakakas anu tinulis i uno nu daputan nu Laigan nu Tumpu

^40-45 I Huram nombau mule' to pamu-pamutu', to siko-sikop, ka' to mangko-mangko'. Noko lapas binau na aijo' iwi-iwi', ningkotmo binau i Tomundo' Salomo apaa na anu opake i Laigan nu Tumpu. Aiya na pakakas anu binaunyomo: Ohi'daka-daka' ohua' Ohua' na ubak nu ohi' anu sumo mangko' anu opokona aita' i ubak nu ohi' aijo' ohu-ohua'. Lante' anu inganyam ka' pinaha pokona aita' i ubaknyo nu ohi' Pato atu na dalima tambaga' anu pinaha pojiji' ahua' na jiji'annyo titikup na lante' anu inganyam ka' pinokona i ubak nu ohi'nyo toto sa'angu'. Sampulu' na kareta Sampulu' na mangko' daka-daka' Gumbang tambaga Sampulu' ka' ohua' na sapi' tambaga anu pinompokokoan gumbang haha aijo' aita' i tonga'nyo. To pamu-pamutu', to siko-sikop ka' to mangko-mangko' Iwi-iwi' na pakakas i Laigan nu Tumpu aijo', anu binau i Huram obee' hi Tomundo' Salomo, tambaga na binau, ka' pinaha gegesan sahingga jinongkilaban.

⁴⁶ I Tomundo' noki bau pakakas haha aijo' kiijo' mae i tambaga olotnyo nu Sukot ka' Sartan i Bangka'nyo nu Yordan.

⁴⁷ I Salomo madi' nompalentah da otimbang na tambaga hahah aijo', kalana talalo hondo manjoo'. Jadi ko boatnyo nu tambaga haha aijo' madi' sinumbu'.

^48-50 I Tomundo' Salomo suele noki bau to paka-pakakas sangga'at anu mosoni' na obau da opake i Laigan nu Tumpu. Aiya na pakakas haha aijo' anu binaumo: Mezbah Meja' pompo'una'an roti anu osombahkon hi Tumpu Allah Sampulu' na tengke nu sulu' anu opokoko i ahop nu salipi' anu Susi' Hondo. olima' i sasu selatan ka' olima' i sasu utara To bunga-bunga To sulu-sulu' To dada-dadapit To pato-patongko, pakakas bau pompoho' sulu' To mangko-mangko' To lea-lean pompotimpasan oba. To lea-lean pompotimpasan kamangian To hense-hensel anu opake i tumban nu Salipi' Anu Susi' hondo ka' to saba-sabatan anu sasu sambiha'nyo i Laigan nu Tumpu.

⁵¹ Salatan i Tomundo' Salomo noko potimbalimo Laigan nu Tumpu, pinaha po'una'nyomo i uno nu gudang nu Laigan aijo', iwi-iwi' na salaka', mosoni' ka' to paka-pakakas sangga'at apaa na anu sinombahkonmo i Daud tuumanyo, hi Tumpu.