1 TOMU-TOMUNDO' 6 - KITAB NU TUMPU ALLA LELE MA'IMAI'

I Salomo nombaumo Laigan nu Tumpu

¹ I Salomo nontampu'unimo nombau laigan nu Tumpu i bitu'on Ziw, aijo'mo bitu'on ko ohua'nyo, i taun ko opatnyomo na ia nompalentah, 480 mo na taun na aha bansa Israel nompala'imo mae Mesir.

² Bobatnyo nu laigan nu Tumpu, sasu unonyo sumo uuka: ko mantannyo 27 m, ko bolanyo 9 m, ka' ko tangkasnyo 13,5 m.

³ Sasu ahopnyo nu laigan nu Tumpu aijo', i lambingan ko mantannyo 4,5 meten ka' ko bolanyo 9 meten sumo ko bolanyo nu laigan aijo'.

⁴ I mesen pinompimpi' laigan aijo' daagi' ko bolo-bolonyo salaku tolongannyo pinobola mokiijo' sasu unonyo.

⁵ Titikup sasu hikunyo nu laigan aijo', pimpi'nyo mesen sasu sambiha'nyo binauan salipi'nyo moluundu-lundu mokiita'. Totolu' na lunduannyo, toto sa'angu' ko tangkasnyo 2,2 meten.

⁶ Ilunduannyo anu momona, ko bola nu salipi'nyo 2,2 meten, ilunduannyo anu ko ohua'nyo 2,7 meten, ilunduannyo anu ko totolu'nyo 3,1 meten. Mesen nu pimpi' lunduannyo anu sasu aluknyo lebeh butolu molingkudui mesen nu pimpi' anu lunduannyo aita' mae i buannyo hondo, sahingga to bala-balak nu salipi' anu pinontuangi aijo' timbali moguntang tiba pimpi' mesen nu laigan nu Tumpu aijo' ka' madi' pilenje binolo'an na pimpi' mesen aijo'.

^7-10 To bala-balak anu pinake aijo' kau' lontio' nu Libanon. Sabatan pinsoopan i salipi' haha aijo' anu pinontuangi i lunduannyo akaong anu i sasu aluknyo pinokona i sasu selatan, ka' mokiita' ilunduannyo anu ko ohua'nyo tiba to totolu'nyo ingojanan gineo-geo'akon. Lapas aijo' i Salomo nompokonaimo palaponnyo nu laigan aijo'. Ia nompokona aijo' pinaha po'una'annyo pe'e kaso'nyo lapas aijo' pinokonamo na dopi' nu kau' Lontio' anu ingala i Libanon. Tempo'nyo nombau laigan nu Tumpu aijo', onyi' nu pombaan, bobolo' kabai pakakas besak madi' ko anu hondo-hondo i hongo kalana batu haha aijo' anu pinake binau laigan aijo' pinotoukamo momonanyo tempo'nyo kiijo' mae ipinongalapan batu. Sumo aijo' na i Salomo nombau Laigan nu Tumpu aijo' sahingga tinimbalimo.

¹¹ Sahingga notataemo na Tumpu hi Salomo,

¹² “De beleyum tulu-tulutan hi iwi-iwi' na atulan ka' palentah-ngKu, Ku bee'mo hi beleyum apaa na anu jinanji'-Kumo hi tuuma nu beleyum i Daud.

¹³ Aku jojoongmo i laigan anu binaumo nu beleyum aiya hi aha mian nu Israel anu pinalesayamo hi belengku. Madi'mo Ku pala'i na aha.”

Pakakas pongisi Laigan nu Tumpu

¹⁴ Sumo uuka na i Salomo nompotimbali Laigan nu Tumpu aijo'.

¹⁵ Songko-songko na pimpi' mesen sasu unonnyo i lapisan nu kau' lontio' Libanon, lengkat pe'e salonyo toka-toka mokiita' i palaponnyo. Salonyo kau' lontio' biasa na pinake.

¹⁶ I uno nu laigan aijo' i sasu hikunyo binauan salipi'nyo ka' pinokonan pimpi'nyo bau pongoloti kau' lontio' na binau, lengkat pe'e i salonyo toka-toka mokiita' i palaponnyo. Salipi'nyo aijo' osanggohi Salipi'nyo anu Susi'. Hondo ko mantannyo osio' na meten.

¹⁷ Salipi'nyo i ahop nu salipi' anu susi' hondo aijo', osanggohi Salipi'nyo anu ewa, ka' ko mantanyo 18 meten.

¹⁸ Pimpi' mesen sasu unnyo songko-songko na laigan aijo' i lapisan nu kau' lontio' Libanon, sahingga batu anu pinompimpi' madi' kantoan. Pinolapisi aijo' pinaha boti-botikan mintali-tali' bua' nu looboian ka' bunga-bunga anu timbokaje.

¹⁹ Salipi'nyo anu Susi' Hondo aijo' binau i uno nu Laigan nu Tumpu aijo' pinotouka da pompo'una'an Peti' Palajanjian nu Tumpu.

^20-22 Salipi'nyo aijo' ko mantannyo, ko bolanyo ka' ko tangkasnyo pokakana, osio' na meten. Mezbah i ahop nu Salipi' anu Susi' Hondo aijo' kau' lontio' Libanon na binau. I sabatan pinsoopan i salipi' aijo' pinaha pokalayo'an lante' mosoni' songko-songko na unonyo nu Laigan nu Tumpu aijo' tibamo Salipi' anu Susi' Hondo ka' mezbahnyo i lapisan nu mosoni' anu madi' ko galo'nyo.

²³ I unonyo nu Salipi' anu Susi' Hondo aijo' pino'una'an ohua' na patong nu malaekat tekau' Zaitun na binau. Ohu-ohua' na patong aijo' bubuu' pokakana na ko tangkasnyo 4,4 meten;

^24-26 Ko daka'nyo ka' balu-balu'nyo pokakana. Toto sa'angu' ko polipiknyo ohua', polipik haha aijo' 2,2 meten na ko mantannyo. Puusnyo nu polipiknyo toto sa'angu' na patong aijo' ko lakanyo 4,4 meten.

²⁷ Ohu-ohua' na patong aijo' pinotinjo mompaha bebe' i uno nu Salipi' anu susi' Hondo aijo' sahingga toto sa'angu' na polipiknyo aijo' mompadis pimpi' ka' polipiknyo sangga'at mompaha padi-padis i totonga' nu Salipi' aijo'.

²⁸ Ohu-ohua' na patong aijo' i lapisan nu mosoni'.

²⁹ Songko-songko na pimpi' sasu unonyo i Laigan nu Tumpu binunga-bungaan nu anu binotik mintali-tali' to mala-malaekat, ka' mule' anu sumo to kau-kau' palem ka' mule' sumo bunga-bunga anu timbokamo.

³⁰ Salonyo i uno nu Laigan nu Tumpu aijo' songko-songko i lapisan nu mosoni'.

³¹ I sabatan pinsoopan mokiijo' i Salipi' anu Susi' Hondo aijo' binauan tumbannyo anu timbali otuhea'akon poti-potimbiha' kau' zaitun na binau. Tumban aijo' aita' i buannyo i totonga'nyo opotunjo nokiita'.

³² Poti-potimbiha' na tumban aijo' binoti-botikan anu mintali-tali' malaekat, ka' mule' sumo kau' palem ka' bunga-bunga anu timbokamo. Tumbannyo, patong nu malaekat, ka' boti-botinyo susumo kau' palem iwi-iwi' i lapisan nu mosoni'.

³³ I sabatan pinsoopan i uno nu salipi' anu momona otokai aijo'mo na salipi' anu ewa, pinombingkainyo tumban kau' zaitun na binau, sulapa' opat ka' mantan.

³⁴ Suele binau na tumbannyo otuhea'akon poti-potimbiha' kau'nyo lontio' biasa na pinake ka' toto sa'angu' timbali olipat.

³⁵ Tumban haha aijo' binunga-bungaan nu anu binoti-botikan susumo malaikat, kau' palem ka' bunga-bunga anu timbokamo. Iwi-iwi' na' anu binoti-botikan i lapisan nu mosoni'.

³⁶ I ahopnyo nu Laigan nu Tumpu aijo' binauannyo natan sasu unonnyo. Natan aijo' titikup pinagan nu mesen anu mompaha lapi-lapis: de totolu'mo na lapisannyo nu batu, o lapisimo nu kau' lontio' nu Libanon.

³⁷ Mesen pinompotinjoan Laigan nu Tumpu aijo' binau i bitu'on Ziw, aijo'mo bitu'on ko ohua'nyo, i taun ko opatnyomo na i Salomo nompalentah.

³⁸ Ka' i bitu'on Bul, aijo'mo na bitu'on ko uwalu'nyo, i taun ko sampulu'nyomo ka' sa'angu' na ia nompalentah, tinimbalimo na Laigan nu Tumpu aijo' anu binau i Salomo, madi' sala' susumo tempo' anu polo'mo tinantukannyo. Laigan nu Tumpu anu binaunyo aijo' pinopitu' na taun na kinopinnyo.